ޗައިނާގައި "ގެއްލުނު" ބިލިއަނަރު ބާއޯ ފަން ދަނީ ތަހުގީގަކަށް އެއްބާރުލުން ދެމުން ކަމަށް އޭނާގެ ބޭންކުން ބުނެފި އެވެ.
ޗައިނާ ރިނައިސަންސް ހޯލްޑިންގްސްއިން ފަން ގެއްލިގެން ރިޕޯޓުކުރީ މީގެ 10 ދުވަސް ކުރިންނެވެ. ފަންއަކީ އެ ކުންފުނީގެ ސީއީއޯ އަދި ފައުންޑަރެވެ.
"ކުންފުނީގެ ބޯޑަށް އެނގިފައިވާ ގޮތުގައި ފަން ގެންދަވަނީ ޗައިނާގެ ބައެއް އިދާރާތަކުން ހިންގާ ތަހުގީގަކަށް އެއްބާރުލުން ދެމުން،" ހޮންކޮންގެ ސްޓޮކް އެކްސްޗޭންޖަށް ފޮނުވި އެންގުމެއްގައި ބޭންކުން ބުންޏެވެ.
"ޗައިނާގެ އިދާރާތަކުން އެދޭ ހުރިހާ ކަމަކަށް، ގާނޫނީ ހަމަތަކުގެ މަތިން، މި ކުންފުނިން އެއްބާރުލުން ދޭނަން."
ފަން "ގެއްލުނު" ސަބަބު ފުރަތަމަ ފަހަރަށް ސާފުވި ނަމަވެސް، ހިންގަމުންދާ ތަހުގީގާ ގުޅޭ އެއްވެސް މައުލޫމާތެއް އަދިވެސް ނޭނގެ އެވެ.
ރޮއިޓާޒް ނޫހުން ބުނީ އިދާރާތަކުން މި މަހުގެ ކުރީކޮޅު ފަން ގެންދިޔައީ ބޭންކުގެ ކުރީގެ ރައީސް ކޮންގް ލިންއާ ގުޅޭ ތަހުގީގަކަށެވެ.
ބޭންކިން ދާއިރާގައި ފަން މަސައްކަތް ފެށީ 1990 ގެއަހަރުތަކުގައި، މޯގަން ސްޓެންލީ އާއި ކްރެޑިޓް ސުވިސްއިންނެވެ. ޝަންހާއީ އާއި ޝެންޒެންގެ ސްޓޮކް އެކްސްޗޭންޖްތަކުގެ އެޑްވައިޒަރެއްގެ މަގާމު ވެސް އަދާކުރި އެވެ.
ޓެކް ކުންފުނިތަކާ ގާތް ގުޅުމެއް އޮންނަ ފަން މަޝްހޫރު ވެފައިވަނީ ވިޔަފާރީގެ ބޮޑެތި މުއާމަލާތްތައް ނިންމުމާއި، ބިޔަ ކުންފުނިތައް ގުޅުވާލުމަށް މެދުވެރިއެއްގެ ރޯލް އަދާކުރާ މީހެއްގެ ގޮތުގަ އެވެ.
ބޮޑެތި ވިޔަފާރިވެރިންނާއި މާލީ އިދާރާތަކުގެ ވެރިން "ގެއްލުމުގެ" ތާރީހެއް ޗައިނާގައި އޮވެ އެވެ. ގިނަ ދުވަސްތަކަކަށް ފަހުން ބައެއް ވެރިން އަލުން އެނބުރި މަގާމުތަކަށް ވަޑައިގެންނެވި ނަމަވެސް، ބައެއް ބޭފުޅުން އިތުރަށް ހިދުމަތުގައި ފެނިގެންނުދެ އެވެ.
މާލީ އިދާރާތަކުގެ ވެރިންގެ މައްޗަށް އެކި ތުހުމަތުތަކޮށް، ބަންދުކޮށް ޖަލަށް ހުކުމްކޮށްފައި އެބަ ހުއްޓެވެ.
