ރައްޔިތުންގެ މަޖިލީހުގެ ކ. ގުރައިދޫ ދާއިރާގެ މެންބަރު އިބްރާހިމް ރިޒާގެ ޖަނާޒާ އޮތީ މާދަމާ ހެނދުނު މެލޭޝިއާގައި ކަމަށް އިދިކޮޅު ކޯލިޝަނުން ބުނެފި އެވެ.
އުމުރުން 55 އަހަރުގައި ރިޒާ އަވަހާރަވީ ކެންސަރުގެ އާލާސްކަންފުޅުގައި މެލޭޝިއާގައި ފަރުވާ ހޯއްދަވަމުން ގެންދަވަނިކޮށެވެ.
ރިޒާގެ ޖަނާޒާ އޮތީ މާދަމާ ހެނދުނު 09:00 ގައި މެލޭޝިއާގެ ތަނަ ޕަރްކުބުރަން އިސްލާމް، ސެކްޝަން 9، ކޯތާ ދަމަންސަރާގަ އެވެ.
މި ޖަނާޒާގައި އިދިކޮޅު ލީޑާޝިޕްގެ ފަރާތުން ޕީއެންސީގެ ރައީސް އަބްދުއްރަހީމް އަބްުދުﷲ އާއި މަހިބަދޫ ދާއިރާގެ މެންބަރު ތޯރިގް އިބްރާހިމް އާއި ގުރައިދޫ ކައުންސިލްގެ ރައީސް ޔާމީން ބައިވެރިވާނެ ކަމަށް އިދިކޮޅުން ބުނެ އެވެ.
އިދިކޮޅު މައި ޕާޓީ، ޕީޕީއެމްއަށް ނިސްބަތްވާ ރިޒާއަކީ ރައްޔިތުންގެ މަޖިލީހުގައި އެންމެ ގިނަ ދުވަސްވީ އެއް މެންބަރެވެ. މިއީ އޭނާ މަޖިލީހުގެ މެންބަރުކަން ކުރައްވާތާ ތިން ވަނަ ދައުރެވެ.
ގާނޫނީ ވަކީލެއްގެ ގޮތުގައި ވެސް ޕްރެކްޓިސް ކުރައްވަމުން ގެންދެވި ރިޒާ ވަނީ 18 ވަނަ ރައްޔިތުންގެ މަޖިލީހުގެ މެމްބަރެއްގެ ހައިސިއްޔަތުން ޖުޑީޝަލް ސާވިސް ކޮމިޝަންގެ މެމްބަރުކަން އަދާކުރައްވައިފަ އެވެ. އަދި އޭރު އެ ކޮމިޝަންގެ ނައިބު ރައީސްކަން ވެސް އޭނާ ކުރެއްވި އެވެ.
ދެ ހާސް ނަވާރަ ވަނަ އަހަރު ބޭއްވި ރައްޔިތުންގެ މަޖިލީހުގެ އިންތިހާބުގައި ކ. ގުރައިދޫ އަށް އުފަން ރިޒާ، އެ ދާއިރާގެ ގޮނޑި ކާމިޔާބު ކުރެއްވީ އެމްޑީޕީގެ ކެންޑިޑޭޓު، އާދިލް ސަލީމްއާ ވާދަކުރައްވައިގެންނެވެ.
ރިޒާއަކީ މިހާރު ހިނގަމުންދާ މަޖިލީހުގެ މިނިވަން މުއައްސަސާތަކުގެ ކޮމިޓީ އާއި ޖުޑިޝަރީ ކޮމިޓީގެ މެމްބަރެކެވެ. އަދި އެމްއެމްޕީއާރްސީ ހިޔާނާތުގެ މައްސަލަ ބެލި ސަލާމަތީ ހިދުމަތްތަކާބެހޭ ކޮމިޓީ އާއި ޖުޑީޝިއަރީ ކޮމިޓީގެ ޖޮއިންޓް ކޮމިޓީގައި މަސައްކަތް ކުރެއްވެވި އެވެ.
ހިނގަމުން މިދާ ރައްޔިތުންގެ މަޖިލީހުގެ ކޮމަންޑޫ ދާއިރާގެ ކުރީގެ މެމްބަރު ހުސައިން ވަހީދު ޑިސެމްބަރު 14، 2021 ގައި އަވަހާރަވި އެވެ.
ގާނޫނުއަސާސީގެ 78 މާއްދާގައި ބުނެފައިވާ ގޮތުން މެންބަރެއްގެ ގޮނޑި ހުސްްވާ ތާރީހުން ފެށިގެން ދެ މަސް ދުވަހުގެ ތެރޭގައި އެ ދާއިރާއެއްގެ ބައި އިލެކްޝަން ބާއްވަންޖެހެ އެވެ. ގުރައިދޫ ދާއިރާގައި ހިމެނޭ ރަށްތަކަކީ، ގުރައިދޫގެ އިތުރުން މާފުއްޓާއި ގުޅި އެވެ.
