މާލެ ސިޓީ ކައުންސިލްގެ މުވައްޒަފުން ވަދެ ހުސްކުރަން މަސައްކަތް ކުރި ޔޫތު މިނިސްޓްރީގެ ގުދަން ހުރި ބިމަކީ ސިޓީ ކައުންސިލެއް ބިމެއް ނޫން ކަމަށާއި ސަރުކާރުން އެ ބިން އެ މިނިސްޓްރީއާ ހަވާލުކޮށްފައިވަނީ ކުޅިވަރު ކުޅޭ އިމާރާތެއް އެޅުމަށް ކަމަށް ޔޫތު މިނިސްޓްރީން މިއަދު ބުނެފި އެވެ.
ޔޫތު މިނިސްޓްރީގެ ގުދަން ހުރީ ކުރިން ރުމާލު 2 ޖަގަހަ ހުރި ކޮށީ (މާލޭގެ 353 ނަންބަރު ކޮށި) ގަ އެވެ. ސިޓީ ކައުންސިލްގެ މުވައްޒަފުންނާއި ގޮސް ހުކުރު ދުވަހުގެ ރޭ އެ ގުދަން ހުސްކުރަމުން ދަނިކޮށް ހުއްޓުވީ ފުލުހުންނެވެ
އެ ބިމަކީ ސިޓީ ކައުންސިލްގެ ބިމެއް ކަމަށް ބުނެ އިއްޔެ ނެރުނު ބަޔާނަށް ރައްދު ދިނުމުގެ ގޮތުން ޔޫތު މިނިސްޓްރީން މިއަދު މީޑިއާތަކަށް ފޮނުވި ބަޔާނުގައި ބުނެފައި ވަނީ މާލޭގެ 353 ނަންބަރު ކޮށްޓަކީ ކުޅިވަރުގެ ބޭނުންތަކަށް ކަނޑައަޅައި މެއި 15، 2019 ގައި ޕްލޭނިން މިނިސްޓްރީން ހަވާލުކޮށްފައިވާ ބިމެއް ކަމަށާއި އެ ބިމުގެ ޑިވެލޮޕްމަންޓު ކޮންޓްރޯލް ވެސް ޕްލޭނިން މިނިސްޓްރީން ނޮވެމްބަރު 15، 2019 ގައި ދީފައިވާ ކަމަށެވެ.
"16 ޖެނުއަރީ 2022 ގައި މިނިސްޓްރީ އޮފް ޕްލޭނިން، ހައުސިން އެންޑް އިންފްރާސްޓަކްޗާއިން މި މިނިސްޓްރީއަށް ފޮނުވި ޗާޓުގައިވެސް މި ބިމަކީ މި މިނިސްޓްރީއާ ހަވާލުކޮށްފައިވާ ބިމެއް ކަން ސާފުކޮށް އެނގެ އެވެ." ބަޔާނުގައި ބުނެފައިވެ އެވެ.
އެ ބިމުގައި އަޅާ ވޮލީބޯޅަ އިންޑޯ އިމާރާތުގެ ކޮންސެޕްޓު ކުރެހުން ޖޫން 23، 2021 ގައި ޕްލޭނިން މިނިސްޓްރީން ފާސްކޮށްދީފައިވާ ކަމަށާއި ޑީޓެއިލް ކުރެހުން ފާސްކޮށްދިނުމަށްޓަކައި ގުޅުންހުރި ހުރިހާ ލިޔުންތަކާއެކު ކައުންސިލަށް ހުށަހެޅާފައިވާ ކަމަށް ޔޫތު މިނިސްޓްރީން ބުނެ އެވެ. ނަމަވެސް އެ ކުރެހުން ފާސްނުކޮށްދީ ދިގު ދެމިގެންދާތީ މިދިޔަ އަހަރުގެ ވެސް ސިޓީއެއް ފޮނުވި ކަމަށް ބަޔާނުގައި ބުނެފައިވެ އެވެ.
ވޮލީބޯޅަ އިންޑޯ އިމާރާތް އެޅުމަށް ސިޓީ ކައުންސިލާއެކު މުއާމަލާތްތައް ކުރެވިފައިވާއިރު، އެއީ އެ މިނިސްޓްރީގެ ބިމެއްކަން ސާފުކޮށް އެނގެން އޮންނާނެ ކަމަށާއި މީގެ ކުރިން އެއްވެސް މަރުހަލާއެއްގައި އެއީ ސިޓީ ކައުންސިލްގެ ބިމެއް ކަމަށް އެ ކައުންސިލުން ބުނެފައި ނެތް ކަމަށް މިނިސްޓްރީގެ ބަޔާނުގައިވެ އެވެ.
