ޔޫރަޕަށް ހިޖުރަ ކުރަން އުޅުނު ބަޔަކު ތިބި ބޯޓެއް އިޓަލީގެ ދެކުނުން އަޑިއަށް ދިޔުމުން ގެނބިގެން މަރުވި މީހުންގެ އަދަދު 100 އަށް ވުރެ އިތުރުވުން އެކަށީގެންވާ ކަމަށް ރިޕޯޓުތައް ބުނެފި އެވެ.
މިހާތަނަށް 62 މީހުންގެ ހަށިގަނޑު ފެނިފައިވާ އިރު އޭގެ ތެރޭގައި 12 ކުޑަކުދިން ހިމެނެ އެވެ. ބެލެވޭ ގޮތުގައި 200 އެއްހާ މީހުން އެ ބޯޓުގައި ދަތުރު ކުރަމުން ދިޔަ އެވެ.
ބޯޓު ބިންދައިގެން ގޮސް، ގިނަ ބަޔަކު ގެނބެން މެދުވެރިވީ އާދީއްތަ ދުވަހު ކްރޮޓޯން އަވަށާ ކައިރި ކުރަން އުޅުނު ވަގުތު މޫސުން ގޯސްވެގެންނެވެ.
އޭގައި ދަތުރު ކުރަމުން ދިޔައީ އަފްގާނިސްތާން، ޕާކިސްތާން، ސޯމާލިއާ، ސީރިއާ، އިރާގް އަދި އިރާނަށް ނިސްބަތްވާ މީހުންނެވެ.
ގެނބިގެން މަރުވި ގިނަ ބަޔެއްގެ ހަށިގަނޑު ފެނުނީ އެ ސަރަހައްދުގައި ހުންނަ ރިސޯޓެއްގެ ގޮނޑުދޮށަށް ލައްގާފައި ވަނިކޮށެވެ.
އިޓަލީގެ ކޯސްޓްގާޑުން ނެރުނު ބަޔާނެއްގައި ބުނީ ބޯޓުގައި ތިބި މީހުންގެ ތެރެއިން 80 މީހުން ސަލާމަތްކޮށްފައިވާ ކަމަށެވެ. ބަައެއް މީހުން ގޮނޑުދޮށާ ހަމައަށް ދިޔައީ ފަތާފަ އެވެ.
އިޓަލީ ކަސްޓަމްސް ފުލުހުން ބުނީ ސަލާމަތްވި މީހުންގެ ތެރެއިން އެކަކު ހައްޔަރުކޮށްފައިވާ ކަމަށެވެ. އޭނާއަށް ތުހުމަތު ކުރަނީ މީހުން ޓްރެފިކް ކުރި ކަމަށެވެ.
ބޯޓުގައި ގިނައިން ތިބީ ޕާކިސްތާނުގެ ރައްޔިތުން ކަމަށް ރިޕޯޓުތައް ބުނެ އެވެ. ބޮޑު ވަޒީރު ޝެހްބާޒް ޝަރީފް ވިދާޅުވީ 25 އަށް ވުރެ ގިނަ ޕާކިސްތާން ރައްޔިތުން މަރުވެފައިވާ ކަމަށެވެ.
ދާހިލީ ހަމަނުޖެހުމާއި ފަގީރުކަމުން ސަލާމަތްވުމަށް ކޮންމެ އަހަރަކު ވެސް ގިނަ އަދަދެއްގެ މީހުން އެފްރިކާއިން ފެށިގެން ކަނޑު ހުރަސްކޮށް އިޓަލީއަށް ދަތުރު ކުރަން މަސައްކަތް ކުރެ އެވެ.
މޮނީޓާކުރާ ގްރޫޕްތަކުން ބުނާ ގޮތުގައި 2014 ވަނަ އަހަރުން ފެށިގެން މެޑިޓެރޭނިއަން ކަނޑުގައި 20،000 އަށް ވުރެ ގިނަ މީހުން މަރުވެ ނުވަތަ ގެއްލިފައިވެ އެވެ.
