ބްރައިޓަން (މާޗް 26) - އިނގިރޭސި ޕްރިމިއާ ލީގުގެ ބްރައިޓަން ހޯލްވް އެންޑް އަލްބިއަން އަށް ކުޅެމުން އަންނަ، ޖަޕާނުގެ ވިންގް، ކައޯރޫ މިޓޯމާ ހޯދަން ގިނަ ކްލަބްތަކެއްގެ އޮފާ އަންނަން ފެށުމާ އެކު، އޭނާ ކްލަބްގައި މަޑުކުރުވަން މުސާރަ ބޮޑުކުރަން ބްރައިޓަން އިން ނިންމައިފި އެވެ.
ޖަޕާނުގެ ކަވަސާކީ ފްރޮންޓޭލް އިން ހަތަރު އަހަރުގެ ކޮންޓްރެކްޓެއްގައި މިޓޯމާ، ބްރައިޓަން އަށް ބަދަލުވީ ތިން މިލިއަން ޑޮލަރުގެ އަގަކަށް 2021 ވަނަ އަހަރު އެވެ.
ބްރައިޓަން އިން މިޓޯމާ އަށް ގަވާއިދުން ކުޅުމުގެ ފުރުސަތު ގިނައިން ދިނުމާއި ޑިވެލޮޮޕްމަންޓަށް ބަލައި، އެކި ގޮތްގޮތުން ވިސްނުމަށް ފަހު ނިންމީ އޭނާ ފުރަތަމަ ސީޒަނުގައި ވަނީ ލޯން އުސޫލުން ބެލްޖިއަމްގެ ޔޫނިއަން ސެއިންޓް ގިލޮއިސް އަށް ދޫކޮށްލުމަށެވެ.
ޔޫނިއަން ސެއިންޓް ގިލޮއިސްގައި މިޓޯމާ ވަނީ ރަނގަޅު ތަޖުރިބާތަކެއް ހާސިލްކޮށް ޔޫރަޕްގެ ޕްރެޝަރު ފުޓްބޯޅަ އަށް ހޭނުމުގައި މުހިންމު ފިޔަވަޅެއް ކުރިއަށް އަޅައިފަ އެވެ.
އެކުވެރިކަމުގެ މެޗެއްގެ ތެރެއިން މިޓޯމާ (ކ) އުރުގުއޭގެ ފެޑޭ ވަލްވޭޑޭ ކައިރިން ބޯޅަ ހިފައިގެންދަނީ.
ލޯން ނިންމާލުމަށް ފަހު އެނބުރި އައިސް، މިޓޯމާ، 25، އަންނަނީ ބްރައިޓަން ޓީމުގައި ތަފާތު މޮޅު ކުޅުމެއް ދައްކަމުންނެވެ. ނިމިދިޔަ ފީފާ ވޯލްޑް ކަޕްގައި ޖަޕާން ޓީމުގައި ވެސް މޮޅު ކުޅުމެއް ދެއްކި މިޓޯމާ ވަނީ މި ސީޒަނުގައި މިހާތަނަށް ބްރައިޓަން އަށް 27 މެޗުން ނުވަ ގޯލު ޖަހައި، ހަ ގޯލު ޖަހަން ފުރުސަތު ތަނަވަސްކޮށްދީފަ އެެވެ. މީގެ ތެރެއިން ގިނަ މެޗުތަކުގައި ކުޅެފައި ވަނީ ބަދަލަކަށެވެ.
މިޓޯމާ ގަންނަން މެންޗެސްޓާ ޔުނައިޓެޑާއި އާސެނަލް އަދި ޓޮޓެންހަމް އިން މަސައްކަތް ކުރަމުން އަންނައިރު، ބްރައިޓަންގެ ކޯޗު އިޓަލީގެ ރޮބާޓޯ ޑި ޒާބީގެ އެދުމުގެ މަތިން އެ ކްލަބުން ވަނީ މިޓޯމާގެ މުސާރަ ބޮޑުކުރަން މަޝްވަރާތައް ފަށައިފަ އެވެ.
މި ވަގުތު މިޓޯމާ، ބްރައިޓަންގެ ކޮންޓްރެކްޓްގައި ހުރީ ހަފްތާ އަކު ބޯނަހާ އެކުގައި 30،000 ޑޮލަރު ލިބޭ ގޮތަށެވެ. ބްރައިޓަން އިން ބޭނުންވަނީ ކޮންޓްރެކްޓް އާ ކޮށް މިޓޯމާ އަށް ބޯނަހާ އެކު ތިން ގުނަ ބޮޑު މުސާރަ އެއް ދޭށެވެ.
