އިންސާނުން ދުނިޔޭގައި އުޅެން ފެށީއްސުރެ މޮޅެތި ހިޔާލުތަކާއި އިންގިލާބުކުރަނިވި އުފެންދުންތައް ހުވަފެންތަކުގެ ސަބަބުން އައިސްފައި އެބަހުއްޓެވެ. ކުއެންޓަމް ފިސިކްސްގެ "ބައްޕަ"، ނީލްޒް ބޯ އަށް އެޓޮމްގެ ސްޓްރަކްޗާ ފެނުނީ ހުވަފެނަކުންނެވެ. ފަހާ ފޮށި އުފެއްދި އެލާޔަސް ހައު އަށް އެކަން ހާސިލްވީ، ފޮތީ ތެރެއަށް ތިނޯސް ވަދެގެންދާ ގޮތުގެ މެކޭނިކްސް ސާފުކޮށް ހުވަފެނުން ފެނުމުންނެވެ.
މީގެ އިތުރުން ބައެއް ފަރާތްތަކުން ބުނާ ގޮތުގައި އަލްބާޓް އައިންސްޓައިންގެ މަޝްހޫރު "ތިއަރީ އޮފް ރިލޭޓިވިޓީ" ގެ ހިޔާލު އުފެދުމުގެ ފަހަތުގައި ވެސް ވަނީ ހުވަފެނެކެވެ. ހަމައެޔާއެކު ހުވަފެންތަކުގެ ސަބަބުން އެތައް ބަޔަކަށް ގެއްލުން ވެސް ލިބިފައި އެބަ ހުއްޓެވެ. ހުވަފެންތަކުގެ ސަބަބުން އެތައް ބައެއްގެ ހިތުގައި ރުޅިވެރިކަމާއި ހަސަދަ އުފެދި ކައިވެނިތައް ރޫޅޭ ހިސާބަށް ވެސް ދެ އެވެ.
ކުރުކޮށް ބުނާ ނަމަ ހުވަފެނުން ފައިދާ އާއި ގެއްލުންވެ އެވެ. ނަމަވެސް ގިނައީ އަހަރުމެންނަށް ފެނި ހަނދާން ނެތޭ ހުވަފެނެވެ. އެހެންކަމުން ހުވަފެންތަކުގައި މި ފެންނަ ތަސްވީރުތަކާއި އިވޭ އަޑުތަކާއި ލިބޭ އިހްސާސްތަކުގެ އަސްލަކީ ކޮބައިހެއްޔެވެ؟ މިއީ ނިދުމުން އަހަރުން އެހެން އާލަމަކަށް ކޮށްލާ ޒިޔާރަތެއްހެއްޔެވެ؟ ނޫނީ ސިކުނޑި ނިއްވާލުމުން އަރާ ގްލިޗެއް ހެއްޔެވެ؟
ޒަމާނާއެކު އައި ތަރައްގީއާއި ސައިންޓިފިކް ކުރިއެރުންތަކާއި އެކީ ވެސް މި ސުވާލުތަކުގެ ސީދާ ޖަވާބެއް އެއްވެސް ބަޔަކަށް އަދިވެސް ނުހޯދެ އެވެ. އެނގޭ މިންވަރަކީ ނިދުމުން ހުވަފެން ފެންނަ ވަގުތާއި ހުވަފެން ބަލާ ވަގުތު ހަށިގަނޑަށް އަންނަ ބަދަލުތަކެވެ. ހުވަފެނުގެ ހަގީގަތުގެ ޖަވާބަށް ހުރީ ހުސް "ތިއަރީ" އެވެ.
ހުވަފެނަކީ ކޮބާ؟
ހުވަފެނަކީ އިންސާނާގެ ނިދުމުގެ ހަރުފަތްތަކުގެ ތެރެއިން ބައެއް ހަރުފަތްތަކުގައި ފެންނަ މަންޒަރުތަކާއި އިވޭ އަޑުތަކާއި ކުރެވޭ އިހްސާސްތަކުގެ އިތުރުން އަންނަ ހިޔާލުތަކުގެ ތަޖުރިބާ އެވެ. ހުވަފެނުގެ ބާރު އެންމެ ގަދަވަނީ "ރެޕިޑް އައި މޫވްމެންޓް" ނުވަތަ "އާރްއީއެމް" ހަރުފަތުގަ އެވެ.
