މިޔަންމާގެ އަސްކަރީ ސަރުކާރުގެ ދަށުން ހިންގާ އިލެކްޝަންސް ކޮމިޝަނުން އެ ގައުމުގެ އިންތިހާބީ ލީޑަރު އަންގް ދަން ސޫ ކީގެ ނޭޝަނަލް ލީގް ފޯ ޑިމޮކްރަސީ ޕާޓީ އުވާލަން ނިންމައިފި އެވެ.
އެގޮތަށް ނިންމީ މިޔަންމާގެ ދައުލަތުގެ މީޑިއާއިން ބުނި ގޮތުގައި އަލަށް ތަންފީޒު ކުރަމުންދާ އިންތިހާބާ ބެހޭ ގާނޫނާ އެއްގޮތްވާ ގޮތުގެ މަތިން އެ ޕާޓީ ރީރަޖިސްޓްރީކޮށްފައި ނުވާތީއެވެ.
އެންމެ ފަހުން 2020 ވަނަ އަހަރު މިޔަންމާގައި އޮތް އިންތިހާބު ކާމިޔާބު ކުރީ އެންއެލްޑީ ޕާޓީންނެވެ. އެކަމަކު އެ ޕާޓީން ވޯޓު އޮޅުވާލި ކަމަށް ބުނެ، ފެބްރުއަރީ 2021 ގައި ބަގާވާތް ކުރި އެވެ.
މިދިޔަ ޖެނުއަރީ މަހު އިލެކްޝަންސް ކޮމިޝަނުން ޕާޓީތައް ރަޖިސްޓްރީ ކުރަން ދިނީ ދެ މަހުގެ މުއްދަތެކެވެ. އެއީ ކުރިއަށް އޮތް އިންތިހާބާ ދިމާކޮށް ފާސްކުރި ހަރުކަށި އާ ގާނޫނެއްގެ ދަށުންނެވެ.
އާ އިންތިހާބަކީ މިނިވަން، އިންސާފުވެރި އިންތިހާބަކަށް ހަދާނެ ކަމަށް އަސްކަރީ ސަރުކާރުން ބުނި ނަމަވެސް، އިންތިހާބާ ދިމާކޮށް ހަރުކަށި ގާނޫނެއް ތައާރަފު ކުރުމުން އެއީ ހަގީގީ ވާހަކައެއް ނޫން ކަމަށް ޕާޓީތަކުން ބުނެ އެވެ.
މިޔަންމާގެ 90 ސިޔާސީ ޕާޓީގެ ތެރެއިން އަލުން ރަޖިސްޓްރީ ކުރަން ހުށަހެޅީ 50 ޕާޓީ އެވެ. ބާކީ ހުރިހާ ޕާޓީއެއް އުވާލާނެ ކަމަށް އިލެކްޝަންސް ކޮމިޝަނުން ބުންޏެވެ.
އެންއެލްޑީއަކީ 1988 ވަނަ އަހަރު ސޫ ކީ އުފެއްދި ޕާޓީއެކެވެ. އޭގެ ފަހުން 1990 ވަނަ އަހަރުގެ އިންތިހާބުގައި އެ ޕާޓީއަށް ބޮޑު ކާމިޔާބެއް ލިބުނެވެ. އެކަމަކު އޭރު ވެސް އޮތް އަސްކަރީ ސަރުކާރުން އެ އިންތިހާބުގެ ނަތީޖާ ބާތިލްކުރި އެވެ.
އެ ޕާޓީގެ އަމާޒަކީ މިޔަންމާގައި އޮތް އަސްކަރީ ވެރިކަމާއި ބަގާވާތް ހިންގުމުގެ ތާރީހު ބަދަލުކޮށް، ޑިމޮކްރެޓިކް ވެރިކަމެއް ގާއިމްކުރުމެވެ.
