އަދާލަތު ޕާޓީއާއި ޖަމީއަތުއް ސަލަފާ ދެމެދު އޮތް ތަފާތަކީ ސިޔާސީ ކަމެއް ކަމުގައި އަދާލަތު ޕާޓީގެ ރައީސް އިމްރާން އަބްދުﷲ ސިފަކުރައްވައިފި އެވެ.
ހޯމް މިނިސްޓަރުގެ މަގާމުގައިވެސް ހުންނެވި އިމްރާން މިއަދު ކުރެއްވި ޓުވީޓެއްގައި ވަނީ ސަލަފާއި އަދާލަތާ ދެމެދު ހުރި ތަފާތަކީ ދީނީ ކަމެއްތޯ ނުވަތަ ސިޔާސީ މައްސަލަތަކެއްތޯ ސުވާލު އުފައްދަވާފަ އެވެ.
"ދީނީ މައްސަލައެއް ނަމަ އެކަން ހައްލު ކުރަން އަޅުގަނޑުމެން ވަރަށް ބޭނުންވޭ، ސިޔާސީ ކަމެއް ނަމަ އެކަން ވިސްނޭ، ހަމަ ވަރަށް ގުދުރަތީ ކަމެއްތާ (ސިޔާސީ ހިޔާލު ތަފާތުވުމަކީ)" އިމްރާން ވިދާޅުވި އެވެ.
މިކަމާ ގުޅިގެން ސަލަފުގެ ރައީސް ޝެއިހް އަބްދުﷲ ބިން މުހައްމަދު އިބްރާހިމަށް "އަދަދު" އަށް ވިދާޅުވީ އެ ޖަމްއިއްޔާއިން މިކަމުގައި ރަސްމީ ބަހެއް ބުނާނީ މަޝްވަރާކުރުމަށް ފަހުގައި ކަމަށެވެ.
ފާހަގަކޮށްލެވޭ ގޮތުގައި ގައުމުގެ އެކި ކަންކަމުގައި ސަލަފު އަދި އަދާލަތުގެ ވިސްނުން އަބަދުވެސް ތަފާތެވެ. ހާއްސަކޮށް މި ފަހަކަށް އައިސް ދެބައިމީހުންގެ މެދުގައި ބަދަލުކުރެވެމުންދާ ބަހުގެ ހަމަލާތައްވެސް ދަނީ އިތުރުވަމުންނެވެ.
އެގޮތުން، މި ވެރިކަމުގައި ހިނގާ އެކި ކަންކަމާ ދެކޮޅަށް ބަސްބުނެ ފާޑުކިޔަމުންދާ ސަލަފުގެ މެންބަރުން ދަނީ ވެރިކަންކުރާ ކޯލިޝަނުގައި އޮތް އަދާލަތު ޕާޓީއަށް އަދި އެ ޕާޓީގެ ލީޑަރުންނަށް ފާޑުކިޔަމުންނެވެ.
އަދާލަތު ޕާޓީގެ އެކި ފަންތީގެ މެންބަރުން ގެންދަނީ ސަރުކާރުގެ ސިޔާސަތުތައް ދިފާއުކޮށް ސަލަފަށް ރައްދުދެމުންނެވެ.
