ނޭޕްލްސް (މާޗް 7) - ދުނިޔޭގެ ފުޓްބޯޅަ އަށް ބެލިޔަސް ގިނަ ބަޔަކު ދެކޭގޮތުގައި އެންމެ ވަރުގަދަ ލީގަކީ، އިނގިރޭސި ޕްރިމިއާ ލީގު ކަމަށާއި އެހެން ނަމަވެސް މި ވަގުތު އޭނާއާ އެންމެ ގުޅެނީ އިޓަލީ ލީގު ކަމަށް ނަޕޯލީ އަށް މޮޅު ކުޅުމެއް ދައްކަމުން އަންނަ ނައިޖީރިއާ ފޯވާޑް، ވިކްޓަ އޮސީމެން ބުނެފި އެވެ.
ދާދި ފަހުން އިޓާލިއަން ލީގުގެ އެންމެ މޮޅު ބިދޭސީ ކުޅުންތެރިޔާގެ މަގާމު ހޯދި އޮސީމެން، 24، ހޯދަން އިނގިރޭސި ޕްރިމިއާ ލީގުގެ އާސެނަލާއި މެންޗެސްޓާ ޔުނައިޓެޑުން އަންނަނީ މަސައްކަތް ކުރަމުންނެވެ. އަދި ބައެއް ރިޕޯޓްތައް ބުނާގޮތުން އޮސީމެން ގަންނަން 100 މިލިއަން ޑޮލަރުގެ ޕެކޭޖެއް ހުށަހަޅަން އެ ދެ ކްލަބުން ގަދަހިފުމަކަށް ދާން ތައްޔާރަށް އޮތް ކަމަށް ވެ އެވެ.
މީގެ ތިން އަހަރު ކުރިން ފްރާންސްގެ ލިލް ދޫކޮށް 85 މިލިއަން ޑޮލަރަށް ނަޕޯލީ އަށް ބަދަލުވެ، ތަފާތު ފޯމެއްގައި ކުޅެމުން އަންނަ އޮސީމެން ބުނީ ނަން މަޝްހޫރު ކްލަބްތަކުން އޭނާ ހޯދަން ޝައުގުވެރިވި ކަމުގައި ވިޔަސް ފޯކަސް އަކީ ނަޕޯލީގައި މަޑުކުރުން ކަމަށެވެ.
"ގިނަ ބަޔަކު ބުނޭ އެންމެ ވަރުގަދަ ލީގަކީ އިނގިރޭސި ޕްރިމިއާ ލީގު ކަމަށް. އެހެންވެދާނެ، އެކަމަކު، އެ އަށް އަހަންނެއް ނުވިސްނަން. އަހަރެން ދެކޭ ގޮތުގައި އަހަންނާ އެންމެ ގުޅެނީ އިޓާލިއަން ލީގު. އަހަރެން މި ލީގުގައި މި ކުޅެނީ އުފަލުން،" އޮސީމެން ބުންޏެވެ.
"ކޮންމެ ވެސް ދުވަހެއްގައި އަހަރެން ޕްރިމިއާ ލީގުން ފެނިދާނެ. އެކަމަކު، މިއީ އަހަރެން ނަޕޯލީއާ އެކު ކުރެވޭ އުންމީދުތައް ހާސިލްކުރަން މަަަސައްކަތް ކުރަން ބޭނުންވާ ވަގުތެއް،"
ނަޕޯލީން މި ވަގުތު އޮތީ އިޓާލިއަން ލީގުގެ އެއް ވަނައިގައި 15 ޕޮއިންޓުގެ ލީޑަކާ އެކު އެވެ. ބާކީ 13 މެޗު އޮތްއިރު، އޮސީމެން ބުނީ ކޮންމެ މެޗެއްގައި ވެސް ފޯކަސް ގެއްލުވައިނުލައި ކުޅުން މުހިންމު ކަމަށެވެ. އަދި ނަޕޯލީ ސަޕޯޓަރުން ތިބީ 1990 ވަނަ އަހަރުގެ ފަހުން ފުރަތަމަ ފަހަރަށް ތަށްޓެއްގެ އިންތިޒާރުގައި ކަމަށާއި އެ އުންމީދު ހާސިލްކޮށްދޭން ހުރިހާ މަސައްކަތެއް ކުރާނެ ކަަމަށެވެ.
ނަޕޯލީއާ އެކު 2025 ވަނަ އަހަރުގެ ޖޫންގެ ނިޔަލަށް ކޮންޓްރެކްޓް އޮތް އޮސީމެން ވަނީ މި ސީޒަނުގައި މިހާތަނަށް ކުޅުނު 26 މެޗުން 21 ގޯލު ޖަހައި، ހަތަރު ގޯލު ޖަހަން ފުރުސަތު ތަނަވަސްކޮށްދީފަ އެވެ.
