ޔޫކްރެއިންގައި ކުރަމުންދާ ހަނގުރާމައާ ގުޅިގެން ރަޝިއާ ކުށްވެރި ކުރަން ޗައިނާ ދެކޮޅު ހެދުމުން އިންޑިއާގައި ކުރިއަށް ދިޔަ ޖީ20 ސަމިޓު ނިންމުމުގެ ގޮތުން ބަޔާނެއް ނުނެރެވި ތާށިވެއްޖެ އެވެ.
ދުނިޔޭގެ އެންމެ ބޮޑު އިގްތިސާދުތަކުގެ ފިނޭންސް މިނިސްޓަރުންގެ ސަމިޓުގައި ޗައިނާއިން ބުނީ ސަމިޓު ނިންމުމުގެ ބަޔާނުގައި ހުރި ބައެއް ބައިތަކަށް ރުހުން ނުލިބޭނެ ކަމަށެވެ.
ރަޝިއާއިން ބުނީ ހުޅަނގުގެ "ރަޝިއާއާ ދެކޮޅު" ގައުމުތަަކުން މުޅި ޖީ20 ގަޑުބަޑުކޮށްފައިވާ ކަމަށެވެ.
ރަޝިއާ ކުށްވެރި ކުރަން ޗައިނާއިން ދެކޮޅު ހެދި އިރު، މިދިޔަ ހަފުތާގައި ޗައިނާއިން ވަނީ ޔޫކްރެއިން ހަނގުރާމައަށް ސުލްހަ ގެނެވޭނެ ގޮތުގެ ޕްލޭނެއް އާއްމުކޮށްފަ އެވެ.
ސަމިޓު ނިންމުމުގެ ބަޔާނާ މެދު ގައުމުތަކުން ހިޔާލު ތަފާތުވުމުން، ރިޔާސަތު ބެލެހެއްޓި އިންޑިއާއިން ނެރުނީ "ޗެއާގެ ހުލާސާ"ގެ ނަމުގައި ލިޔުމެކެވެ. އެ ލިޔުމުގައި ބުނީ ޔޫކްރެއިންގެ ހާލަތާ މެދު ހިޔާލު ތަފާތު ކަމަށެވެ.
ޖީ20 ސަމިޓަށް ފަހު އިންޑިއާގެ އޮފިޝަލް އަޖޭ ސެތު ވިދާޅުވީ ޔޫކްރެއިންގެ ހާލަތާ ބެހޭ ގޮތުން ބަޔާނުގައި ހިމެނި ވާހަކަތައް ބަލައިގަންނަން ޗައިނާ އާއި ރަޝިއާއިން ދެކޮޅު ހެދީ ޖީ20 ގެ މެންޑޭޓަކީ "އިގްތިސާދީ އަދި މާލީ" ކަންކަމުގައި ގޮތް ނިންމުން ކަމަށް ވާތީ ކަމަށެވެ.
ސަތާރަ ސަފުހާ ހިމެނޭ ސަމިޓުގެ ހުލާސާ ލިޔުމުގައި ތުރުކީ ބިންހެލުމާއި، އާމްދަނީ މަދު އަދި މެދު ފަންތީގެ ގައުމުތަކުގެ ދަރަންޏާއި ދުނިޔޭގެ ޓެކްސް ސިޔާސަތާއި ކާބޯތަކެތީގެ ރައްކާތެރިކަމާ ގުޅޭ ވާހަކަ ހިމަނާފައިވެ އެވެ.
