ލަންޑަން (މާޗް 17) - ޔުއެފާ ޔޫރޮޕާ ލީގުގައި ރޭ ކުޅުނު ގަދަ 16 ބުރުގެ މެޗުތަކުން މޮޅުވެ، މެންޗެސްޓާ ޔުނައިޓެޑާއި ޔުވެންޓަސް މުބާރާތުގެ ކުއާޓާ ފައިނަލުން ޖާގަ ހޯދިއިރު، އަމިއްލަ ދަނޑުގައި ޕެނަލްޓީ ޖަހައިގެން ސްޕޯޓިން ލިޒްބަންގެ އަތްދަށުވެ، އާސެނަލް މުބާރާތުން ކަޓައިފި އެވެ.
ފުރަތަމަ ލެގުގައި އަމިއްލަ ދަނޑުގައި 4-1 އިން ރެއާލް ބެޓިސް އަތުން މޮޅުވި ޔުނައިޓެޑް ރޭ ވަނީ ރަށުންބޭރުގައި 1-0 އިން ބެޓިސް ބަލިކޮށްފަ އެވެ. ޖަރުމަނުގެ ފްރެއިބާގް އަތުން ރަށުންބޭރުގައި ޔުވެންޓަސް ވަނީ 2-0 އިން މޮޅުވެ، ޖުމްލަ އެގްރިގޭޓުން 3-0 އިން ކުރިހޯދައިފަ އެވެ.
ސްޕޯޓިން ދަނޑުގައި 2-2 އިން މިދިޔަ ހަފްތާގައި އެއްވަރުވިއިރު، ރޭ އާސެނަލް ދަނޑުގައި 120 މިނިޓް ކުޅުން ނިމުނުއިރު، އޮތީ 1-1 އިން އެއްވަރުވެފަ އެވެ. ޕެނަލްޓީގައި ސްޕޯޓިން ކުރިހޯދީ 5-3 އިންނެވެ.
ޔުނައިޓެޑުން ރޭ ބެޓިސް ކޮޅަށް ޖެހި ހަމައެކަނި ލަނޑު ކާމިޔާބުކުރީ 55 ވަނަ މިނިޓްގަ އެވެ. މިއީ ކަސެމިރޯ ދިން ބޯޅައެއް ކޮންޓްރޯލް ކުރުމަށް ފަހު އޭރިއާބޭރުން ގޯލުގެ ދުރު ކަނަށް ފޮނުވާލައިގެން މާކަސް ރަޝްފޯޑް ޖެހި ގޯލެކެވެ. މި ގޯލު ޖެހުމުގެ ކުރިން ރަޝްފޯޑަށް ލިބުނު ފުރުސަތުގައި އޭނާ ޖެހި ބޯޅަ ދިޔައީ ހުރަސްދަނޑިމަތިންނެވެ.
މި ގޯލާ އެކު ރަޝްފޯޑް ވަނީ ޔޫރަޕްގެ މުބާރާތްތަކުގައި ޔުނައިޓެޑަށް 64 މެޗުން 25 ގޯލު ޖަހައިފަ އެވެ. އޭނާ އަކީ ޔުނައިޓެޑަށް ކުޅެމުން އެންމެ މަދު މެޗު ކުޅެގެން އެ އަދަދަށް ގޯލު ޖެހި ކުޅުންތެރިޔާ އެވެ. އަނެއްކޮޅުން ޔުނައިޓެޑުން މި ވަނީ ގިނަ އަހަރުތަކަކަށް ފަހު، ޔޫރަޕްގެ މުބާރާތެއްގެ ނޮކައުޓް ބުުރުުގައި ޖެހިޖެހިގެން ދެ މެޗުން ސްޕެއިންގެ ޓީމުތައް ކަޓުވާލައިފަ އެވެ.
ރޭގެ މެޗުގައި ލަނޑު ޖެހުމަށް ފަހު ޔުނައިޓެޑްގެ ރަޝްފޯޑް އުފާފާޅުކުރަނީ.
ފްރައިބާގްގެ މެނުއަލް ގަލްޑޭ އަށް ރަތް ކާޑު ދެއްކި މެޗުގައި ރޭ ޔުވެންޓަސްގެ ގޯލުތައް ޖެހީ ޕެނަލްޓީ އަކުން ޑޫސާން ވްލަހޯވިޗް އާއި މެޗުގެ އިތުރު ވަގުތުގައި ފެޑެރީކޯ ކިއޭސާ އެވެ.
އަމިއްލަ ދަނޑުގައި ކުޅުނު އާސެނަލް އިން ރޭގެ މެޗުގެ 19 ވަނަ މިނިޓްގައި ލީޑުނެގީ އޭރިއާތެރެއިން ލިބުނު ރީބައުންސް ބޯޅައެއް ގޯލުގެ މަތީ ކަނަށް ފޮނުވާލައިގެން ގްރޭނިޓް ޝަކާ އެވެ. ސްޕޯޓިން ލިޒްބަން އިން އެއްވަރުކުރީ ހާފުގެ މެދުރޮނގާ ހަމައިން ކުޑަތަންކޮޅެއް ކުރިއަށް ޖެހުމަށްފަހު ޕެޑްރޯ ގޮންކާލްވޭސް ޖެހި ގޯލުންނެވެ. އެ ބޯޅަ ގޯލަށް ވަނީ ކުރިއަށް އަރައި ހުރި އާސެނަލްގެ ކީޕަރު އާރޮން ރަމްސްޑޭލް ބޯމަތިން ގޮހެވެ.
ބާކީ ވަގުތުގައި އާސެނަލާއި ސްޕޯޓިން އަށް އިތުރު ގޯލެއް ނުޖެހި ޕެނަލްޓީގައި ނަތީޖާ ނެރެން ޖެހުނުއިރު، ސްޕޯޓިން މޮޅުވީ ފަސް ޕެނަލްޓީ ވެސް ކާމިޔާބު ކޮށްގެންނެވެ. އާސެނަލަށް ހަތަރު ޕެނަލްޓީގެ ތެރެއިން ނާކާމިޔާބުވީ ގަބްރިއެލް މާޓީނެލީ ފޮނުވާލި އެ ޓީމުގެ ހަތަރު ވަނަ ޕެނަލްޓީ އެވެ. އާސެނަލުން ޕެނަލްޓީ ކާމިޔާބުކުރީ މާޓީން އޮޑެގާޑް، ބުކާޔޯ ސަކާ، ލެއަންޑްރޯ ޓްރޮސާޑް އެވެ. ސްޕޯޓިންގެ ޕެނަލްޓީތައް ވައްދާލީ ޔެރެމިއާ ޖޫސްޓޭ، ރިކާޑޯ އެސްގާއިއޯ، ގޮންކާލޯ އިނާޝިއޯ، އާތޫރު ގޯމޭސް އަދި ނޫނޯ ސަންޓޯސް އެވެ.
ޔުނައިޓެޑާއި ޔުވެންޓަސް އަދި ސްޕޯޓިން ލިޒްބަންގެ އިތުރުން ދެން ކުއާޓާ ފައިނަލުން ފުުރުސަތު ހޯދީ ޖަރުމަނުގެ ބަޔާ ލެވަކޫސަން، އިޓަލީގެ ރޯމާ، ބެލްޖިއަމްގެ ޔޫނިއަން ސެއިންޓް ގިލޯއިސް، ސްޕެއިނުގެ ސެވިއްޔާ އަދި ނެދަލެންޑްސްގެ ފެޔަނޫޑް އެވެ.
