ސޮނީ ސްޕޯޓްސް ގޯލްޑަން ފުޓްސަލް ޗެލެންޖްގެ ޒޯން ބުރުގައި ރ. އިނގުރައިދޫ، ތ. ތިމަރަފުށި، ދ. ކުޑަހުވަދޫ އަދި ކ. ދިއްފުށި ކުޅުނު ފުރަތަމަ މެޗުތަކުން ރޭ މޮޅުވެއްޖެ އެވެ.
ގޯލްޑަން ފުޓްސަލް ޗެލެންޖްގައި ރޭ އޮތީ ޒޯން ތިނެއް ހަތަރެއް އަދި ފަހެއް، ކޮންމެ ޒޯނެއްގެ ދެ މެޗާއި ޒޯން ދޭކާއި ހަތެއްގެ މެޗެކެވެ.
އެ ގޮތުން ޒޯން ތިނެއްގައި ރޭ ކ. ގާފަރުން ވަނީ އއ. ބޮޑުފޮޅުދޫ 4-2 އިން ބަލިކޮށްފަ އެވެ. އެ ޒޯނުގެ އަނެއް މެޗުން، ޅ. ކުރެންދޫ އަތުން ކ. ދިއްފުށި މޮޅުވީ 5-1 އިންނެވެ. ޒޯން ހަތަރެއްގައި ރޭ އދ. މާމިގިލިން ވަނީ 3-1 އިން މ. ދިއްގަރު ބަލިކޮށްފަ އެެވެ. އެ ޒޯނުގެ އަނެއް މެޗުން އދ. މަހިބަދޫން ވަނީ މ. ނާލާފުށި އަތުން 4-0 އިން މޮޅުވެފަ އެވެ. ޒޯން ފަހެއްގައި ރޭ ދ. ކުޑަހުވަދޫން 4-2 އިން ފ. މަގޫދޫ ބަލިކުރިއިރު، ތ. ތިމަރަފުށިން ވަނީ 8-0 އިން ތ. ކިނބިދޫ ބަލިކޮށްފަ އެވެ. ޒޯން ދޭއްގައި ރޭ ރ. އިނގުރައިދޫ އަތުން ބ. އޭދަފުށި ބަލިވީ 3-1 އިންނެވެ. އަދި ޒޯން ހަތެއްގައި ރޭ ސ. ފޭދޫ އަތުން ޏ. ފުވައްމުލަކު ދަނޑިމަގު މޮޅުވީ 3-1 އިންނެވެ.
ރެހެންދި ފުޓްސަލް ދަނޑުގައި ރޭ ކުޅުނު މެޗުތަކުގެ ތެރެއިން ކުރެންދޫ ކޮޅަށް ދިއްފުށީގެ ލަނޑުތައް ޖެހީ ޝައިހާން ފާއިޒް ދެ ގޯލާއި އަހުމަދު މާޒިން އަދި ރިލްވާން ރަޝީދުގެ އިތުރުން ކުރެންދޫގެ އަބްދުލްވާހިދު އިބްރާހިމް (ވާޑު) އަތުން ބައިކޮޅަށް ގޯލެކެވެ. ކުރެންދޫގެ ހަމައެކަނި ގޯލު ޖެހީ އަލީ އިބްރާހިމް އެވެ.
ގާފަރުން ބޮޑުފޮޅުދޫ ބަލިކުރި މެޗުގައި ލަނޑުތައް ޖެހީ ނާއިހު މުފީދު (ނާހު)، އަލީ މާއިޝް (މައްޓު) އަދި އިބްރާހިމް ރިމާހު ދެ ގޯލެވެ. ބޮޑުފޮޅުދޫގެ ދެ ގޯލުގެ ތެރެއިން އެއް ގޯލަކީ ގާފަރުގެ ސާމިން މުހައްމަދު ނަސީރު އަތުން ބައިކޮޅަށް ވަން ގޯލެކެވެ. އަނެއް ލަނޑު ޖެހީ ރުކުޝާން ޖަމީލް އެވެ.
