ބަންގްލަދޭޝްގައި ކާބޯތަކެތީގެ އަގު ބޮޑު ކަމަށް ލިޔުނު ނޫސްވެރިއަކު "ދޮގު" ހަބަރު ފަތުރާ ކަމަށް ތުހުމަތުކޮށް، ޖަލުގައި ބަންދުކޮށްފި އެވެ.
ޕްރޯތޯމް އަލޯ ދުވަހު ނޫހުގައި މަސައްކަތް ކުރާ ސަމްސުއްޒަމާން ޝަމްސް ކޯޓަށް ހާޒިރުކުރުމުން، ކަފާލާތުގެ ދަށުން ދޫނުކޮށް، ޖަލަށް ބަދަލުކުރަން އެންގި އެވެ.
ބަންގްލަދޭޝްގެ މިނިވަން ދުވަސް ކަމުގައިވާ މާޗް 26 ވަނަ ދުވަހު ޝާއިއު ކުރި އޭނާގެ ހަބަރު ވައިރަލްވި އެވެ. އެއީ ސަރުކާރުގެ އަގު ވައްޓާލަން ކުރި ކަމެއްގެ ގޮތުގައި ސަރުކާރުން ސިފަކުރެ އެވެ.
އެކްޓިވިސްޓުން ވަނީ ނޫސްވެރިޔާ ހައްޔަރު ކުރުމުން އެކަން ކުށްވެރިކޮށް، ސަރުކާރުން ނޫސްވެރިކަމުގެ މިނިވަން ކަމަށް ހުރަސް އަޅަމުންދާ ކަމަށް ބުނެފަ އެވެ
ރިޕޯޓާޒް ވިތައުޓް ބޯޑާޒްގެ ނޫސްވެރިކަމުގެ މިނިވަންކަމުގެ އިންޑެކްސްގައި ބަންގްލަދޭޝް އޮތީ 180 ގައުމުގެ ތެރެއިން 162 ގަ އެވެ. އެއީ ރަޝިއާ އާއި އަފްގާނިސްތާނަށް ވުރެ ވެސް ދަށް ރޭންކިންއެކެވެ.
ޝަމްސް ލިޔުނު ހަބަރުގައި ވަނީ ގިނަ ބަޔެއްގެ އާއްމު ރައްޔިތުންގެ އާއްމު ދިރިއުޅުމުގެ ވާހަކަ ގެނެސްދީފަ އެވެ. އިންޓަވިއު ދިން އެކަކު ބުނީ "ހަނޑޫކޮޅެއް ވެސް ނުގަނެވޭ" ކަމަށެވެ.
އެ ހަބަރު ޝާއިއު ކުރި ޕްރޯތޯމް އަލޯ ނޫހުގެ އެޑިޓަރު މަތިއޫއް ރަހްމާން އާއި ވީޑިއޯ ޖާނަލިސްޓަކާއި އިތުރު އެހެން ބަޔެއްގެ މައްސަލަ ވެސް ފުލުހުން ދަނީ ތަހުގީގު ކުރަމުންނެވެ.
