އިންޑިއާގެ އިދިކޮޅު ކޮންގްރެސް ޕާޓީގެ ލީޑަރު ރާހުލް ގާންދީ ޕާލަމެންޓުން ޑިސްކޮލިފައި ކުރީ ސިޔާސީ ބޭނުމެއްގައި ކަމަށް އެމަނިކުފާނު ތުހުމަތު ކުރައްވައިފި އެވެ.
ރާހުލް ގާންދީގެ މައްޗަށް ދެ އަހަރުގެ ޖަލު ހުކުމެއް އިއްވިތާ އެއް ދުވަސް ފަހުން އެމަނިކުފާނުގެ ޕާލަމެންޓު ގޮނޑި ގެއްލިފައިވާ ކަމަށް އަންގައި ނޯޓިސް ފޮނުވި އެވެ.
ޕާލަމެންޓުން ފޮނުވި ނޯޓިސްއެއްގައި ބުނީ "ލޮކް ސަބާގެ މެމްބަރުކަމުން ޑިސްކޮލިފައިވެފައިވާ" ކަމަށެވެ. ލޮކް ސަބާއަކީ އިންޑިއާގެ ޕާލަމެންޓުގެ ތިރިގެ އެވެ.
ގުޖަރާތުގެ ކޯޓުން އިދިކޮޅު ލީޑަރާ ދެކޮޅަށް ނިންމީ 2019 ވަނަ އަހަރު އޮތް ކެމްޕެއިން އެއްވުމެއްގެ ތެރެއިން ބޮޑު ވަޒީރު ނަރެންދްރަ މޯދީގެ ނަމާ ބެހޭ ގޮތުން ދެއްކި ވާހަކައަކާ ގުޅިގެންނެވެ.
ވެރިކަން ކުރާ ބަރަތިޔަ ޖަނަތަ ޕާޓީ (ބީޖޭޕީ) އިން ބުނީ ޕާލަމެންޓު ގޮނޑި ގެއްލުނީ އޮންނަ އުސޫލުގެ ތެރެއިން ކަމަށެވެ.
ސުޕްރީމް ކޯޓުން 2013 ވަނަ އަހަރު ނެރުނު އަމުރެއްގައި ބުނީ ކުށެއް ސާބިތުވި ދެ އަހަރަށް ވުރެ ދިގު މުއްދަތެއްގެ ޖަލު ހުކުމެއް ކުރިމަތިވެއްޖެ ނަމަ ވަގުތުން ޕާލަމެންޓު ގޮނޑި ގެއްލޭނެ ކަމަށެވެ.
ހޮނިހިރު ދުވަހު ރާހުލް ގާންދީ ނޫސްވެރިންނަށް ވިދާޅުވީ "އުމުރަށް ޑިސްކޮލިފައި ކުރި ނަމަވެސް، މަސައްކަތް ހުއްޓާ ނުލާނެ" ކަމަށެވެ.
ސިޔާސީ މައްސަލަތަކުގައި އިންޑިއާގެ އިދިކޮޅު ޕާޓީތަކުން އެއްބައިވަނީ މަދު ފަހަރަކު އެވެ. އެހެން ނަމަވެސް ރާހުލް ގާންދީއަށް ހުކުމްކޮށް، ޑިސްކޮލިފައި ކުރުމުން އިދިކޮޅު ޕާޓީތައް ވަނީ އެއްބައިވެފަ އެވެ.
ހުކުރު ދުވަހު 14 ޕާޓީއެއް ގުޅިގެން ސުޕްރީމް ކޯޓަށް ވެއްދި މައްސަލައެއްގައި ބުނީ އިންޑިއާގެ މައި ސަރުކާރުން ތަހުގީގީ އިދާރާތަކުގެ ބޭނުން ނަހަމަ ގޮތުގައި ހިފައި ބީޖޭޕީއާ ވާދަވެރި ފަރާތްތަކަށް ޓާގެޓު ކުރަމުންދާ ކަމަށެވެ.
ކޮންގްރެސް ޕާޓީއިން ތުހުމަތު ކުރާ ގޮތުގައި އެ ޕާޓީގެ ލީޑަރަށް ޓާގެޓު ކުރަމުން ދަނީ މޯދީއާ ގާތް ގުޅުމެއް އޮންނަ މަހުޖަނެއްގެ ކުންފުންޏާ ގުޅޭ ތުހުމަތުތައް ބެލުމަށް ޕާލަމެންޓު ތެރެއިން ބާރު އަޅާތީ ކަމަށެވެ.
ބިލިއަނަރު ގޯތަމް އަދަނީގެ އަދަނީ ގްރޫޕުން ހިއްސާގެ ބާޒާރުގެ އަގުތައް ކޮންޓްރޯލް ކުރަމުން ދިޔަ ކަމަށް އެމެރިކާގެ ދިރާސާ ކުރާ ޖަމިއްޔާއަކުން ދާދި ފަހުން ނެރުނު ރިޕޯޓެއްގައި ބުންޏެވެ.
