ބޭންކް އޮފް މޯލްޑިވްސްގެ ސްކޭން ޓު ޕޭ ހިދުމަތް ބޭނުންކޮށްގެން ކިއުއާރެއް ޖެނެރޭޓްކޮށް ފައިސާ ދެއްކޭ ހިދުމަތް ހޯދާއިރު ވަން ޓައިމް ޕާސްވޯޑެއް ފޯނަށް އަންނަ އެ ގޮތަށް ބޭންކުން ހަމަޖައްސައިފި އެވެ.
ސްކޭން ޓު ޕޭ ހިދުމަތަށް ބޭންކުން އޯޓީޕީއެއް މި ތައާރަފް ކުރީ އެ ސަލާމަތީ އިތުރު ފިޔަވަޅެއްގެ ގޮތުންނެވެ.
"ކަސްޓަމަރުންގެ ރައްކާތެރިކަން ކަށަވަރުކުރުމަށް ބޭންކުން އަބަދުވެސް މަސައްކަތް ކުރަމުންދާއިރު، ސެކިއުރިޓީ ފީޗަރސްތައް އިތުރަށް ހަރުދަނާ ކުރުމަށް އަޅަމުންދާ ފިޔަވަޅުތަކެއް މި މާރިޗު މަސް ނިމުމުގެ ކުރިން ތައާރަފްކުރާނެ،" ބޭންކުން ބުނެފައިވެ އެވެ.
އޭގެ އިތުރުން ބީއެމްއެލުން ބުނެފައި ވަނީ އެ ބޭންކުގެ ކަސްޓަމަރުން، ވަގުންގެ އުކުޅުތަކަށް އަބަދުވެސް ރައްކާތެރިވެ ތިބުމަށް އިލްތިމާސް ކުރާ ކަމަށެވެ.
"ސްކޭމްތައް ހިންގާ ފަރާތްތަކުން އެމީހުންގެ އުކުޅުތައް އެކި ދުވަސްވަރު އެކި ގޮތްގޮތަށް ބަދަލަކުރަމުން އަންނައިރު، ބޭންކުން ކަސްޓަމަރުންގެ ފަރާތުން ތަކުރާރުކޮށް އެދެނީ ސްކޭމް އުކުޅުތައް ދެނެގަނެ ޒާތީ މައުލޫމާތު އެއްވެސް ފަރާތަކާ ހިއްސާ ނުކުރުމަށް،" ބީއެމްއެލުން ބުނެފައިވެ އެވެ.
ސްކޭން ޓު ޕޭ އަށް ބީއެމްއެލުން އާ ސަލާމަތީ ލޭޔަރެއް ލާފައި މި ވަނީ ބޭންކުގައި ހުންނަ ފައިސާ އެކި ގޮތްގޮތުން ގެއްލެމުންދާ ކަމަށް ބުނެ ގިނަ ބަޔަކު އެ ވާހަކަ ދައްކަމުންދާ ދުވަސްވަރެއްގަ އެވެ. ބޭންކުން ބުނެފައި ވަނީ ފައިސާ ގެއްލެނީ ބޭންކުގެ އެއްވެސް ސިސްޓަމެއް ކޮމްޕްރަމައިޒްވެގެން ނޫން ކަމަށާއި ފައިސާ ގެއްލޭ ހަގީގީ ސަބަބީީ ކަސްޓަމަރުން ސްކޭމް ކުރާ މީހުންގެ މަކަރަށް ހެއްލުން ކަމަށެވެ.
