ލަންޑަން (މާޗް 19) - އިނގިރޭސި ޕްރިމިއާ ލީގުގައި މިރޭ ކްރިސްޓަލް ޕެލަސް 4-1 އިން ބަލިކޮށް އާސެނަލުން ލީގުގެ އެއް ވަނައިގައި އަށް ޕޮއިންޓަށް ލީޑުފުޅާކޮށްފި އެވެ.
މި ހަފްތާގައި ސިޓީން އެފްއޭ ކަޕްގައި ކުޅެން ޖެހޭ މެޗު އޮތުމުން ލީގުގެ ކުރީގައި ލީޑުފުޅާކުރަން ލިބުނު ފުރުސަތުގެ ބޭނުން އާސެނަލުން މި ވަނީ ރަނގަޅަށް ހިފައިފަ އެވެ. އާސެނަލަށް 28 މެޗުން 69 ޕޮއިންޓް ލިބިފައިވާއިރު، އެއް މެޗު މަދުން ކުޅެފައިވާ މެންޗެސްޓާ ސިޓީގެ އޮތީ 27 މެޗުން 61 ޕޮއިންޓެވެ.
އާސެނަލްގެ އެމިރޭޓްސް ސްޓޭޑިއަމްގައި މިރޭ ކުޅުނު މެޗުގެ 28 ވަނަ މިނިޓްގައި ބުކާޔޯ ސަކާ ދިން ބޯޅައަކުން އާސެނަލަށް ލީޑުނަގައިިދިނީ ގަބްރިއެލް މާޓިނޭލީ އެވެ. އޭގެ ކުރިން، ޕެލަސް އަށް ލީޑުނަގައިދޭން ވިލްފްރިއެޑް ޒަހާ ޖެހި ބޯޅަ އާސެނަލް ކީޕަރު އާރޮން ރަމްސްޑޭލް އަތުގަޔާއި ދަނޑީގައި ޖެހިފައި ބޭރުވީ ކޯނަރަކަށެވެ.
ފުރަތަމަ ހާފު ނިމެން ދެ މިނިޓަށް ވެފައި ވަނިކޮށް، ސަކާ ވަނީ ޕެލަސްގެ 19 އަހަރުގެ ކީޕަރު، ޖޯ ވިޓުވޯތު ކައިރިން ގޯލެއް ޖަހައި، އެ ޓީމަށް ލީޑުފުޅާކޮށްދީފަ އެވެ.
ދެ ވަނަ ހާފްގެ ކުޅުން ފެށިތާ 10 މިނިޓް ތެރޭ، ލެއަންޑްރޯ ޓްރޮސާޑް ހުސްކޮށްލާފައި ދިން ބޯޅައަކުން ގްރޭނިޓް ޝަކާ އާސެނަލްގެ ތިން ވަނަ ގޯލު ޖަހައި، އެ ޓީމަށް ހަމަޖެހުމެއް ހޯދައިދިނެވެ. އެކަމަކު، މެޗުގެ 63 ވަނަ މިނިޓްގައި އާސެނަލްގެ އޭރިއާތެރެއަށް ދޫވި ބޯޅައެއް ހޯދައި ޖެފްރީ ޝްލަޕް ވަނީ ޕެލަސް އަށް ގޯލެއް ޖަހައިދީފަ އެވެ.
އާސެނަލަށް މެޗުގެ ތިން ޕޮއިންޓް ކަށަވަރުކޮށްދިން ލަނޑު ޖެހީ 74 ވަނަ މިނިޓްގައި ސަކާ އެވެ. މިއީ ބަދަލަކަށް ކުޅެން އެރި، ކިއެރަން ޓިއެރަނީ އޭރިއާތެރެެއަށް ނެގި ހުރަހެއް އެއް ފަހަރުން ގޯލުގެ ކައިރީ ކަނަށް ފޮނުވާލައިގެން ސަކާ ޖެހި ގޯލެކެވެ. ސަކާ އަކީ މި ފަހަރު ލީގުގައި މަދުވެގެން 10 ގޯލު ޖަހައި، 10 ގޯލު ޖަހަން ފުރުސަތު ތަނަވަަސްކޮށްދިން ފުރަަތަމަ ކުޅުންތެރިޔާ އެވެ.
ލީގުގެ އެއް ވަނައިގައި އާސެނަލް ރަނގަޅު ލީޑަކާ އެކު އޮތްއިރު، 2004 ވަނަ އަހަރުގެ ފަހުން ލީގު ތަށްޓެއް ހޯދަން މަސައްކަތް ކުރަމުން އަންނަ އާސެނަލަށް ދެން ލީގުގައި ބާކީ އޮތީ 10 މެޗެވެ. އާސެނަލްގެ ކޯޗު މިކޭލް އާޓެޓާ ބުނީ ކުރިއަށް އޮތް ކޮންމެ މެޗަކީ ވެސް ފައިނަލެއް ކަމަށެވެ.
