އުރީދޫ މޯލްޑިވްސްގެ އަށްވަނަ އަހަރީ އާންމު ޖަލްސާ އަންނަ ބުދަ ދުވަހު ބާއްވަން އެ ކުންފުނިން ނިންމައިފި އެވެ.
ކްރޮސްރޯޑްސް މޯލްޑިވްސްގެ އިވެންޓު ހޯލުގައި ބޭއްވުމަށް ހަމަޖެހިފައިވާ އެ ޖަލްސާ އޮންނާނީ އެރޭ 8:30 ގަ އެވެ. އެ ޖަލްސާގައި ބައިވެރިވޭނީ މިމަހުގެ 16 ވަނަ ދުވަހުގެ މެންދުރު 2:00 ގެ ކުރިން އުރީދޫގެ ހިއްސާދާރުންގެ ގޮތުގައި ތިބި ފަރާތްތަކުގެ ތެރެއިން ޖަލްސާގައި ބައިވެރިވުމަށް އެދި ރެޖިސްޓާ ކުރާ ފަރާތްތަކަށް އެކަންޏެވެ.
މި އަހަރުގެ އަހަރީ އާންމު ޖަލްސާގައި ބައިވެރިވުމަށް ޝަރުތުހަމަވާ ހިއްސާދާރުން ޖަލްސާގައި ބައިވެރިވުމަށް "ޕްރީ ރެޖިސްޓްރޭޝަން ފޯމު" އަދި ޕްރޮކްސީއެއް އައްޔަން ކުރާނަމަ، "ޕްރޮކްސީ ފޯމު" ފުރުމަށްފަހު ހުށަހަޅަން ޖެހޭނެ އެވެ. އަދި ހުށަހަޅާފައިވާ ޕްރޮކްސީ ބާތިލުކުރަން ބޭނުންވާނަމަ "ޕްރޮކްސީ ރީވޮކޭޝަން ފޯމު" ފުރުމަށްފަހު ހުށަހެޅުމަށް އުރީދޫއިން އެދެ އެވެ.
ރަޖިސްޓާ ކުރުމަށް އެމްއެސްޑީގެ އޮންލައިން ސިސްޓަމް، އިންފިނިޓީ މެދުވެރިކޮށް ފޯމު ހުށަހަޅައިގެން ވެސް ރަޖިސްޓާ ކުރެވޭނެ އެވެ.
ފޯމުތައް ފުރުމަށްފަހު އަންނަ މަހުގެ ހަވަނަ ދުވަހުގެ ރޭގަނޑު 8:30 ގެ ކުރިން investor.relations@ooredoo.mv އަށް އީމެއިލް ކޮށްގެން ނޫނީ އުރީދޫ މޯލްޑިވްސް އޮފީސް، 6 ވަނަ ފަންގިފިލާ، ހ. ސަލްލީޓް، އަށް ފޯމު ހުށަހަޅަން ޖެހޭނެ އެވެ.
ޕްރީ-ރެޖިސްޓެރޭޝަން ފޯމާއި ޕްރޮކްސީ ފޯމު އަދި ޕްރޮކްސީ ރީވޮކޭޝަން ފޯމު އުރީދޫގެ ވެބްސައިޓުން ލިބޭނެ އެވެ.
އުރީދޫގެ އަހަރީ ޖަލްސާގައި އޮންލައިންކޮށް ބައިވެރިވާން އެދޭ ފަރާތްތަކަށް "ފަހި ވޯޓު" މެދުވެރިކޮށް ބައިވެރިވެވޭނެ އިންތިޒާމު އެ ކުންފުނިން ވަނީ ހަމަޖައްސަައިފަ އެވެ. ޖަލްސާ ބާއްވާ ތަނަށް ހާޒިރުވެގެން ބައިވެރިވެވޭނީ ހިއްސާދާރުންގެ ތެރެއިން 120 މީހުންނަށެވެ.
ޖަލްސާގައި ބައިވެރިވުމަށް އެދި ނަން ނޯޓު ކުރާ ފަރާތްތަކުގެ ތެރެއިން އޮންލައިންކޮށް ބައިވެރިވާ ފަރާތްތަކާއި ޖަލްސާއަށް ހާޒިރުވެގެން ބައިވެރިވާ ފަރާތްތަކުގެ މައުލޫމާތު މާޗު 7 ގައި ހިއްސާދާރުންނަށް އުރީދޫއިން އަންގާނެ އެވެ.
ޖަލްސާ އޮންނަ ދުވަހު، މާލެއިން ކްރޮސްރޯޑްސްއަށް ދިއުމަށް ދަތުރު ހަމަޖެހިފައިވާ ގަޑިތަކަކީ ރޭގަނޑު 7:15 އަދި 7:30 އެވެ. ޖަލްސާއަށް ހާޒިރުވެ ބައިވެރިވާ ފަރާތްތަކުން އެރޭގެ 7:30 އާއި 8.30 އާ ދެމެދު ކްރޮސް ރޯޑްސްގެ އިވެންޓް ހޯލަށް ހާޒިރުވެ ރަޖިސްޓާ ކުރަން ޖެހޭނެ އެވެ.
ރެޖިސްޓާ ކުރަން ހާޒިރުވާން ޖެހޭނީ ދިވެއްސެއް ނަމަ ދިވެހި ރައްޔިތެއްކަން އަންގައިދޭ ކާޑު އަދި ބިދޭސީއެއް ނަމަ ޕާސްޕޯޓު ހިފައިގެންނެވެ. ޖަލްސާ ފެށުމުގެ ކުރިން ރެޖިސްޓާ ނުކުރާ ފަރާތްތަކަށް ޖަލްސާގައި ބައިވެރިނުވެވޭނެ ކަމަށް އުރީދޫއިން ބުނެ އެވެ.
އެ ޖަލްސާގައި އޮންލައިންކޮށް ބައިވެރިވާ ހިއްސާދާރުންނާއި ޕްރޮކްސީ ހޯލްޑަރުން ޖަލްސާ އޮންނަ ރޭގެ 8.15 އާއި 8.30 އާ ދެމެދު، ލިބިފައިވާ ލޮގިން މައުލޫމާތު ބޭނުންކޮށްގެން ފަހިވޯޓު ސިސްޓަމަށް ލޮގިން ކުރަން ޖެހޭނެ އެވެ.
ޖަލްސާގެ އެޖެންޑާއާ ގުޅޭ ތަފުސީލު އެ ކުންފުނީގެ ވެބްސައިޓުން ލިބޭނެ އެވެ.
