ދެކުނު ކޮރެއާގެ ވެރިރަށް ސޯލްގެ ޒޫލަކުން ފިލައިގެން ނިކުތް ޒިބްރާއެއް ގަޑިއިރުތަކެއް ވަންދެން މަގުމަތީގައި އުޅެފި އެވެ.
ސެރޯގެ ނަން ދީފައިވާ ފިރިހެން ޒިބްރާ ބުރާސްފަތި ދުވަހުގެ މެންދުރު ގެއްލުނީ ސޯލްގެ ޗިލްޑްރެންސް ގްރޭންޑް ޕާކް ޒޫއިންނެވެ.
އެ ޒިބްރާ އަލުން ރައްކާތެރިކަމާ އެކު ހިފުމަށް ހިންގި އޮޕަރޭޝަނުގައި ފުލުހުންނާއި އަލިފާން ނިއްވާ އޮފިޝަލުންނާއި ޒޫގެ މުވައްޒަފުން ހަރަކާތްތެރިވި އެވެ.
ޒިބްރާ މަގުމަތީގައި އުޅޭ މަންޒަރު ފެންނަ ވީޑިއޯތައް ވަނީ ސޯޝަލް މީޑިއާގައި އާއްމުވެފަ އެވެ. އޭތި އަލުން ޒޫއަށް ގެންދެވުނީ ތިން ގަޑިއިރު ފަހުންނެވެ.
އެ ޒިބްރާ އުފަންވީ 2021 ވަނަ އަހަރު ސޯލްގެ ޗިލްޑްރެންސް ގްރޭންޑް ޕާކް ޒޫގަ އެވެ. އޭތި ޒޫއިން ނިކުތީ ލަކުޑި ފެންސު ހަލާކުކޮށްލައިގެން ކަމަށް ސޯލްގެ ގްވާންގްޖިން ފަޔާ ސްޓޭޝަނުން ބުންޏެވެ.
ޗިލްޑްރެންސް ގްރޭންޑް ޕާކްގެ ވެބްސައިޓުގައިވާ ގޮތުން އެ ތަނުގައި ތަފާތު 38 ބާވަތެއްގެ 400 އަށް ވުރެ ގިނަ ޖަނަވާރު އުޅެ އެވެ.
