ލަންޑަން (މާޗު 14) - އިނގިރޭސި ޕްރިމިއާ ލީގުގައި މިދިޔަ ހޮނިހިރު ދުވަހުގެ ރޭ މެންޗެސްޓާ ޔުނައިޓެޑް އާއި ސައުތެމްޓަން ބައްދަލުކުރި މެޗުގައި ޔުނައިޓެޑްގެ ބްރެޒިލް މިޑްފީލްޑަރު ކަސެމީރޯ އަށް ދެއްކި ރަތް ކާޑު އެޕީލްނުކުރަން އެ ކްލަބުން ނިންމައިފި އެވެ.
ޔުނައިޓެޑްގެ ދަނޑުގައި ލަނޑެއް ނުޖެހި އެއްވަރުވި މެޗުގެ ފުރަތަމަ ހާފުގައި ސައުތެމްޓަންގެ ކާލޮސް އަލްކަރާޒަށް ކަސެމީރޯ ކުރި ޓެކަލްއަކާ ގުޅިގެން ރެފްރީ އެންތަނީ ޓޭލާ އެންމެ ފުރަތަމަ ދެއްކީ ރީނދޫ ކާޑެކެވެ. އެހެން ނަމަވެސް، ފަހުން ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު، ރެފްރީ ޓޭލާ ވަނީ އޭނާގެ ނިންމުން ސީދާ ރަތް ކާޑަކަށް ބަދަލުކޮށްފަ އެވެ.
ސީދާ ރަތްކާޑުގެ ސަބަބުން، ކަސެމީރޯ ހަތަރު މެޗަށް ސަސްޕެންޑްވާނެ އެވެ. ސީދާ ރަތް ކާޑަކާ އެކު ތިން މެޗުގެ ސަސްޕެންޝަނެއް އަންނަ ގޮތަށް އޮތް ނަމަވެސް، މިއީ މި ސީޒަންގައި ކަސިމޭރޯ އަށް ދެއްކި ދެ ވަނަ ރަތް ކާޑު ކަމަށްވާތީ ކަސެމީރޯގެ ސަސްޕެންޝަނަށް އެއް މެޗު ވަނީ އިތުުރުވެފަ އެވެ.
މި ސަސްޕެންޝަނާ ގުޅިގެން އެފްއޭ ކަޕްގެ ކުއާޓާ ފައިނަލްގައި ފުލަމްއާ ދެކޮޅަށް ކުޅޭ މެޗާއި ޕްރިމިއާ ލީގުގައި ނިއުކާސަލް، އެވަޓަން އަދި ބްރެންޓްފޯޑާ ދެކޮޅަށް ޔުނައިޓެޑް ކުޅޭ މެޗުތަކުގައި ކަސެމީރޯ އަށް ނުކުޅެވޭނެ އެވެ.
ޔުނައިޓެޑް ރަތްކާޑަށް އެޕީލްނުކުރި އެންމެ ބޮޑު ސަބަބަކީ އެޕީލް ކާމިޔާބުވާނެކަމުގެ ފުރުސަތު ކުޑަވުމެވެ.
ޔުނައިޓެޑްގެ ކޯޗު އެރިކް ޓެން ހާގް ވަނީ މެޗަށް ފަހު ކަސެމީރޯ އަށް ދެއްކި ރަތްކާޑާމެދު ހިތްހަމަނުޖެހުން ފާޅުކޮށްފައެވެ.
"ޔޫރަޕްގައި 500 މެޗު ކުޅުނުއިރު، ކަސެމީރޯ އަށް އެންމެ ރަތްކާޑެއް ނުދައްކާ. އެކަމަކު މިހާރު އޭނާ ދެ ރަތްކާޑު ހޯދައިިފި. ކަސެމީރޯ އަކީ ވަރުގަދަކޮށް ކުޅޭ ކުޅުންތެރިއެއް. އެކަމަކު އޭނާ އަކީ ފެއާ ކުޅުންތެރިއެއް،" ޓެން ހާގް ބުންޏެވެ. "ރީޕްލޭ ސްލޯކޮށްގެން ބަލާއިރު، މަންޒަރު ވަރަށް ތަފާތުވާނެ. ފުޓްބޯޅަ އެނގޭ މީހުންނަށް ބަލާފައި އެނގޭނެ ގޯސް ފައުލެއްވެއްޖެއްޔާ،"
ރެއާލް މެޑްރިޑަށް ކަސެމީރޯ ކުޅުނު 336 މެޗުން އެންމެ ރަތް ކާޑެއް ވެސް ދައްކާފައިނުވެ އެވެ. އެކަމަކު، ޔުނައިޓެޑަށް ކުޅެދިން 37 މެޗުގައި ކަސެމީރޯ މި ވަނީ ދެ ރަތް ކާޑު ހޯދައިފަ އެވެ.