ހޭލާ ހުންނަ ވަގުތުގައި އިންސާނުންގެ ހިޔާލުތައް ވަކި ތަރުތީބަކުން އައި ކަމުގައި ވިޔަސް، ހުވަފެނުގައި ފެންނަ ކަންކަމުގައި އެއްވެސް ތަރުތީބެއް ނެތް ހަމަނުޖެހޭ ކަންކަމަށް ވެދާނެ އެވެ. މި ތަޖުރިބާ އާންމުކޮށް ބިނާވަނީ ހޭލާ ހުންނަ ވަގުތު އެމީހެއްގެ ހިޔާލުތަކާއި ކުރާކަންކަމާއި ދައްކާ ވާހަކަތަކުގެ އިތުރުން ދިރިއުޅުމުގެ ކަންކަމަށެވެ.
ކޮންމެ މީހަކަށް ފެންނަ ހުވަފެނުގައި ވެސް މިފަދަ އެއްގޮތް ކަންތައްތަކެއް ހުރުމުން ސައިންޓިސްޓުންގެ މެދުގައި މިކަންކަމާއި ގުޅުވައިގެން ހުވަފެނުގެ ހަގީގަތާއި މެދު އުފެދިފައިވާ ތިއަރި ތަކެއް އެބަވެ އެވެ. މީގެތެރޭގައި ހުވަފެނަކީ ނަފްސާނީ އެހީކަމަށް، ހަނދާންތަކާއި ގުޅޭ ކަމެއް ކަމަށް، ކްރިއޭޓިވް ކަންކަމަސް އެހީއެއް ކަމަށް ނުވަތަ މައުލޫމާތު ތަރުތީބުކުރާކުރުމެއް ކަމަށް އެކި ފަރާތްތަކުންދެކެ އެވެ.
މައުލޫމާތު ތަރުތީބުކުރުން
ބައެއް ސައިންސްވެރިން ގަބޫލު ކުރާގޮތުގައި ހުވަފެނުގެ މައިގަނޑު ބޭނުމަކީ ދުވަހަކަށް ފަހު ދުވަހެއް އަހަރުމެންނަށް ލިބެމުންދާ މައުލޫމާތުތައް ސިކުނޑީގައި ތަރުތީބުކުރުމެވެ. އެލަން ހޮބްސަން އަދި ރޮބާޓް މެކްކާލީގެ "އެކްޓިވޭޝަން ސިންތަސިސް މޮޑެލް އޮފް ޑްރީމިން" ގައި ބުނާ ގޮތުން، ނިދުމުގެ އާރްއީއެމް މަރުހަލާގައި ސިކުނޑީގެ ސާކިޓްތައް އެކްޓިވޭޓްވެ އެވެ. މިކަމުގެ ސަބަބުން ސިކުންޑީގެ ބައެއް ހިސާބުތަކުގައި އިލެކްޓްރިކް އިމްޕަލްސްތަކެއް އުފެދެ އެވެ. ނަތީޖާއަކަށް ވާނީ އެތައް މަންޒަރާއި އަޑުތަކާއި ހިޔާލުތަކަށް ވަރަށް އަވަހަށް ސިކުނޑިއަށް އައުމެވެ. އަހަރުމެން ހޭލުމުން ހުވަފެނެއް ކަމަށް ގަބޫލުކުރެވޭ ތަޖުރިބާ އަކީ މިހުރިހާ މައުލޫމާތުތަކުގެ ތެރެއިން އަހަރުން އަމިއްލައަށް އުފައްދާ ވާހަކައެއް ނުވަތަ ނެރޭޓިވްއެއް ކަމަށް އެފަދަ ސައިންސްވެރިން ދެކެ އެވެ.
