ލަންޑަން (މާޗު 31) - އިނގިރޭސި ޕްރިމިއާ ލީގުގެ ތަށި ހޯދުމާ ދިމާލަށް އާސެނަލްގެ މިސްރާބު އޮތްއިރު، މި ސީޒަންގައި އާސެނަލް އިން ނެރެފައިވާ ނަތީޖާތަކުގެ ސިއްރަކީ ޓީމުގެ ކުޅުންތެރިންގެ މެދުގައި އޮތް އެއްބައިވަންތަކަން ކަމަށް އެ ޓީމުގެ ކޯޗު މިކޭލް އާޓެޓާ ބުނެފި އެވެ.
އިނގިރޭސި ޕްރިމިއާ ލީގުގައި ކޮންމެ ޓީމެއް ވެސް ބާކީ 10 މެޗު ކުޅެން އޮތްއިރު، އަށް ޕޮއިންޓްގެ ލީޑަކާ އެކު އާސެނަލް އޮތީ ތާވަލްގެ އެއް ވަނައިގަ އެވެ. އާސެނަލް އަށް 2004 ވަނަ އަހަރުގެ ފަހުން ފުރަތަމަ ފަހަރަށް ލީގު ތަށި ކާމިޔާބުކުރުމުގެ މަގު ވަނީ ފަހިވެފަ އެވެ.
ދެ ވަނައިގައި އޮތް މެންޗެސްޓަ ސިޓީ އަތުން ބަލިވެ، އާސެނަލް އަށް އެއް ވަނަ މަގާމު ކުޑަ ދުވަސްކޮޅަކަށް ގެއްލުނެވެ. އެކަމަކު، އިނގިރޭސި ލީގުގައި އެންމެ ފަހުން ކުޅުނު ހަ މެޗުން ވެސް މޮޅުވެ، ލީގު ހޯދުމުގެ ރޭހުގައި އާސެނަލް އިން ވަނީ ކޮންޓުރޯލް ނަގައިފަ އެވެ.
އާޓެޓާ ދެކޭގޮތުގައި މި ސީޒަންގައި އާސެނަލް އިން ދައްކަމުންދާ ރަނގަޅު ފޯމުގެ އަސްލަކީ ކުޅުންތެރިންގެ މެދުގައި އޮތް އެކުވެރިކަމާއި އެއްބައިވަންތަކަމެވެ
"ޓީމުގެ ކޯޗުގެ ކާމިޔާބަކީ ޓީމު ތެރޭގައި އޮތް ގުޅުމާޢި އެއްބައިވަންތަކަން،" އާޓެޓާ ބުންޏެވެ.
"ވަރަށް އުފާވާކަމެއް މިއީ. އެކަކު އަނެކަކާ އެއްކޮށް ގުޅުން އެބަ ބާއްވާ. އެކަކުގެ ކުރިއެރުމަށް އަނެއްމީހާ އެބަ އެހީވޭ، އެހެންވީމަ މިއީ ހަގީގަތުގައި ޓީމެއް ކާމިޔާބީގެ މަގުގައި ބިނާކުރަން ވެސް ލިބޭ ފަސޭހައެއް،"
މެންޗެސްޓާ ސިޓީގެ އެސިސްޓަންޓް ކޯޗެއްގެ ގޮތުގައި ކޯޗިން ކެރިއަރު ފެށި އާޓެޓާ ބުނީ މި ފަހަރުގެ ލީގުގެ ރޭހުގައި އާސެނަލުން ވާދަކުރަން ޖެހޭ ސިޓީ އަކީ މި ފަދަ ލީގު ހޯދުމުގެ ރޭސްތަކުގެ ތަޖުރިބާގިނަ ކުޅުންތެރިން ހިމެނޭ ސްކޮޑެއް ކަމަށެވެ. އެކަމަކު، އާސެނަލުން ވިސްނުން ބައްޓަން ކުރާނީ އަމިއްލަ ކޮންފިޑެންސްގައި މެޗުތަކުން މޮޅުވެ ލީގު ހޯދުމަށް ކަމަށެވެ.
އިންޓަނޭޝަނަލް ބްރޭކަށް ފަހު އާސެނަލް ލީގުގައި .ކުޅޭ ފުރަތަމަ މެޗުގައި މާދަމާރޭ ކުޅޭނީ އަމިއްލަ ދަނޑުގައި ލީޑްސް ޔުނައިޓެޑާ އެވެ.