ދަނޑިމަތުގެ މުހައްމަދު ޔަތޫފް ގާސިމް ދެ ގޯލު ޖެހިއިރު، މުހައްމަދު ސާދު ނިޒާރު ވެސް ވަނީ ލަނޑެއް ޖަހައިފަ އެވެ. ފޭދޫގެ ހަމައެކަނި ލަނޑު ޖެހީ އިބްރާހިމް މަހުދީ (ފޭދޫ އިއްބެ) އެވެ.
ނާލާފުށި ކޮޅަށް މަހިބަދޫގެ ލަނޑުތައް ޖެހީ ޝުއައިދު ސައީދު ދެ ގޯލާއި އަބްދުﷲ މިދުހަތު ފަހުމީ (ބިޗަޑް) އަދި އާދަމް ފަހުމާން އެވެ. ދިއްގަރު ކޮޅަށް މާމިގިލީގެ ހައިޝަމް އަރީފް، އަހުމަދު ނިޒާމް (ނިޒާމްބެ) އަދި އިބްރާހިމް ރިޒުހާން (ރިޒްކޮ) ވަނީ ގޯލު ޖަހައިފަ އެވެ. ދިއްގަރުގެ ހަމައެކަނި ލަނޑު ޖެހީ އަހުމަދު މިދުހަތު މަހުމޫދު އެވެ.
ކުޑަހުވަދޫން މަގޫދޫ ކޮޅަށް ގޯލު ޖެހީ މާޔިޒް ވަހީދު ދެ ގޯލާއި އަބްދުﷲ މުގުސިތު އަދި ހާރޫން ރަޝީދު އެވެ. މަގޫދޫގެ ދެ ގޯލު ޖެހީ މޫސާ މާހިލް މިގުދާދު އެވެ. ތިމަރަފުށިން ކިނބިދޫ ކޮޅަށް ޖެހި އަށް ގޯލުގެ ތެރެއިން ހަތަރު ގޯލު ޖެހީ އިބްރާހިމް ހަމްދާން އެވެ. އެ ޓީމުގެ އަލީ ޝިފާއު (ރޮނާ) ހެޓްރިކެއް ހެދިއިރު، އަނެއް ލަނޑު ޖެހީ އަހުމަދު ހައިލަމް އެވެ.
އިނގުރައިދޫން އޭދަފުށި ބަލިކުރި މެޗުގައި އިނގުރައިދޫގެ އައިހަމް އަހުމަދު ވަނީ ދެ ގޯލު ޖަހައިފަ އެވެ. އަނެއް ލަނޑު ޖެހީ ހަސަން މަމްދޫހު އެވެ. އޭދަފުށީގެ ހަމައެކަނި ލަނޑު ޖެހީ ނިޝާމް މުހައްމަދު ރަޝީދު (ޕޮގްބާ) އެވެ.
ގޯލްޑަން ފުޓްސަލް ޗެލެންޖްގައި މިރޭ އޮތީ ޒޯން އެކެއްގެ ދެ މެޗާއި ޒޯން ހައެއްގެ ދެ މެޗުގެ އިތުރުން ޒޯން އަށެއްގެ ދެ މެޗެވެ.
މިރޭގެ މެޗު ޝެޑިއުލް:
20:00 - ޒޯން އެކެއް: ހއ. އުތީމު - ހދ. ނައިވާދޫ
20:00 - ޒޯން އެކެއް: ށ. ފޯކައިދޫ - ހއ. ފިއްލަދޫ
21:00 - ޒޯން ހައެއް: ގދ. ވާދޫ - ގއ. ނިލަންދޫ
21:00 - ޒޯން ހައެއް: ގއ. މާމެންދޫ - ލ. ގަން
22:00 - ޒޯން އަށެއް: މާފަންނު - ހުޅުމާލެ
22:00 - ޒޯން އަށެއް: ވިލިމާލެ - މައްޗަންގޯޅި
