ހޮންކޮންގްގެ މޮޑެލް އަދި އިންފްލުއެންސާ އެބީ ޗޮއި މަރާލައި، ހަށިގަނޑުގެ ބައިތައް ބުރިކުރި މައްސަލައިގެ ތުހުމަތަށް ހަތަރު މީހުން ހައްޔަރުކޮށްފި އެވެ.
އެބީ ޗޮއިގެ ހަށިގަނޑުގެ ބައިތައް ފެނުނީ ހޮންކޮންގްގެ އަވަށެއްގެ ގެޔެއްގެ ތެރެއިންނެވެ. އެބީ ޗޮއި ގެއްލިގެން އެންމެ ފުރަތަމަ ރިޕޯޓު ކުރީ މިދިޔަ ބުދަ ދުވަހު އެވެ.
އޭނާގެ މަރާ ގުޅޭ ތަފްސީލް ފުލުހުން މިހާރު ވަނީ އާއްމުކޮށްފަ އެވެ. މަރުގެ ތުހުމަތަށް އޭނާގެ ކުރީގެ ފިރިމީހާ ހައްޔަރު ކުރީ ހޮނިހިރު ދުވަހު އެވެ.
ފުލުހުން ބުނީ 28 އަހަރުގެ ފިރިހެން މީހާ ހައްޔަރު ކުރީ ބޯޓަކަށް އަރައިގެން ސިޓީއިން ފުރަން އުޅެނިކޮށް ކަމަށެވެ. އޭގެ ކުރިން ހުކުރު ދުވަހު އޭނާގެ މަންމަ އާއި ބައްޕަ އަދި ބޭބެ ވެސް ހައްޔަރު ކުރި އެވެ.
އެންމެ ފަހުން އެބީ ޗޮއި ދިރިހުއްޓާ ފެނުނީ އަންގާރަ ދުވަހު ކޮއުލޫން ސިޓީއިންނެވެ. އޭނާގެ ހަށިގަނޑުގެ ބައިތައް ފެނުނީ އޭގެ 27 ކިލޯމީޓަރު ދުރުން ލުންގް މެއި އަވަށުގެ ގެޔެއްގެ ފްރިޖު ތެރެއިންނެވެ.
"އަޅުގަނޑުމެންނަށް ގަބޫލުކުރެވެނީ އެބީ ޗޮއި އާއި އޭނާގެ ކުރީގެ ފިރިމީހާގެ އާއިލާއާ ދެމެދު ބޮޑެތި އަދަދުތަކުގެ ފައިސާގެ މައްސަލަ ޖެހިފައި އޮތް ކަމަށް،" ފުލުހުންގެ ސުޕްރިންޓެންޑެންޓް އެލެން ޗުންގް އޭއެފްޕީއަށް ވިދާޅުވި އެވެ.
އެބީ ޗޮއި މަރާލުމަށް ބޭނުންކުރި ކަމަށް ބެލެވޭ ބައެއް ތަކެތި ފުލުހުން ވަނީ ހޯދައިފަ އެވެ.
