އަބުރާ ބެހުމުގެ ޖިނާއީ މައްސަލައެއްގައި އިންޑިއާގެ އިދިކޮޅު ލީޑަރު ރާހުލް ގާންދީ ދެ އަހަރަށް ޖަލަށް ހުކުމްކޮށްފި އެވެ.
ގުޖަރާތުގެ ކޯޓުން ކޮންގްރެސް ޕާޓީގެ ލީޑަރާ ދެކޮޅަށް ނިންމީ 2019 ވަނަ އަހަރު އޮތް ކެމްޕެއިން އެއްވުމެއްގެ ތެރެއިން ބޮޑު ވަޒީރު ނަރެންދްރަ މޯދީގެ ނަމާ ބެހޭ ގޮތުން ދެއްކި ވާހަކައަކާ ގުޅިގެންނެވެ.
ހުކުމް އިއްވި އަޑުއެހުމަށް ރާހުލް ގާންދީ ކޯޓަށް ވަޑައިގެންނެވި އެވެ. އެމަނިކުފާނު މިހާރު ކަފާލާތުގެ ދަށުން ދޫކޮށްފައި ހުރީ 30 ދުވަހުގެ މުއްދަތަކަށެވެ. އެ މުއްދަތުގައި ހުކުމް އިސްތިއުނާފު ކުރާނެ އެވެ.
ކޮންގްރެސް ޕާޓީއިން ބުނީ ރާހުލް ގާންދީއާ ދެކޮޅަށް ހިންގަނީ ސިޔާސީ މައްސަލައެއް ކަމަށާއި އެއީ ސަރުކާރުގެ "އަނދިރި އަމަލުތައް" ހާމަކުރާތީ ކަމަށޭވެ.
ވެރިކަން ކުރާ ބަރަތިޔަ ޖަނަތަ ޕާޓީ (ބީޖޭޕީ) އިން ބުނީ ގާނޫނީ އިޖުރާއަތުތައް މި މަައްސަލައިގައި ފުރިހަމަކޮށްފައިވާ ކަމަށާއި އެކަމުގައި އެއްވެސް ސިޔާސީ ކަމެއް ނުހިމެނޭ ކަމަށެވެ.
ރާހުލް ގާންދީއާ ދެކޮޅަށް ދައުވާ ކުރީ އެޕްރީލް 2019 ގައި ކަރްނާޓަކާ ސްޓޭޓުގައި އޮތް އެއްވުމެއްގެ ތެރެއިން ދެއްކެވި ވާހަކައަކާ ގުޅިގެންނެވެ.
"މި ހުރިހާ ވަގުންގެ ފަހަތު ނަމަކަށް މޯދީ އޮންނަނީ ކީއްވެގެންތޯ؟ ނިރާވް މޯދީ، ލަލިތު މޯދީ، ނަރެންދްރަ މޯދީ،" އެ އެއްވުމުގެ ތެރެއިން އެމަނިކުފާނު ވިދާޅުވި އެވެ.
ނިރާވް މޯދީއަކީ އިންޑިއާގެ އިދާރާތަކަށް ފިލައިގެން އުޅޭ މަހުޖަނެކެވެ. އަދި ލަލިތު މޯދީއަކީ އިންޑިއާގެ ކްރިކެޓް ބޯޑުން ފިޔަވަޅު އަޅާފައި ހުރި އިންޑިއާ ޕްރިމިއާ ލީގުގެ ކުރީގެ ވެރިޔާ އެވެ.
ރާހުލް ގާންދީ ވިދާޅުވީ އެމަނިކުފާނުގެ ވާހަކަތަކުގެ މަގުސަދަކީ ކޮރަޕްޝަނަށް އަލިއެޅުވުން ކަމަށާއި އެއީ ވަކި ބަޔަކަށް އަމާޒުކޮށް ދެއްކި ވާހަކައެއް ނޫން ކަމަށެވެ.
ކޮންގްރެސް ޕާޓީގެ އިތުރުން އެހެން އިދިކޮޅު ޕާޓީތަކަށް ވެސް ވަނީ ފުލުހުންގެ ތަހުގީގުތަކާއި ކޯޓު މައްސަލަތައް ކުރިމަތިވެފަ އެވެ.
އެގޮތުން ވެރިރަށް ނިއު ދިއްލީގައި ވެރިކަން ކުރާ އާއްމު އާދްމީ ޕާޓީ (އޭއޭޕީ)ގެ ދެ ލީޑަރުން މިހާރުން ވެސް ތިއްބެވީ ކޮރަޕްޝަންގެ ތުހުމަތުގައި ޖަލުގައި ބަންދުކޮށްފަ އެވެ.
އެ ޕާޓީއިން ވެސް ބުނީ ހިންގަނީ ސިޔާސީ މައްސަލަތަކެއް ކަމަށެވެ. އޭގެ އިތުރުން އޭއޭޕީގެ ލީޑަރު އަދި ދިއްލީގެ ޗީފް މިނިސްޓަރު އަރްވިންދް ކެޖްރިވާލް ވަނީ ރާހުލް ގާންދީގެ ދިފާއުގައި ޓްވީޓު ކުރައްވައިފަ އެވެ.
