ލަންޑަން (26 ފެބްރުއަރީ) - އިނގިރޭސި ލީގު ކަޕްގެ ފައިނަލްގައި މިރޭ މެންޗެސްޓާ ޔުނައިޓެޑާއި ނިއުކާސަލް ޔުނައިޓެޑް ކުރިމަތިލާއިރު، މި ދެ ޓީމު ވެސް އޮތީ ތައްޓަކަށް ފެންބޮވައިގަނެފަ އެވެ. ޔުނައިޓެޑަށް އެންމެ ފަހުން ތައްޓެއް ލިބުނީ 2017 ވަނަ އަހަރެވެ. އަނެއްކޮޅުން، ނިއުކާސަލް އިން ތައްޓެއް ނުލިބި، ގާތްގަނޑަކަށް 54 އަހަރު ހޭދަކޮށްފި އެވެ.
ޔުނައިޓަޑްގެ ކުރީގެ ކޯޗު ހޯސޭ މޮރީނިއޯގެ އިރުޝާދުގެ ދަށުން އެ ޓީމުން ވަނީ 2017 ވަނަ އަހަރުގެ ސީޒަންގައި ލީގު ކަޕާއި ޔޫރޮޕާ ލީގު ކާމިޔާބުކޮށްފަ އެވެ. އޭގެ ފަހުން ޔުނައިޓަޑަށް ތައްޓެއް ނުލިބެވެ. މިއީ ވޭތުވެދިޔަ 40 ވަރަކަށް އަހަރަށް ބަލާއިރު، ޔުނައިޓެޑުން ތަށްޓެއް ނުލިބި އެންމެ ދިގު މުއްދަތެއް ހޭދަކުރަން ޖެހޭ ފަހަރެވެ.
އެފްއޭ ކަޕްގެ ފައިނަލްގައި 1999 ވަނަ އަހަރު ޔުނައިޓެޑް އަތުން ބަލިވި ނިއުކާސަލް އަށް އެންމެ ފަހުން ތައްޓެއް ލިބުނީ 1969 ވަނަ އަހަރު އެވެ.
ޔުނައިޓެޑް އޮތީ މި ސީޒަންގައި ހަތަރު މުބާރާތެއްގެ ތައްޓަށް ވާދަކުރެވޭ ހާލަތުގަ އެވެ. ޔޫރޮޕާ ލީގުގެ ގަދަ 16 އަށް މިދިޔަ ހަފުތާގައި އެ ޓީމު ދަތުރުކުރީ ސްޕެއިންގެ ބާސެލޯނާ ކަޓުވާލުމަށް ފަހު އެވެ. އެފްއޭ ކަޕާއި ޕްރިމިއާ ލީގުގައި ވެސް ޔުނައިޓެޑް އޮތީ ތައްޓަށް ވާދަކުރެވޭ ހިސާބުގަ އެވެ.
ލީގު ކަޕް ފައިނަލަށް ކުރިމަތިލާއިރު ޔުނައިޓަޑް އޮތީ ރަނގަޅު ފޯމެއްގައެވެ. މިދިޔަ އަހަރުގެ ނޮވެމްބަރު މަހުގެ ފަހުން އެ ޓީމުން ބަލިވީ އެންމެ މެޗަކުންނެވެ. އެންމެ ފަހުން ކުޅުނު ނުވަ މެޗުގައި ވެސް ޔުނައިޓެޑް ބައްޔެއް ނުވެ އެވެ.
ނިއުކާސަލްގެ ކޯޗު ހޯވް (ކ) އާއި ޔުނައިޓެޑްގެ ކޯޗު ޓެން ހާގް.
މެޗުގެ ކުރިން މީޑިއާއާ ވާހަކަދައްކަމުން ޔުނައިޓެޑްގެ ކޯޗު އެރިކް ޓެން ހާގް ބުނީ ޔުނައިޓެޑް މި ވަގުތު އޮތީ ރަނގަޅު މިސްރާބުގައި ކަމަށެވެ. އަދި މި ވަގުތު ތައްޓެއް ހޯދުމަކީ އެ ޓީމަށް ލިބޭނެ ބޮޑު ހިތްވަރެއް ކަމަށް ޓެން ހާގްގެ ވާހަކައިގައި ފާހަގަކުރި އެވެ.
"ޔުނައިޓެޑް ކަހަލަ ކްލަބަކަށް ކުޅޭއިރު، (ކޮންމެ ކުޅުންތެރިއެއް ވެސް) އަމިއްލަ ލެގަސީއެއް ބިނާކުރަން މަސައްކަތްކުރާއިރު، މުބާރާތްތަކެއް ކާމިޔާބުކުރުމަކީ މުހިންމު ކަމެއް. މި ވަގުތު ޓީމު އޮތީ ރަނގަޅު މިސްރާބުގައި އަދި މި ލިބެނީ ތައްޓެއް ހޯދުމުގެ ފުރުސަތު،" ޓެން ހާގް ބުންޏެވެ.
ނިއުކާސަލް މި ވަގުތު އޮތީ ޕްރިމިއާ ލީގުގެ ތާވަލްގެ ފަސް ވަނައިގަ އެވެ. ސައުދީގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން ކްލަބާ ހަވާލުވި ފަހުން، ކްލަބުގެ ކޯޗަކަށް، އިނގިރޭސި ޒުވާން ކޯޗު، އެޑީ ހޯވް ހަމަޖައްސައި، އެ ޓީމުން ގެނައި ކުޅުންތެރިންނާ އެކު ނިއުކާސަލްގެ ނަތީޖާތައް ވަނީ ރަނގަޅުވެފަ އެވެ.
މެޗުގެ ކުރިން ނިއުކާސަލްގެ ކޯޗު ހޯވް ބުނީ މިއީ "ތާރީހު ބަދަލުކޮށްލަން" އެ ޓީމަށް ވެސް ލިބޭ ފުރުސަތެއް ކަމަށެވެ.
"މި ކްލަބުގެ ސަޕޯޓަރުން ތައްޓަކަށް އިންތިޒާރުކުރާތާ ވަރަށް ގިނަ އަހަރުތަކެއްވެއްޖެ. އެހެންވީމަ، އަހަރެންގެ އުންމީދަކީ ސަޕޯޓަރުންގެ ދެކެމުން އަންނަ ހުވަފެން ހަގީގަތަަކަށް ހެދުން،" ހޯވް ބުންޏެވެ.
ކުރިން އިނގިރޭސި ޕްރިމިއާ ލީގުގެ ބޯންމައުތުގެ ކޯޗަކަށް ހުރި، ހޯވް ބުނީ ފައިނަލަށް ނުކުންނައިރު، ނިއުކާސަލްގެ ޓީމަށް އިތުބާރު އެބައޮތް ކަމަށެވެ. އަދި، މި ސީޒަންގައި ވެސް ބޮޑެތި ޓީމުތަކެއް އަތުން ނިއުކާސަލް މޮޅުވެފައިވާ ކަމަށާއި މަސައްކަތް ކޮށްފިނަމަ ފައިނަލްގައި ވެސް ރަނގަޅު ނަތީޖާއެއް ނެރެވޭނެ ކަމަށެވެ.
ލަންޑަންގެ ވެމްބްލީ ސްޓޭޑިއަމްގައި މިރޭ ކުޅޭ ފައިނަލުގައި ނިއުކާސަލް އާއި މެންޗެސްޓާ ޔުނައިޓެޑް ބައްދަލުކުރާ މެޗު ފަށާނީ ރާއްޖެ ގަޑިން 21:30 ގަ އެވެ.
