އިންޑިއާގެ މެދުތެރޭގައި އޮންނަ މަދްޔަ ޕްރަދޭޝް ސްޓޭޓުގެ ފައްޅިއެއްގައި 35 މީހުން ވަޅަކަށް ވެއްޓި މަރުވެއްޖެ އެވެ.
އިންދޯރް ސިޓީގައި ހިނގި އެ ހާދިސާގައި 14 މީހުން ސަލާމަތް ކުރި އިރު، އެކަކު ހޯދުމުގެ މަސައްކަތް ދަނީ ކުރަމުންނެވެ.
ފުލުހުން ބުނީ އެ މީހުން ވަޅަށް ވެއްޓުނީ އޭގެ މަތީގައި އަޅާފައި އޮތް ކޮންކްރީޓުގަނޑެއްގެ މަތީގައި ތިއްބައި ކުއްލިއަކަށް ކޮންކްރީޓްގަނޑު ހަލާކުވެގެން ކަމަށެވެ.
ބޮޑު ވަޒީރު ނަރެންދްރަ މޯދީ ވަނީ އެ ހާދިސާއާ ގުޅުގެން ހިތާމަ ފާޅުކުރައްވައިފަ އެވެ. އެކަން ހިނގީ ހިންދޫ ދީނުގެ ރާމް ނަވަމީ ފެސްޓިވަލާ ގުޅިގެން ފައްޅީގައި ހަރަކާތްތައް ރާވާފައި ވަނިކޮށެވެ.
އިންޑިއާގެ ނޫސްތަކުން ބުނީ އެ ތަނުގައި ފައްޅި ހެދުމުގެ 40 ވަރަކަށް އަހަރު ކުރިން ވަޅު މަތީގައި ކޮންކްރީޓް އަޅައި ފޮރުވި ކަމަށެވެ. އެއީ 40 ފޫޓު ފުން ވަޅެކެވެ.
ޗީފް މިނިސްޓަރު ޝިވްރާޖް ސިންގް ޗައުހާން ވިދާޅުވީ މަރުވި މީހުންގެ އާއިލާތަކަށް 500،000 ރުޕީޒް އަދި އަނިޔާވި މީހުންނަށް 50،000 ރުޕީޒް ބަދަލުގެ ގޮތުގައި ދޭނެ ކަމަށެވެ.
ބޮޑު ވަޒީރު މޯދީ ވެސް މަރުވި މީހުންގެ އާއިލާތަކަށް ތައުޒިޔާ ފޮނުއްވުމަށް ފަހު ވިދާޅުވީ ކޮންމެ އާއިލާއަކަށް ބަދަލުގެ ގޮތުގައި 200،000 ރުޕީޒް ދެއްވާނެ ކަމަށެވެ.
