ލިވަޕޫލް (މާޗް 4) - ލިވަޕޫލަށް ކުޅެމުން އަންނަ ބްރެޒިލްގެ ފޯވާޑް، ރޮބާޓޯ ފިރްމީނޯ އަށް އަހަރަށް ފަހު ހިލޭ ޓްރާންސްފާއެއްގައި އެ ކްލަބް ދޫކޮށްލަން ނިންމައިފި އެވެ.
ފިރްމީނޯ، ލިވަޕޫލާ ގުޅުނީ 2015 ވަނަ އަހަރު ޖަރުމަނުގެ ހޮފެންހައިމް ދޫކޮށް 33 މިިލިއަން ޑޮލަރުގެ ޑީލެއްގަ އެވެ. ލިވަޕޫލަށް ފިރްމީނޯ ގެންނަން ނިންމީ އެ ޓީމަށް އޭރު ކޯޗުކޮށްދިން ބްރެންޑަން ރޮޖާސް އެވެ. ލިވަޕޫލްގެ ކޯޗުކަމާ ޔާގަން ކްލޮޕް، 2015 ވަނަ އަހަރުގެ އޮކްޓޫބަރު މަހު ހަވާލުވުމަށް ފަހު، ދިން އިންޓަވިއުއެއްގައި ވަނީ އޭނާ ޑޯޓްމަންޑްގައި ހުރެ ގެންނަން މަސައްކަތް ކުރި އެއް ކުޅުންތެރިއަކީ ފިރްމީނޯ ކަމަށް ބުނެފަ އެވެ.
ލިވަޕޫލާ އެކު، ފިރްމީނޯ، 31، ހަދާފައިވާ ކޮންޓްރެކްޓް މި ސީޒަނުގެ ނިޔަލަށް ހަމަވާނެ އެވެ. ކުރު ކޮންޓްރެކްޓެއްގައި ފިރްމީނޯ ލިވަޕޫލާ އެކު ސޮއިކުރަން މަޝްވަރާ ކުރި ނަމަވެސް އެކަން ދިގުލައި ގޮސް، އެންމެ ފަހުން މި ސީޒަން ނިމުމުން ފިރްމީނޯ ހިލޭ ޑީލެއްގައި ލިވަޕޫލް ދޫކޮށްލަން ވަނީ ނިންމައިފަ އެވެ. އަދި އެކަން ލިވަޕޫލްގެ ކޯޗު ކްލޮޕަށް ވެސް ވަނީ އަންގައިފަ އެވެ.
މި ސީޒަނުގައި އަނިޔާގެ މައްސަލަތަކާ ހެދި ކުޅުމާ ދުރަށް ދާން ޖެހުނު ފިރްމީނޯ ވަނީ އެ ޓީމަށް 26 މެޗުން ނުވަ ގޯލު ޖަހައިފަ އެެވެ.
ލިވަޕޫލާ އެކު ކްލަބް ފުޓްބޯޅައިގެ ހުރިހާ މުބާރާތެއް ކާމިޔާބުކުރި ފިރްމީނޯ ވަނީ އެ ޓީމަށް ކުޅެދިން 353 މެޗުން 107 ގޯލު ޖަހައި، 70 ގޯލު ޖަހަން ފުރުސަތު ތަނަވަސްކޮށްދީފަ އެވެ. ފިރްމީނޯ އަކީ ޕްރިމިއާ ލީގުގައި އެންމެ ގިނަ ގޯލު ޖެހި ބްރެޒިލްގެ ކުޅުންތެރިޔާ އެވެ. ފިރްމީނޯ ވަނީ ޕްރިމިއާ ލީގުގައި 71 ގޯލު ޖަހައިފަ އެވެ.
