ޓެނިސް ލެޖެންޑް ބްޔޯން ބޯގްގެ ޝަރަފުގައި އިންޑިއާގެ ބެންގަލޫރު ސިޓީގައި ބޭއްވި ހަފުލާއަކަށް މިނިސްޓަރު ގަޑި ޖެހުމުން، ބޯގް އެ ހަފުލާ ދޫކޮށް ހިނގައްޖެ އެވެ.
އިންޑިއާގެ ކަރްނާޓަކާ ސްޓޭޓުގެ ބެންގަލޫރު ސިޓީގައި ބޯގްގެ ޝަރަފުގައި ހަފުލާއެއް ބޭއްވީ އެ ސްޓޭޓްގެ ޗީފް މިނިސްޓަރު ބަސްވަރާޖް ބޮންމާއީ އެވެ.
އަންގާރަ ދުވަހު އޮތް ހަފުލާއަށް ބޮންމާއީ ވަޑައިގެންނެވީ ދެ ގަޑިއިރު ލަހުންނެވެ. ހެނދުނު 09:30 ގައި ހަފުލާ ފެށުމަަށް ތާވަލުކޮށްފައި އޮތް ނަމަވެސް، ބޮންމާއީ ވަޑައިގެންނެވީ 11:15 ގެ ފަހުންނެވެ.
ބޮންމާއީ ހަފުލާއަށް ވަޑައިގެންނެވި އިރު، ބޯގް ވަނީ އެ ތަން ދޫކޮށް ގޮސްފަ އެވެ. ރިޕޯޓުތައް ބުނާ ގޮތުން އޭނާ ދިޔައީ އޭނާގެ ދަރިފުޅު ލިއޯގެ ޓެނިސް މެޗެއް ބެލުމަށެވެ.
ހަފުލާ އިންތިޒާމް ކުރި ކޮމިޓީގެ އޮފިޝަލަކު ޑެކަން ހެރަލްޑް ނޫހަށް ބުނީ މިނިސްޓަރު ގަޑި ޖެހުނީ ބައެއް އެހެން ކަންކަމަށް ވަގުތު ހުސްކުރަން ޖެހުމުން ކަމަށެވެ.
އިންޑިއާގެ އިވެންޓުތަކަށް ސިޔާސީ ފަރާތްތަކާއި ސެލެބްރިޓީއިން ގަޑި ޖެހިގެން ދިޔުމަކީ ވަރަށް އާއްމު ކަމެކެވެ. ބައެއް ފަހަރު އެތައް ގަޑިއިރެއް ފަހުން ވެސް އެ މީހުން އިވެންޓުތަކަށް ދެއެވެ.
ބޯގްގެ ޝަރަފުގައި ބޭއްވި ހަފުލާ ފަހުން ވަނީ ކެންސަލްކޮށްފަ އެވެ. ބޯގްގެ އިތުރުން އިންޑިއާގެ ކުރީގެ ޓެނިސް ތަރި ވިޖޭ އަމްރިތުރާޖުގެ އަގުވަޒަން ކުރުމަށް ވެސް އޮތީ ރާވައިފަ އެވެ.
އޮފިޝަލަކު ބުނީ އެ ހަފުލާ ކެންސަލް ކުރުމަށް ފަހު، ބޯގް އާއި އަމްރިތްރާޖަށް ޝަރަފުގެ އެވޯޑު ދިނުމުގެ އިވެންޓް އޮންނާނީ މި ހަފުތާގެ ދުވަހެއްގައި ޗީފް މިނިސްޓަރު އޮފީހުގައި ކަމަށެވެ.
