ހިންދޫ "ނޭޝަނަލިސްޓު" ފިކުތުރަކަށް ފާޑުކިޔައި ޓްވީޓެއް ކުރުމުން އިންޑިއާގައި އެކްޓަރު ޗޭތަން ކުމާރް ދެ ވަނަ ފަހަރަށް ހައްޔަރުކޮށްފި އެވެ.
އަންގާރަ ދުވަހު އޭނާ ހައްޔަރު ކުރީ ހިންދޫ "ނޭޝަނަލިސްޓުން ޕްރޮމޯޓް ކުރާ ފިކުރު ބިނާވެފައި އޮތީ ދޮގުތަކެއްގެ މައްޗަށް" ކަމަށް ބުނެ ޓްވީޓް ކުރުމުންނެވެ.
އިންޑިއާގެ ނޫސްތަކުން ބުނީ ޗޭތަން ކުމާތް ހައްޔަރު ކުރީ ހިންދޫ ނޭޝަނަލިސްޓް ގްރޫޕެއްގެ މެމްބަރަކު ފުލުހުންނަށް ޝަކުވާ ހުށަހެޅުމުން ކަމަށެވެ.
ކަރްނާޓަކާ ސްޓޭޓުގެ ފުލުހުން އޭނާއަށް ތުހުމަތު ކުރަނީ ދީނީ ގޮތުން މީހުން ރުޅިއަރުވަން މަސައްކަތް ކުރުމާއި ދެކޮޅުވެރިކަން އުފައްދަން އުޅުނު ކަމަށެވެ.
އެ ސްޓޭޓުގެ ކޯޓަކުން ވަނީ ދެ ހަފުތާއަށް އޭނާ ބަންދުގައި ބަހައްޓަން ހުއްދަ ދީފަ އެވެ. މީގެ ކުރިން ވެސް އުމުރުން 40 އަހަރުގެ ޗޭތަން ކުމާރް ހައްޔަރުކޮށްފައިވެ އެވެ.
މިދިޔަ އަހަރުގެ ފެބްރުއަރީ މަހު އޭނާ ހައްޔަރު ކުރީ ސްކޫލްތަކުގައި މުސްލިމް އަންހެން ކުދިން ބުރުގާ އެޅުން މަނާކުރި ފަނޑިޔާރަކަށް ފާޑުކިޔައި ޓްވީޓް ކުރުމުންނެވެ.
އެ ފަހަރު އޭނާ ދޫކޮށްލީ ކަފާލާތުގެ ދަށުންނެވެ. އެމެރިކާގެ ރައްޔިތެއް ކަމުގައިވާ ޗޭތަން ކުމާރްއަކީ ފުލްބްރައިޓް ޕްރޮގްރާމު މެދުވެރިކޮށް މަތީ ތައުލީމް ހާސިލްކޮށްގެން ހުރި އެކްޓިވިސްޓެކެވެ.
ދީނީ ކަންކަމާއި ވަކިން ހާއްސަކޮށް ހިންދޫ ދީނުގައި އޮންނަ ދަރަޖަ ކުރުމުގެ "ކާސްޓް" ނިޒާމަށް އޭނާ ފާޑުކިޔާތީ ހިންދޫ ދީނުގެ މީހުން ވަރަށް ގިނައިން ފުލުހުންނަށް ޝަކުވާ ހުށަހަޅަ އެވެ.
އެމެރިކާގެ ޝިކާގޯގައި އުޅެ ބޮޑުވި ޗޭތަން އިންޑިއާއަށް ގޮސް ކަންނާޑާ ފިލްމު އިންޑަސްޓްރީގެ ތެރެއަށް ވަނީ 2005 ވަނަ އަހަރު އެވެ.
ދެހާސް ހަތް ވަނަ އަހަރު އޭނާ ކުޅުނު ފިލްމު "އާ ދިނަގަލު" އަކީ ބޮޑު ކާމިޔާބެއް ލިބުނު ފިލްމެކެވެ. އެ އަހަރު ކަރްނާޓަކާ ސްޓޭޓުގެ ޓީވީ އެވޯޑެއް ވެސް އޭނާއަށް ލިބުނެވެ.
އޭގެ ފަހުން އޭނާ ވަނީ 10 ފިލްމުން ފެނިގެން ގޮސްފަ އެވެ. ފިލްމު ކުޅެމުން ދިޔަ ނަމަވެސް އޭނާގެ މައިގަނޑު މަސައްކަތަކީ ތަފާތު ކުރުން ނައްތާލުމަށް އަޑުއުފުލުން ކަމަށް ޗޭތަން ކުމާރް ބުނެ އެވެ.
