ޗައިނާގެ ރައީސް ޝީ ޖިންޕިން ޔޫކްރެއިނަށް ވަޑައިގެންނެވުމަށް ދައުވަތު އަރުވާފައިވާ ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެ އެވެ.
އޭޕީއަށް ދެއްވި ހާއްސަ އިންޓަވިއުއެއްގައި ޒެލެންސްކީ ވިދާޅުވީ ޝީ ޖިންޕިންއާ އެކު މަޝްވަރާ ކުރައްވަން ބޭނުންވާ ކަމަށެވެ.
"ހަނގުރާމަ ފެށުމުގެ ކުރިން ޝީ ޖިންޕިން އާއި އަޅުގަނޑު މަޝްވަރާ ކުރިން. އެކަމަކު މި ފާއިތުވި އަހަރަކަށް ވުރެ ދިގު މުއްދަތުގައި އެންމެ ފަހަރަކު ވެސް ވާހަކަ ނުދެކެވޭ،" ޒެލެންސްކީ ވިދާޅުވި އެވެ.
ޝީ ޖިންޕިން ދާދި ފަހުން ވަނީ ރަޝިއާއަށް ވަޑައިގެން ރައީސް ލެޑިމިއަ ޕުޓިންއާ ބައްދަލުކުރައްވައިފަ އެވެ. އަދި ޔޫކްރެއިން ހަނގުރާމަ ނިންމަން ހުށަހެޅުމެއް ދެއްކެވި އެވެ.
ޗައިނާގެ ހުށަހެޅުމުގައި ގޮވާލަނީ ސުލްހައިގެ މަޝްވަރާ ފެށުމަށާއި ގައުމުތަކުގެ އިސްތިގުލާލަށް އިހްތިރާމް ކުރުމަށެވެ. އެކަމުގެ ތަފްސީލް ހާމަކޮށް ޗައިނާއިން ނެރުނު ލިޔުމުގައި 12 ނުކުތާ ހިމެނެ އެވެ.
ޝީ ޖިންޕިންގެ ދަތުރުފުޅުގައި ރަޝިއާއަށް އެއްވެސް އަސްކަރީ އެހީތެރިކަމެއް ފޯރުކޮށްދިނުމަށް ވާހަކަ ދައްކާފައި ނުވާތީ ޒެލެންސްކީ ވިދާޅުވީ އެއީ ރަނގަޅު ނިޝާނެއް ކަމަށެވެ.
"އޭގެ މާނައަކީ ކޮބައިތޯ؟ އޭގެ މާނައަކީ އެ ދަތުރުން ރަޝިއާއަށް މާ ބޮޑު ފައިދާއެއް ނުކުރެއޭ،" ޒެލެންސްކީ ވިދާޅުވި އެވެ. ޒެލެންސްކީގެ ދައުވަތާ ގުޅޭ ގޮތުން ޗައިނާއިން އަދި ވަކި އެއްޗެއް ނުބުނެ އެވެ.
މީގެ ކުރިން ވެސް ޒެލެންސްކީ ވަނީ ޝީ ޖިންޕިންއާ ބައްދަލުކުރަން ބޭނުންވެވަޑައިގަންނަވާ ކަމަށް ވިދާޅުވެފަ އެވެ. އެކަމަކު އެ ފަހަރު ވެސް ޗައިނާއިން ވަކި އެއްޗެއް ނުބުނެ އެވެ.
