މާފަންނު ހުޅަނގު ދާއިރާގެ މެންބަރު މުހައްމަދު ފަލާހުއާ ބައްދަލުކޮށްފައިވާނެ ކަމަށާއި، އެކަންކޮށްފައި ވާނީ އުސޫލުގެ ތެރެއިން ކަމަށް ޕްރޮސެކިއުޓާ ޖެނެރަލް (ޕީޖީ) ހުސެއިން ޝަމީމް ވިދާޅުވެއްޖެ އެވެ.
މަސްތުވާތަަކެއްޗާ ގުޅުންހުރި ކުށެއްގެ ތުހުމަތުގާ ފަލާހުގެ ދަރިފުޅު ހައްޔަރުކުރުމާއި އެކު ޕީޖީ ޝަމީމްއާ ފަލާހް ބައްދަލުކުރައްވާ އެ މައްސަލައަށް ނުފޫޒު ފޯރުވި ކަމަށް ބައެއް ނޫސްތަކުން ވަނީ ތުހުމަތުކޮށްފަ އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގާ މިކަމާއި ގުޅިގެން ކުރި ސުވާލަކަށް ޖަވާބު ދެއްވަމުންް ޕީޖީ ޝަމީމް ވިދާޅުވީ، ފޯމު ހުށަހަޅައިގެން ބައްދަލުކުރެވޭ އުސޫލެއް އޮންނަ ކަމަށާއި، އަދި ކޮންމެ މީހަކާވެސް ބައްދަލުކުރަނީ އެ އޮންނަ އުސޫލުގެ ތެރެެއިން ކަމަށެވެ.
"އަޅުގަނޑާ ބައްދަލުކުރަން ބޭފުޅަކު ރިކުއެސްޓު ކޮށްފިއްޔާ އެކަން ކުރަން ވަކި އުސޫލެއް އޮވޭ. ފޯމެއް އޮންނާނެ އެ ފޯމު ލީމަ ދެހަފްތާ ނުވަތަ ހަފްތާއެއްގެ ތެރޭގައި ބައްދަލުވާނެ" ޝަމީމް ވިދާޅުވި އެވެ.
ޝަމީމް ވިދާޅުވީ މިގޮތަށް ބާއްވާ ބައްދަލުވުންތަކުގައި ދެކެވޭ ވާހަކަތައް ވެސް ނޯޓުކޮށްފައި އޮންނާނެ ކަމަށެވެ.
މީގެ އިތުރުން ނުފޫޒު ފޯރުވިދާނެތޯ ކުރި ސުވާލަށް ޖަވާބުދެމުން ޝަމީމް ވިދާޅުވީ، ނުފޫޒެއް ނުފޯރުވޭނެ ކަމަށާއއި، ދައުވާއެއް ކުރަން ނިންމިއަސް ނުވަތަ ނުކުރަން ނިންމިއަސް އެކަން ކުރާ ސަބަބު ތަފްސީލްކޮށް ލިއެވިފައި އޮންނާނެ ކަމަށެވެ.
އަދި, މައްސަލަތަކުގައި ގޮތް ނިންމަނީ ޕީޖީ އޮފީހުގެ ތިން ބޭފުޅަކު އެކަމަށް އެއްބަސްވެގެން ކަމަށް ވެސް ޝަމީމް ފާހަގަކުރެއްވި އެވެ.
