މެންޗެސްޓާ (މާޗް 10) - ޔުއެފާ ޔޫރޮޕާ ލީގުގެ ގަދަ 16 ބުރުގެ ފުރަތަމަ ލެގުގައި މެންޗެސްޓާ ޔުނައިޓެޑާއި ޔުވެންޓަސް މޮޅުވިއިރު، އާސެނަލް ކުޅުނު މެޗުން އެއްވަރުވެއްޖެ އެވެ.
އަމިއްލަ ދަނޑުގައި ރެއާލް ބެޓިސް އަތުން ޔުނައިޓެޑް ވަނީ 4-1 އިން މޮޅުވެފަ އެވެ. ފްރައިބާގްގެ މައްޗަށް ޔުވެންޓަސް އިން 1-0 އިން ކުރިހޯދިއިރު، ރަށުންބޭރުގައި ސްޕޯޓިން ލިޒްބަންއާ ކުޅެގެން އާސެނަލް ވަނީ 2-2 އިން އެއްވަރުވެފަ އެވެ.
ޔުނައިޓެޑްގެ މާކަސް ރެޝްފޯޑް ވަނީ ހަ ވަނަ މިނިޓްގައި އެ ޓީމަށް ލީޑުނަގައިދީފަ އެވެ. އެކަމަކު، މެޗުގެ 32 ވަނަ މިނިޓްގައި ބެޓިސް އަށް ކުޅޭ އަޔޯޒީ ޕެރޭޒް ވަނީ އެ ޓީމަށް ހަމަހަމަކޮށްދީފަ އެވެ. އަދި ފުރަތަމަ ހާފު ނިމުމުގެ ކުރިން ޔުނައިޓެޑްގެ ގޯލްކީޕަރު ޑޭވިޑް ޑެހެއާ އަށް ހެދުނު ގޯހެއްގެ ފައިދާނަގައި، ބެޓިސް އަށް ލީޑުނަގައިދޭން އަޔޯޒީ ޕެރޭޒަށް ލިބުނު ފުރުސަތުގައި ކުރި އެޓޭކުގައި ބޯޅަ އަމާޒުވީ ގޯލުގެ ދަނޑިއަށެވެ.
މެޗުން ޔުނައިޓެޑް މޮޅުވީ ދެ ވަނަ ހާފުގެ ގޯލުތަކާ އެކު އެވެ. އެ ގޮތުން، އެ ޓީމުން ވަނީ ދެ ވަނަ ހާފުގައި އިތުރު ތިން ލަނޑު ޖަހައިފަ އެވެ. ދެ ވަނަ ހާފުގެ ކުޅުން ފަށައިގެން ހަތް މިނިޓް ތެރޭ، މެޗުގެ 52 ވަނަ މިނިޓްގައި އެންޓޮނީ ޔުނައިޓެޑަށް ލީޑުނަގައިދިނީ ބްރޫނޯ ފެނާންޑޭސް ދިން ބޯޅައަކުންނެވެ. އޭގެ ހަ މިނިޓް ފަހުން، ފެނާންޑޭސް ވަނީ ގޯލެއް ޖަހައި، ޔުނައިޓެޑަށް ޕްރެޝަރު ކަނޑުވާލައިފަ އެވެ. ޔުނައިޓެޑްގެ ފަހު ލަނޑު ޖެހީ ލޫކް ޝޯ ދިން ބޯޅައަކުން ވައުޓް ވެގްހޯސްޓް އެެވެ.
އަމިއްލަ ދަނޑުގައި ކުޅުނު ޔުވެންޓަސް އިން ރޭގެ މެޗުގައި ޖެހި ހަމައެކަނި ލަނޑު ކާމިޔާބުކުރީ 53 ވަަނަ މިނިޓްގަ އެވެ. މިއީ ފިލިޕް ކޮސްޓިޗް ދިން ބޯޅައަކުން އެންހެލް ޑި މާރިއާ ޖެހި ގޯލެކެވެ. ޔުވެންޓަސް އިން ޔޫރަޕް ފުޓްބޯޅަ މުބާރާތުގެ ތަށްޓެއްގައި އެންމެ ފަހުން އަތްލީ 1996 ވަނަ އަހަރު އެވެ. އެހެންކަމުން، މި ފަހަރުގެ ޔޫރޮޕާ ލީގު ކާމިޔާބުކޮށް، އެ އިންތިޒާރަށް ނިމުން ގެނައުމުގެ ފުރުސަތު އޮތީ ފަހިކޮށް ކަމަށް އެ ޓީމުން ދެކެ އެވެ.
ސްޕޯޓިން ލިޒްބަން ސަޕޯޓަރުންގެ ކުރިމަތީގައި އާސެނަލުން ވަނީ ވިލިއަމް ސަލީބާ ބޮލުން ޖެހި ގޯލަކުން ލީޑުނަގައިފަ އެވެ. އެކަމަކު، ފުރަތަމަ ހާފު ވެސް އެ ޓީމުގައި ނިންމައިނުލެވުނެވެ. އެ ގޮތުން، މެޗުގެ 34 ވަނަ މިނިޓްގައި ސްޕޯޓިންގެ ގޮންޒާލޯ އިނާޝިއޯ ވަނީ އެ ޓީމަށް އެއްވަރުކޮށްދީފަ އެވެ. އަދި ދެ ވަނަ ހާފުގެ ކުޅުން ފަށައިގެން، 10 މިނިޓް ތެރޭ ޑިއާޒް ފެނާންޑޭޒް ވަނީ ސްޕޯޓިން އަށް ލީޑުނަގައިދީފަ އެވެ. ސްޕޯޓިން އިން ޖެހި ދެ ގޯލުގައި ވެސް އާސެނަލްގެ ފަހަތުން ހެދި ގޯސްތަކުގެ ފައިދާ ވަނީ ރަނގަޅަށް ނަގައިފަ އެވެ.
އާސެނަލަށް އެއްވަރުކޮށްދިން ލަނޑަކީ ސްޕޯޓިންގެ ޖަޕާނުގެ މިޑްފީލްޑަރު، ހިޑެމާސާ މޮރީޓާ އަތުން ބައިކޮޅަށް ވަން ގޯލެކެވެ.
ގަދަ 16 ބުރުގައި ރޭ ކުޅުނު އެހެން ބައެއް މެޗުތަކުގެ ނަތީޖާ އަށް ބަލާއިރު، ހޯސޭ މޮރީނިއޯގެ ރޯމާ އިން ވަނީ 2-0 އިން ރެއާލް ސޮސިއެޑާޑް ބަލިކޮށްފަ އެވެ. ސެވިއްޔާ އިން 2-0 އިން ފެނަބާޗޭ ކައިރިން ކުރިހޯދިއިރު، ޝަހުތަރު ޑޮނެސްކާއި ފެޔަނޫޑް ވަނީ 1-1 އިން އެއްވަރުވެފަ އެވެ.
