މާލޭ ރައްޔިތުންނަށް ބޯހިޔާވަހިކަން ފޯރުކޮށްދިނުމަށް ރައީސް އިބްރާހިމް މުހައްމަދު ސޯލިހު ވެފައިވާ ވައުދާ އެއްގޮތަށް ލަސްނުކޮށް އެ ވައުދު ފުއްދުމަށް ގޮވާލާ ރައްޔިތުންގެ މަޖިލީހަށް ގަރާރެއް ހުށަހަޅައިފި އެވެ.
މެދު ހެންވެއިރު ދާއިރާގެ މެންބަރު އަލީ އާޒިމް ހުށަހެޅުއްވި ގަރާރުގައި ވަނީ 2018 ވަނަ އަހަރު ރިޔާސީ ކެނޑިޑޭޓެއްގެ ގޮތުގައި ހުންނަވައިގެން ވިދާޅުވި ނަމަވެސް ރައީސް ސޯލިހުގެ ވެރިކަމުގެ ދައުރު ހަމަވާން ގާތްވެފައިވާއިރު މާލޭގެ އެއްވެސް ރައްޔިތަކަށް ގޯއްޗެއް ވެސް އަދި ފްލެޓެއް ވެސް ދީފައި ނުވާ ކަން ފާހަގަކޮށްފަ އެވެ.
އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދުގެ "ފިކުރެއްގެ ދިރުން" ފެކްޝަނުގެ އާޒިމް ހުށަހެޅުއްވި ގަރާރުގައި ވަނީ ރިޔާސީ އިންތިހާބާ ގުޅިގެން ބައެއް މަޖިލިސް މެންބަރުންނާއި މިނިސްޓަރުން މާލެ ރައްޔިތުންގެ ގޭގެއަށް ވަޑައިގެން އެއްވެސް އުސޫލެއް ނެތި ފްލެޓު ދޭނެ ކަމަށް ވިދާޅުވެ ވޯޓު ހޯދުމުގެ ނިޔަތުގައި އޮޅުވާލަމުން ގެންދާ ކަމަށް ވެސް ތުހުމަތުކޮށްފަ އެވެ.
އަދި، ސަރުކާރުން މިހާރު ހުޅުވާލާފައިވާ "ބިންވެރިޔާ"އާއި "ގެދޮރުވެރިޔާ" ސްކީމުން ބޯހިޔާވަހިކަން ލިބޭ ފަރާތްތައް ކަނޑައެޅުމަށް އެކުލަވާލާފައިވާ ކޮމިޓީގެ މަސައްކަތްތައް ދެފުށް ފެންނަ ގޮތަށް ކުރުމަށް ވެސް ގޮވާލާފައިވެ އެވެ.
ގޯއްޗާއި ފްލެޓަށް ކުރިމަތިލުމަށް ސަރުކާރުން ހުޅުވާލީ މިދިޔަ ޖޫން 26 ވަނަ ދުވަހު އެވެ. މިހާރު ނިންމާފައި ވަނީ ހުޅުމާލޭން 1،000 ގޯތީގެ އިތުރުން، ގުޅީފަޅުން 2،000 ގޯއްޗާއި އަދި ގިރާވަރު ފަޅު ހިއްކާ އެ ބިމުން މަދުވެގެން 2,000 ގޯތި މާލޭ ރަށްވެހިންނަށް ދިނުމަށެވެ. އެ 5،000 ގޯތީގެ ތެރެއިން ފުރަތަމަ ބުރުގައި ދޫކުރާނީ 3،000 ގޯއްޗެވެ.
މިދިޔަ އޮކްޓޫބަރު މަހުގެ 15 ވަނަ ދުވަހަށް އެ މުއްދަތު ހަމަވި އިރު، ބިންވެރިޔާ ސްކީމްގެ ދަށުން ދޫކުރުމަށް ކަނޑައެޅި 3000 ގޯއްޗަށް އެދި ޖުމްލަ 15،164 މީހުން ހުށަހަޅާފައިވެ އެވެ. އަދި ގެދޮރުވެރިޔާ ސްކީމްގެ ދަށުން ދޫކުރުމަށް ކަނޑައެޅި 4000 ފުލެޓަށް އެދި 20،697 މީހުން ހުށަހަޅާފައިވެ އެވެ.
ޕްލޭނިން މިނިސްޓްރީން މީގެ ކުރިން ހާމަކޮށްފައިވާ ގޮތުގައި މި ދެ ސްކީމުގެ ދަށުން ވެސް ބޯހިޔާވަހިކަން ލިބޭ މީހުންގެ ވަގުތީ ލިސްޓު މާޗު މަހު އާންމު ކުރެވޭނެ ކަމަށެވެ.
ބިންވެރިޔާ ސްކީމްގެ ދަށުން މާލެ ސަރަހައްދުން ދޫކުރުމަށް ހަމަޖެހިފައިވާ 3000 ގޯތީގެ ތެރެއިން ހުޅުމާލެއިން ދޫކުރާ 1000 ގޯތި ދިނުމަށް އެޗްޑީސީން ވަނީ ހުޅުމާލޭގެ ދެވަނަ ފިޔަވަހީގެ 62 ސަރަހައްދަކުން 1.25 މިލިއަން އަކަފޫޓުގެ ބިން ކަނޑައަޅާފަ އެވެ.
އެމްޑީޕީގެ އެތެރޭގައި އުފެދިފައިވާ ހިޔާލުތަފާތުވުންތަކާއެކު އެ ޕާޓީގެ ރައީސް މުހައްމަދު ނަޝީދަށް ތާއީދު ކުރައްވާ މެންބަރުން އަންނަނީ ސަރުކާރާ ދެކޮޅު ގަރާރުތައް މަޖިލީހަށް ހުށަހަޅަމުންނެވެ.