ހަނދާންތައް ރައްކާތެރިކޮށްދިނުން
ހުވަފެނާއި ބެހޭގޮތުން އެންމެ މަގުބޫލު އެއް ތިއަރީ އަކީ، ހުވަފެނަކީ ހަނދާން ރައްކާތެރިކޮށްދިނުމަށް ސިކުނޑި ގެންގުޅޭ ނިޒާމެއް ކަމަށެވެ. އެގޮތުން ނިދުމުގެ ކުރިން ދަސްކޮށްފައިވާ މުހިންމު ކަންކަން ހަނދާނުގައި ހަރުކޮށްދީ ބޭކާރުކަމަށް ފެންނަ ހަނދާންތައް ފުހެލާކަމަށް ބުނެ އެވެ. ބައެއް ދިރާސާތަކުން މިކަމަށް ބާރުވެސް ދެއެވެ. އެއް ދިރާސާ އިން ދައްކާ ގޮތުގައި އައު ކަމެއް ނުވަތަ މައުލޫމާތެއް ދަސްކުރުމަށް ފަހު އިރުކޮޅެއްތެރޭ ނިދުމުން އެ މައުލޫމާތު ހަނދާނުގައި ހަރުލާފަ ހުންނަ މިންވަރު އިތުރުވެ އެވެ.
މީގެ އިތުރުން އާރްއީއެމް މަރުހަލާގައި ސިކުނޑީގެ ފްރަންޓަލް ލޯބް ގައި "ތޭޓާ ވޭވްސް" އެކްޓިވްވާ ކަންވެސް ބައެއް ދިރާސާތަކުން ވަނީ ހޯދިފައެވެ. "ތޭޓާ ވޭވްސް" އަކީ އިންސާނުން ކަމަކަށް ހާއްސަ ސަމާލުކަމެއް ދޭ ވަގުތު އެކްޓިވޭޓްވާ ބްރެއިން ވޭވްސް އެވެ. އެގޮތުން ކިޔަވާ ވަގުތު ނޫނީ މަސައްކަތް ކުރާ ވަގުތު މިފަދަ ވޭވްސް އެކްޓިވޭޓް ވެއެވެ.
ކްރިއޭޓިވިޓީ ބޫސްޓް
ހުވަފެނުގެ ބޭނުމަކީ ކްރިއޭޓިވިޓީ އިތުރުކުރުން ނުވަތަ މައްސަލަތަށް ހައްލު ހޯދުން ކަމަށް ވެސް ބައެއް ސައިންސްވެރިން ގަބޫލުކުރެ އެވެ. މި ތިއަރީގައި ބުނާގޮތުން ހުވަފެނީ ދުނިޔޭގައި، އަހަރުމެންގެ އާންމު ދިރިއުޅުމުގައި ކުރިމަތިވާ ޑިސްޓްރެކްޝަންތަކާއި ފިއްތުންތަކުން ސިކުނޑި މިނިވަންވެ، އައު ގޮތްތަކަށް ކަންކަމާއި މެދު ވިސްނާ ހިޔާލުކުރުމަށް މަގު ފަހިވެ އެވެ.
ބައެއް ދިރާސާތަކުން ދައްކާ ގޮތުގައި ހުވަފެނަކީ "ކްރިއޭޓްވިޓީ ބޫސްޓް" އެއްގެ ގޮތުގައި ބޭނުންކުރެވިދާނެ އެވެ. އަދި ބައެއް މީހުން އެމީހުންގެ ހުވަފެނީ ދުނިޔެ ބޭނުންކޮށްގެން އައު ހިޔާލުތައް ހޯދާ މައްސަލަތަށް ހައްލުކުރާކަމަށް ވެސް ބައެއް ސައިންސްވެރިން އިއްތިފާގުވެ އެވެ.
ނިންމުން
އިސްވެ ދިޔަ ތިއަރީ ތަކުގެ އިތުރުން ވެސް އެތައް ތިއަރީ އެއް ހުވަފެނާއި ބެހޭގޮތުން ވާ އިރު، ހަގީގަތަކީ ހުވަފެނުގެ އަސްލު ބޭނުމެއް އަދިވެސް ހޯދިފައި ނުވާކަމެވެ. އަދި ހަގީގަތް ހޯދުމަށް އެތައް އިތުރު ދިރާސާތަކެއް ކުރަން ޖެހޭ ކަމެވެ. މީގެ އިތުރުން މިތަނުން އެއް ތިއަރީ އަކަށް ހުވަފެނުގެ މަގުސަދު ފެއްތުމުގެ ބަދަލުގައި، ހުވަފެނުގައި އެތައް މަގްސަދެއް އޮތުމުގެ ފުރުސަތު ގަބޫލުކުރުމަކީ ވެސް މުހިންމު ކަމެކެވެ.
