ލަންޑަން (މާޗް 22) - އިނގިރޭސި ޕްރިމިއާ ލީގުގުގެ މެޗުތަކުގެ ތެރެއިން ކުޅުންތެރިއަކު ރޯދަ ވީއްލަން ބޭނުންނަމަ އެ ފުރުސަތު ދިނުމުގެ ގޮތުން މެޗު މެދުކަނޑާލުމުގެ އިހުތިޔާރު ރެފްރީންނަށް ދޭން ޕްރިމިއާ ލީގުގެ ބޯޑުން ނިންމައިފި އެވެ.
މާދަމާ އިން ފެށިގެން އަންނަ މަހުގެ 21 ވަނަ ދުވަހާ ހަމަ އަށް ބަރަކާތްތެރި ރަމަޟާން މަހުގެ ދުވަސްތައް ކުރިއަށްދާއިރު، މި މުއްދަތުގެ ތެރޭގައި އިނގިރޭސި ޕްރިމިއާ ލީގުގެ މުހިންމު މެޗުތަކެއް އެބަހުއްޓެވެ. ޕްރިމިއާ ލީގުގެ ކްލަބްތަކުގައި ރޯދަ ހިފައިގެން މެޗު ކުޅޭ ކުޅުންތެރިން ގިނަ އެވެ.
އިނގިރޭސި ފުޓްބޯޅައިގެ ރެފްރީންގެ ކަންކަން ބަލަހައްޓާ ޕްރޮފެޝަނަލް ގޭމްސް އޮފިޝަލްސް ލިމިޓެޑް (ޕީޖީއެމްއޯއެލް) އިން ނިންމާފައިވަނީ، ރޯދަ ހިފައިގެން މެޗުތަކުގައި ކުޅޭ ކުޅުންތެރިންނަށް، މެޗުތަކުގެ ތެރެއިން ރޯދަ ވިއްލާ ވަގުުތު ޖެހިއްޖެނަމަ އެ ފުރުސަތު ދޭން މެޗު މެދުކަނޑާލުމަށެވެ. މިއީ، ރަސްމީ ސިފައެއްގައި ރޯދަ ވިއްލުމަށް މި ގޮތަށް ފުރުސަތު ދޭން ޔޫރަޕްގެ މަޝްހޫރު ފުޓްބޯޅަ ލީގެއްގެ ބޯޑަކުން ނިންމި ފުރަތަމަ ފަހަރެވެ.
މިދިޔަ އަހަރު އޭޕްރީލް މަހުގައި ރޯދަ ހިފައިގެން ޕްރިމިއާ ލީގުގެ މެޗެއް ކުޅެމުންދިޔަ، އޭރު، ލެސްޓާ ސިޓީގެ ޑިފެންޑަރު، ވެސްލީ ފޮފާނާ އާއި ކްރިސްޓަލް ޕެލަސްގެ މިޑްފީލްޑަރު، ޗެއިކޫ ކުޔާޓޭ ރޯދަ ވިއްލަން ފުރުސަތު ދޭން އެ މެޗުގެ ހުއްޓާލި އެވެ. ދަނޑުގެ އަރިމަތީގައި ހުރެ، ފޮފާނާ އާއި ކުޔާޓޭ އަށް ރޯދަ ވިއްލަން ވަގުތު ދިނުމުގެ ގޮތުން ޕެލަސްގެ ކީޕަރު ވިސެންޓޭ ގައީޓާ ވަނީ ގޯލް ކިކް ޖެހުން ލަސްކޮށްލައިފަ އެވެ.
ގައީޓާގެ އެ ނިންމުމަށް އިހުތިރާމް ކުރުމުގެ ގޮތުން އެ މެޗުގެ ރެފްރީ ވެސް ވަނީ ރޯދަ ވިއްލަން އެ ވަގުތު ދޭން ނިންމައިފަ އެވެ.
އެ މެޗަށް ފަހު ފޮފާނާ ވަނީ ޕްރިމިއާ ލީގަށް ޝުކުރު އަދާކޮށްފަ އެވެ.
ޕްރިމިއާ ލީގުގެ އިތުރުން ޖަރުމަނު ލީގުގައި ވެސް އޮފިޝަލަކު ވަނީ މިދިޔަ އަހަރު މެޗެއްގެ ތެރެއިން ކުޅުންތެރިއަކު ރޯދަ ވިއްލަން ވަގުތު ދީފަ އެވެ. އެއީ މިދިޔަ އަހަރު އޭޕްރީލް މަހު ޖަރުމަނު ލީގުގައި މައިންޒް ކުޅުނު މެޗެއްގެ ތެރެއިން އެ ޓީމުގެ ޑިފެންޑަރު، މޫސާ ނިއަކާޓޭ ފެންފޮދަކުން ރޯދަ ވިއްލަން ވަގުތު ދޭން ޖަރުމަނުގެ ރެފްރީ މަތިއަސް ޖޮލެންބެކް ނިންމި ނިންމުމެކެވެ.
