ޒިއުރިކް، ސްވިޒަލެންޑް (މާޗް 26) - ޕެނަލްޓީގައި ގޯލްކީޕަރުގެ ހަރަކާތްތައް މަދުކޮށް، ޕެނަލްޓީ ޖަހަންދާ ކުޅުންތެރިޔާ އަށް އުނދަގޫ ނުކުރުމަށް ބާރުއަޅާ ގޮތަށް ގޯލްކީޕަރުންގެ އާ ގަވާއިދެއް ނެރެފި އެވެ.
ދުނިޔޭގެ ފުޓްބޯޅައިގެ ގަވާއިދުތައް ކަނޑައަޅާ އިންޓަނޭޝަނަލް ފުޓްބޯލް އެސޯސިއޭޝަން ބޯޑް (އައިފެބް) އިން ފާސްކޮށް އާ ގަވާއިދެއް ނެރުނީ ޕެނަލްޓީ ޖަހާ ކުޅުންތެރިޔާގެ ސަމާލުކަން ގެއްލުވާލުމަށް ކީޕަރުން ގިނަ އުކުޅުތަކެއް ބޭނުންކޮށް މެޗުގެ ނަތީޖާތައް ބަދަލުކޮށްލުމުގައި އޭގެ ބޭނުން ހިފުން އާންމުވެފައިވާ ދަނޑިވަޅެއްގަ އެވެ.
އެންމެ ފަހުން ނިމުނު ފުޓްބޯޅައިގެ އެންމެ ބޮޑު މުބާރާތް ކަމަށްވާ ފީފާ ވޯލްޑްކަޕްގައި ވެސް މި ކަންތައް ވަރަށް ބޮޑަށް ފާހަގަވި އެވެ. އެ ގޮތުން ވޯލްޑް ކަޕްގެ ފައިނަލުން އާޖެންޓީނާ މޮޅުވިއިރު ޕެނަލްޓީ ޝޫޓް އައުޓްގައި އެ ޓީމްގެ ގޯލްކީޕަރު އެމިލިއާނޯ މާޓީނޭޒްގެ ފަރާތުން ފެނުނު ކަންތައްތަކާއި ކުއާޓާ ފައިނަލުގައި ނެދަލޭންޑްސް އަތުން މޮޅުވި މެޗުގެ ޕެނަލްޓީ ޝޫޓް އައުޓްގައި ފެނުނު ކަންތައްތަކަށް ގިނަ ބައެއްގެ ސަމާލުކަން ހުއްޓުނެވެ. މާޓިނޭޒް ވަނީ ޕެނަލްޓީ ޖަހަން އައި ކުޅުންތެރިންގެ ފޯކަސް ގެއްލުވާލައި ސޭވްތަކެއް ކޮށް އާޖެންޓީނާ މޮޅުކޮށްދީފަ އެވެ.
ޕެނަލްޓީ ޝޫޓް އައުޓްގައި ގޯލްކީޕަރުން ބޭނުންކުރާ ތަފާތު އުކުޅުތައް ހުއްޓުވަން އައިފެބް އިން ފާސްކުރި އާ ގަވާއިދުގައިވާ ގޮތުން، ޕެނަލްޓީ ޖެހުން ލަސްކުރަން ގޯލްކީޕަރުންނަށް އެއްވެސް ކަމެއް ނުކުރެވޭނެ އެވެ. އެ ގޮތުން ޝާކުވާ ކުރުމާ ބޯޅަ އަތަށް ލައިގެން ލަސްކުރަން އުޅުން ފަދަ ކަންކަން ނުކުރެވޭނެ އެވެ.
މީގެ އިތުރުން ޕެނަލްޓީ ޖަހާ ކުޅުންތެރިޔާ އަށް އުނދަގޫކުރުމުގެ ގޮތުން ކުރާ ކަންތައްތައް ވެސް މި ގަވާއިދުގެ ދަށުން ވަނީ މަނާކޮށްފަ އެވެ. ބައެއް ފަހަރު ބޯޅަ ދުރަށްލުން ކަހަލަ ކަންކަން ކީޕަރުން ކުރެ އެވެ. މިކަހަލަ ކަންކަން އާ ގާވާއިދުގެ ދަށުން ނުކުރެވެ އެވެ.
ޕެނަލްޓީ ޖަހާ ކުޅުންތެރިޔާގެ ފޯކަސް ނަގާލުމަށް ކީޕަރުން ކުރާ މަސައްކަތުގައި ގޯލުގެ ދަނޑީގައި އަތްލައި އެކި "އާޓު" ދައްކަ އެވެ. އާ ގަވާއިދުގެ ދަށުން ގޯލުގެ ދަނޑީގައި އަތެއް ނުލެވޭނެ އެވެ.
މި އާ ގަވާއިދާ އެކު މަސްހުނި ހިޔާލުތަކެއް ފުޓްބޯޅަ ކުޅުންތެރިން ހިއްސާކުރަމުން އަންނައިރު އެންމެ ބޮޑަށް ނުރުހުން ފާޅުކުރަމުން އަންނަނީ ކީޕަރުންނެވެ. ގިނަ ކީޕަރުން ބުނާ ގޮތުން ޕެނަލްޓީ ޝޫޓް އައުޓްގައި ކީޕަރުންނަށް އޮންނަ ހަމައެކަނި ފުރުސަތަކީ "މައިންޑް ގޭމް" ކަމަށާއި، އެކަން ނުކުރެވޭ ގޮތަށް ނިންމުމަކީ ކީޕަރުންނަށް ކުރެވޭ ބޭ އިންސާފެއް ކަމަށެވެ. މިހާރު ކަންތައްތައް ހިނގާ ގޮތަށް ބަލާނަމަ ބޯޅަ އަށް ފުރަގަސްދީގެން ތިބެން ޖެހޭ ގޮތަސް ވެސް ގަވާއިދު ބަދަލުކޮށްފާނެ ކަމަށް ބައެއް ކީޕަރުން ބުނެފައިވެ އެވެ.
