ސްޓެމް މާއްދާތަކަށް ސްކޫލް ކުދިންގެ މެދެގައި އޮންނަ ޝައުގުވެރިކަން އިތުރުކުރުމަށް އުރީދޫ މޯލްޑިވްސްއިން ފެއާއެއް ބާއްވަން ހަމަޖައްސައިފި އެވެ.
ސްޓެމްއަކީ ސައިންސާއި ޓެކްނޮލޮޖީއާއި އިންޖިނިއަރިން އަދި މެތަމެޓިކްސް، މި ހަތަރު މާއްދާ އެއްކޮށްލައިގެން ކިޔާ ނަމެކެވެ.
އުރީދޫ ސްޓެމް ފެއާގެ ނަމުގައި ބޭއްވުމަށް ހަމަޖެހިފައިވާ އެ ފެއާ އޮންނާނީ އަންނަ ބުރާސްފަތި ދުވަހާއި ހުކުރު ދުވަހު އިއްޒުއްދީން ސްކޫލް ހޯލުގަ އެވެ. އާންމުންނަށް ހުޅުވާލާފައިވާ ފެއާއަށް ޒިޔާރަތްކުރަން ބޭނުންވާ ހުރިހާ ފަރާތްތަކަށް ވެސް އުރީދޫއިން ވަނީ ފުރުސަތު ހުޅުވަައިލައިފަ އެވެ.
މިނިސްޓްރީ އޮފް އެޑިއުކޭޝަނާއި ވިމެން އިން ޓެކް މޯލްޑިވްސް އާ ގުޅިގެން ކުރިއަށްގެންދާ އެ ފެއާގައި ސައިންސްއާއި ޓެކްނޮލޮޖީގެ އިތުރުން އިންޖިނިއަރިން އަދި މެތަމެޓިކްސް ފަދަ ތަފާތު ސްޓެމް ދާއިރާތަކުން ދަރިވަރުން ކުރިއަށްގެންދާ ޕްރޮޖެކްޓުތައް ދައްކާލާނެ އެވެ.
އެ ފެއާގެ މަގުސަދަކީ ސްޓެމް ދާއިރާއިން ދަރިވަރުން ހޭލުންތެރި ކުރުވައި ދުނިޔޭގައި ދިމާވާ މައްސަލަތައް ހައްލުކުރުމަށް ސައިންސާއި ޓެކްނޮލޮޖީގެ އިތުރުން އިންޖިނިއަރިން އަދި ހިސާބުގެ ބޭނުން ކުރިއެރުވުމަށް މަގުފަހިކުރުން ކަމަށް އުރީދޫގެ އޮފިޝަލް ވިދާޅުވި އެވެ.
އޭނާ ވިދާޅުވީ އެ ފެއާ ވެގެންދާނީ ސްޓެމް މާއްދާތައް ތަޖުރިބާކޮށް އިންޑަސްޓްރީގެ ފަންނުވެރިންގެ ކިބައިން އިބުރަތް ލިބިގަނެ އެކުދިންގެ އުފެއްދުންތެރިކަމާއި އީޖާދީ ވިސްނުމާއި ފަންނީ ހުނަރު ދައްކާލުމުގެ ފުރުސަތު ދަރިވަރުންނަށް ލިބިގެންދާނެ ތައުލީމީ އަދި ހިތްވަރު ލިބޭ ތަޖުރިބާއަކަށް ކަމަށެވެ.
އެ ފެއާ އާ ބެހޭގޮތުން ވާހަކަދައްވަމުން އުރީދޫ މޯލްޑިވްސްގެ ޗީފް ކޮމާޝަލް އޮފިސަރު، ހުސައިން ނިޔާޒް ވިދާޅުވީ ޓެކްނޮލޮޖީ ކުރިއަރާފައިވާ މި ޒަމާނުގައި ރާއްޖޭގެ ޒުވާނުންގެ މެދުގައި ސްޓެމް މާއްދާތަކުގެ ތައުލީމު ކުރިއެރުވުމަކީ މުހިންމުކަމެއް ކަމަށާއި އުރީދޫ ސްޓެމް ފެއާއަކީ ދަރިވަރުންގެ ހުނަރާއި ވިސްނުން ދައްކާލައި، އިބުރަތް ޙާސިލުކޮށް، އެކުދިންގެ ވަށައިގެން ހިނގަމުންދާ އީޖާދުތަކުން ހިތްވަރު ލިބުމަށް ލިބިގެންދާނެ ވަރަށް ރަނގަޅު ފުރުސަތެއް ކަމަށެވެ.
"ސްޓެމް ދާއިރާއަށް ދަރިވަރުންގެ ޝައުގުވެރިކަން ދެނެގަނެ، އެކުދިންގެ ހުނަރު ދައްކާލުމުގެ ޕްލެޓްފޯމެއް ފަހިކޮށްދިނުމަކީ އަޅުގަނޑުމެންނަށް ލިބޭ ވަރަށް ބޮޑު އުފަލެއް،" ނިޔާޒް ވިދާޅުވި އެވެ.
އުރީދޫ ސްޓެމް ފެއާއަކީ ބައިވެރިވާ ހުރިހާ ދަރިވަރުންނަށާއި ޒިޔާރަތްކުރާ ފަރާތްތަކަށް މަޖާ، އިބުރަތްތެރި އަދި ތައުލީމީ ހަރަކާތަކަށް ވެގެންދާނެ ކަމަށް އުރީދޫއިން ބުނެ އެވެ.
