ބޭންކް އޮފް މޯލްޑިވްސް (ބީއެމްއެލް) ގެ ކިއުއާރް ކޯޑު މެދުވެރިކޮށް ކުރެވޭ މުއާމަލާތް 750 ރުފިޔާއަށް ލިމިޓްކޮށްފި އެވެ.
ބީއެމްއެލް އިން ބުނީ މިއަދުން ފެށިގެން ކިއުއާރް ބޭނުންކޮށްގެން ކުރެވޭ މުއާމަލާތް ލިމިޓް ކުރަން ނިންމާފައިވާ ކަމަށެވެ. އަދި އެއް ފަހަރާ ބީއެމްއެލް ވޮލެޓްގެ ކިއުއާރް މެދުވެރިކޮށް ކުރެވޭނީ 750 ރުފިޔާގެ މުއާމަލާތް ކަމަށް ވަނީ ހަމަޖައްސައިފަ އެވެ.
ދުވާލެއްގެ މައްޗަށް އެންމެ ގިނަވެެގެން ކުރެވޭނީ 10 މުއާމަލާތް ކަމަށް ވެސް ބީއެމްއެލް އިން ބުނެ އެވެ.
މި ގޮތަށް ލިމިޓް ކުރެވުނު ނަމަވެސް ކާޑު ބޭނުންކޮށްގެން މިއަށްވުރެ އިތުރަށް މުއާމަލާތް ކުރެވޭނެ ކަމަށް ބީއެމްއެލުން މައުލޫމާތުދެ އެވެ. ބީއެމްއެލް އިން މިފަދަ ބަދަލެއް ގެނައީ ގިނަ ބައެއްގެ އެކައުންޓުން ފައިސާ ބޮޑެތި އަދަދުން ކެނޑެމުންދާކަމުގެ ޝަކުވާ އިތުރުވެފައިވާ ދަނޑިވަޅެއްގަ އެވެ.
މިހާރަކަށް އައިސް މަކަރާއި ހީލަތުން ކަސްޓަމަރުންގެ އިންޓަނެޓް ބޭންކިން ޔޫސާނޭމް އަދި ޕާސްވޯޑް ހޯދައިގެން އިންޓަނެޓު ބޭންކިން އަށް އެކްސެސްވެ، ފިހާރަތަކަށް އެޕް މެދުވެރިކޮށް ކިއު އާރު ޕޭމަންޓްތައް ހަދަމުން އަންނަކަން ފާހަގަކުރެވި އެކަމަށް ސަމާލުވުމަށް ބީއެމްއެލް އިން ވަނީ އިލްތިމާސްކޮށްފަ އެވެ.
މަކަރާއި ހީލަތުން ފައިސާ ހޯދަމުންދާ ގޮތްތަކަށް ބަދަލުތައް އަންނަމުންދާއިރު، އެ ބޭންކުން ވެސް ކަސްޓަމަރުންގެ ރައްކާތެރިކަމަށް މަސައްކަތްތައް ކުރަމުންދާ ކަމަށާއި ކަސްޓަމަރުންގެ ކިބައިން އެދެނީ ސްކޭމް ހިންގާ ފަރާތްތަކުން ބޭނުންކުރާ އުކުޅުތައް ދެނެގަނެ، އެއްވެސް ޒާތީ މައުލޫމާތެއް އެހެން ފަރާތަކާ ހިއްސާ ނުކުރުމަށް ކަމަށް ބީއެމްއެލުން ބުންޏެވެ.
