އިންޑިއާގެ އިދިކޮޅު ލީޑަރު ރާހުލް ގާންދީގެ މައްޗަށް ދެ އަހަރުގެ ޖަލު ހުކުމެއް އިއްވިތާ އެއް ދުވަސް ފަހުން އެމަނިކުފާނުގެ ޕާލަމެންޓު ގޮނޑި ގެއްލިފައިވާ ކަމަށް ނިންމައިފި އެވެ.
ޕާލަމެންޓުން ފޮނުވި ނޯޓިސްއެއްގައި ބުނީ "ލޮކް ސަބާގެ މެމްބަރުކަމުން ޑިސްކޮލިފައިވެފައިވާ" ކަމަށެވެ. ލޮކް ސަބާއަކީ އިންޑިއާގެ ޕާލަމެންޓުގެ ތިރިގެ އެވެ.
ގުޖަރާތުގެ ކޯޓުން ކޮންގްރެސް ޕާޓީގެ ލީޑަރާ ދެކޮޅަށް ނިންމީ 2019 ވަނަ އަހަރު އޮތް ކެމްޕެއިން އެއްވުމެއްގެ ތެރެއިން ބޮޑު ވަޒީރު ނަރެންދްރަ މޯދީގެ ނަމާ ބެހޭ ގޮތުން ދެއްކި ވާހަކައަކާ ގުޅިގެންނެވެ.
އިދިކޮޅު ކޮންގްރެސް ޕާޓީގެ ލީޑަރުގެ ހައިސިއްޔަތުން ރާހުލް ގާންދީ ލޮކް ސަބާގައި ތަމްސީލް ކުރެއްވީ ކެރަލާ ސްޓޭޓުގެ ވަޔަނަޑް ޑިސްޓްރިކްޓެވެ.
އެމަނިކުފާނު މިހާރު ކަފާލާތުގެ ދަށުން ދޫކޮށްފައި ހުރީ 30 ދުވަހުގެ މުއްދަތަކަށެވެ. އެ މުއްދަތުގައި ހުކުމް އިސްތިއުނާފު ކުރާނެ އެވެ.
ކޮންގްރެސް ޕާޓީއިން ބުނީ ރާހުލް ގާންދީއާ ދެކޮޅަށް ހިންގަނީ ސިޔާސީ މައްސަލައެއް ކަމަށާއި އެއީ ސަރުކާރުގެ "އަނދިރި އަމަލުތައް" ހާމަކުރާތީ ކަމަށޭވެ.
ހުކުރު ދުވަހު ކޮންގްރެސް ޕާޓީގެ އިދިކޮޅު ލީޑަރުން ވެރިރަށް ނިއު ދިއްލީގެ މަގުތަކަށް ނިކުމެ އަޑުއުފުލި އެވެ. ޕާލަމެންޓު ކައިރިއަށް މީހުން އެއްވާތީ އެ ތަނުގެ ސެކިއުރިޓީ އޮތީ ވަރުގަދަކޮށްފަ އެވެ.
އިންޑިއާގެ ނޫސްތަކުން ބުނީ އެއްވުމުގެ ތެރެއިން ބައެއް ޕާލަމެންޓް މެމްބަރުން ހައްޔަރު ކުރި ކަމަށެވެ. އެއްވި މީހުން މަސައްކަތް ކުރީ ރައީސް ދްރޫޕަދީ މުރްމޫގެ ރަސްމީ ގެކޮޅު، ރާޝްތްރަޕަތީ ބަވަން ކައިރިއަށް ދިޔުމަށެވެ.
ކޮންގްރެސް ޕާޓީއިން ތުހުމަތު ކުރާ ގޮތުގައި އެ ޕާޓީގެ ލީޑަރަށް ޓާގެޓު ކުރަމުން ދަނީ މޯދީއާ ގާތް ގުޅުމެއް އޮންނަ މަހުޖަނެއްގެ ކުންފުންޏާ ގުޅޭ ތުހުމަތުތައް ބެލުމަށް ޕާލަމެންޓު ތެރެއިން ބާރު އަޅާތީ ކަމަށެވެ.
ބިލިއަނަރު ގޯތަމް އަދަނީގެ އަދަނީ ގްރޫޕުން ހިއްސާގެ ބާޒާރުގެ އަގުތައް ކޮންޓްރޯލް ކުރަމުން ދިޔަ ކަމަށް އެމެރިކާގެ ދިރާސާ ކުރާ ޖަމިއްޔާއަކުން ދާދި ފަހުން ނެރުނު ރިޕޯޓެއްގައި ބުންޏެވެ.
