ލަންޑަން (ފެބްރުއަރީ 26) - އިނގިރޭސި ލީގު ކަޕް ފައިނަލުގައި މިރޭ ނިއުކާސަލް ޔުނައިޓެޑް އަތުން 2-0 އިން މޮޅުވެ، މެންޗެސްޓާ ޔުނައިޓެޑުން ހަ ވަނަ ފަހަރަށް ލީގު ކަޕްގެ ތަށި އުފުލާލައިފި އެވެ.
މިއީ ފާއިތުވި ހަ އަހަރު ތެރޭ ޔުނައިޓެޑުން ތަށްޓެއް ހޯދި ފުރަތަމަ ފަހަރެވެ. މި ވޭތުވެދިޔަ މުއްދަތަކީ ފާއިތުވި 40 ވަރަކަށް އަހަރު ތެރޭ ޔުނައިޓެޑުން ތަށްޓެއް ހޯދަން ކުރި އެންމެ ދިގު އިންތިޒާރެވެ. ޔުނައިޓެޑުން އެންމެ ފަހުން ތަށްޓެއް ހޯދީ 2017 ވަނަ އަހަރު ހޯސޭ މޮރީނިއޯގެ ކޯޗުކަމުގައި ލީގު ކަޕާއި ޔޫރޮޕާ ލީގެވެ.
މި ފަހަރު ނެދަލެންޑްސްގެ ކޯޗު އެރިކް ޓެން ހާގް ހަވާލުވެ، ފުރަތަމަ ސީޒަނުގައި މި ވަނީ ޔުނައިޓެޑަށް ތަށްޓެއް ހޯދައިދީފަ އެވެ. މި ސީޒަނުގައި ޓެން ހާގްގެ ޔުނައިޓެޑުން އަންނަނީ އަނެއް ތިން މުބާރާތަށް ވެސް ވާދަކުރަމުންނެވެ. އެއީ އިނގިރޭސި ޕްރިމިއާ ލީގާއި އެފްއޭ ކަޕާއި ޔޫރޮޕާ ލީގެވެ.
ލީގު ކަޕް ކާމިޔާބު ކުރުމަށް ފަހު ޔުނައިޓެޑްގެ ކުޅުންތެރިން އުފާފާޅުކުރަނީ.
ލަންޑަންގެ ވެމްްބްލީ ސްޓޭޑިއަމްގައި ޔުނައިޓެޑުން މިރޭގެ ފައިނަލުގައި ދެ ގޯލު ވެސް ޖެހީ ފުރަތަމަ ހާފުގަ އެވެ. މެޗުގެ 33 ވަނަ މިނިޓްގައި ޔުނައިޓެޑުން ލީޑުނެގީ ކަސެމީރޯ ޖެހި ގޯލުންނެވެ. މިއީ ލޫކް ޝޯ ހިލޭ ޖެހުމަކުން ނެގި ބޯޅައަކުން ކަސެމީރޯ ބޮލުން ޖެހި ގޯލެކެވެ. މިއީ އެންމެ ފަހުން ކުޅުނު 12 މެޗުގައި ކަސެމީރޯ ޖެހި ހަތަރު ވަނަ ގޯލެވެ.
ލީޑުނެގިތާ ހަ މިނިޓް ފަހުން ޔުނައިޓެޑުން ދެ ވަނަ ގޯލެއް ޖެހި އެވެ. މިއީ ޔުނައިޓެޑްގެ ވައުޓް ވެގްހޯސްޓް ދިން ބޯޅައަކަށް އޭރިއާތެރެއަށް އަރައި، މާކަސް ރެޝްފޯޑް ފޮނުވާލި ބޯޅައެއްގައި ނިއުކާސަލްގެ ޑިފެންޑަރު ސްވެން ބޮޓްމަން ފައިގައި ޖެހިފައި ގޯލަށް ވަން ބޯޅައެކެވެ.
ނިއުކާސަލް އިން ގޯލެއް ޖެހޭތޯ ކުރި މަސައްކަތުގައި ފޮނުވާލި ބައެއް ބޯޅަތައް ޔުނައިޓެޑްގެ ކީޕަރު ޑޭވިޑް ޑެހެއާ ވަނީ މަތަކޮށްފަ އެވެ. އަނެއްކޮޅުން، ޔުނައިޓެޑަށް ތިން ވަނަ ގޯލެއް ޖަހައިދޭން ރަޝްފޯޑާއި ބްރޫނޯ ފެނާންޑޭސް ޖެހި ބޯޅަތައް ނިއުކާސަލް ގޯލުގައި ހުރި ކީޕަރު ލޮރިސް ކާރިއަސް ވަނީ މަތަކޮށްފަ އެވެ.
މިއީ ކާރިއަސް މިދިޔަ ދެ އަހަރު ތެރޭ ކުުޅުނު ފުރަތަމަ މެޗެވެ. ކާރިއަސް އަށް މި މެޗުގައި ކުޅެން ފުރުސަތު ލިބުނީ ނިއުކާސަލްގެ ކީޕަރު ނިކް ޕޯޕް ސަސްޕެންޝަނެއްގައި ހުރިއިރު، އަނެއް ކީޕަރު މާޓިން ޑުބްރާވްކާ ސީޒަނުގެ ކުރީކޮޅުގައި މި މުބާރާތުގައި ޔުނައިޓެޑްގެ ޓީމު ސްކޮޑުގައި ހިމެނިފައިވާތީ އެވެ.
ޔުނައިޓެޑުން ހަ ވަނަ ފަހަރަށް ލީގު ތަށި ހޯދިއިރު، އެ ޓީމުން ކުރިން މި މުބާރާތް ކާމިޔާބުކުރީ 1992، 2006، 2009، 2010، 2017 އަދި 2023 އެވެ.
