އިންޑިއާގެ ވެރިރަށް ނިއު ދިއްލީގައި ސައިކަލު ޓެކްސީ ކުރުން މަނާކުރުމާ އެކު އޫބާ، އޯލާ އަދި ރެޕިޑޯ ފަދަ ކުންފުނިތަކަށް ބޮޑު ގެއްލުމެއް ކުރިމަތިވެއްޖެ އެވެ.
ސަރުކާރުން ނެރުނު އެންގުމެއްގައި ބުނީ ޕަސެންޖަރުން އުފުލުމަށް ދެ ފުރޮޅުލީ އުޅަނދު ބޭނުން ކުރުމަކީ އިންޑިއާގެ ގާނޫނުން މަނާކުރާ ކަމެއް ކަމަށެވެ.
އޭގެ އިތުރުން އެފަދަ ހިދުމަތްތައް މަގުފަހިކޮށްދޭ "ޑިޖިޓަލް ޕްރޮވައިޑަރުން 1،208 ޑޮލަރުން ޖޫރިމަނާ ކުރެވޭނެ" ކަމަށް އެ އެންގުމުގައިވެ އެވެ.
އެކަމާ ގުޅޭ ގޮތުން ކުންފުނިތަކުން އަދި ވަކި އެއްޗެއް ނުބުނެ އެވެ.
އިންޑިއާގައި އެތައް ބަޔަކު ކޮންމެ ދުވަހަކު ވެސް ސައިކަލު ޓެކްސީގެ ހިދުމަތް ބޭނުން ކުރަނީ އަގުހެޔޮ ކުރުމުގެ އިތުރުން ކާރުގައި ދަތުރު ކުރާއިރު ޓްރެފިކް ބާރު ބޮޑުވާތީ އެވެ.
އޭގެ އިތުރުން ސައިކަލު ޓެކްސީގެ ހިދުމަަތުގެ ސަބަބުން އެތައް ހާސް ބަޔަކަށް ވަޒީފާ ވެސް ލިބެ އެވެ. ގިނަ ބަޔަކު ޕްރައިވެޓް އުޅަނދުގައި ހިދުމަތް ދެނީ ޑިޖިޓަލް ކުންފުންޏަކާ ގުޅިގެންނެވެ.
އެހެން ނަމަވެސް އިންޑިއާގެ މޮޓޯ ވެހިކަލް ގާނޫނު ބުނާ ގޮތުން ކޮމާޝަލް އެއްވެސް ބޭނުމަކަށް ޕްރައިވެޓް އުޅަނދު ބޭނުންކުރުން މަނާ ވާނެ އެވެ.
އެލައިޑް މާކެޓް ރިސާޗުން މިދިޔަ އަހަރު ޝާއިއުކުރި ރިޕޯޓެއްގައިވާ ގޮތުން އިންޑިއާގެ ސައިކަލް ޓެކްސީގެ ސިނާއަތުގެ އަގު 50.05 މިލިއަން ޑޮލަރަށް އަރަ އެވެ. އަދި 2030 ގެ ކުރިން އެ އަގު 1.5 ބިލިއަން ޑޮލަރަށް އުފުލޭނެ ކަމަށް ލަފާކުރެވެ އެވެ.
