ކްރޯމް ބޭނުންކުރަމުންދާއިރު ސިސްޓަމްގެ ޕާފޯމެންސް އިތުރަށް ދަށް ވިޔަ ނުދިނުމަށް ގޫގުލް އިން މުޅިން އައު ދެ ފީޗާއެއް ތައާރަފު ކޮށްފި އެވެ.
އެންމެ ފަހުގެ ކްރޯމް އަޕްޑޭޓް އަށް ގޫގުލް އިން ތައާރަފު ކޮށްފައިވާ ދެ ފީޗާ އަކީ "މެމޮރީ ސޭވާ" އަދި "ބެޓެރީ ސޭވާ" އެވެ. މި ދެ ފީޗާގެ ސަބަބުން ކްރޯމް ބޭނުންކުރާ ވަގުތު އް ޕްރޮގްރާމް އިން ބޭނުންކުރާ ރިސޯސަސް މަދުވެގެން ދާނެކަމަށް ގޫގުލް އިން ބުނެ އެވެ.
އޭގެ ތެރެއިން މެމޮރީ ސޭވާ އަކީ ކްރޯމް އިން ކޭޗް ކުރާ ޑޭޓާ މަދުކޮށް، ސިސްޓަމްގެ ރެމްއަށް ލުއިކަމެއް ގެނެސްދޭނެ ފީޗާއެކެވެ. އެގޮތުން، މި ފީޗާ އޮންވެފަ އިންނަ ވަގުތުތަކުގައި ބޭނުންނުކުރާ ޓެބްތަކުގެ ޑޭޓާ ކްރޯމް އިން އަންލޯޑް ކޮށްލާނެ އެވެ. އަދި އަލުން އެ ޓެބަކަށް ދިޔުމުން އެ ޑޭޓާ ރީލޯޑްކޮށްލާނެ އެވެ.
ދެވަނަ ފީޗާ ކަމަށްވާ ބެޓެރީ ސޭވިން އޮން ވެފަ އިންނަ ވަގުތު ކްރޯމްގެ ބެކްރައުންޑް އެކްޓިވިޓީސް އަދި ވިޝުއަލް އިފެކްޓްސް މަދުކޮށްލަ އެވެ.
އޭގެ އިތުރުން ސައިޓްތަކުގައި ހުންނަ ބައެއް ވީޑިއޯ ނުވަތަ އެނިމޭޝަންގެ އިތުރުން ސްކްރޯލް ކުރުމުގެ ފްރޭމް ރޭޓް އެކަށޭނެ މިންވަރަކަށް ތިރިކޮށްލަ އެވެ. ނަމަވެސް އެނާޖީ ސޭވާ އޮން ވާނީ ލެޕްޓޮޕްގެ ޗާޖް 20 އިންސައްތަ އަށް ދިޔުމުންނެވެ.
ކްރޯމް އަކީ ސިސްޓަމަށް "ބާރުބޮޑުވާ" ޕްރޮގްރާމެއްގެ ގޮތުގައި ގިނަ ބަޔަކު ދެކޭއިރު މި ފީޗާ ތަކުގެ ސަބަބުން ވިންޑޯސް އަދި މެކްއޯއެސް ބޭނުންކުރާ ލެޕްޓޮޕްތަކަށް ވަރަށް ބޮޑު ލުއިކަމެއް ގެނެސްދޭނެ ކަމަށް ގޫގުލް އިން ބުނެ އެވެ.
މެމޮރީ ސޭވާ އަދި އެނާޖީ ސޭވާ ފީޗާ ގޫގުލް އިން ފުރަތަމަ އިއުލާން ކުރީ މިދިޔަ އަހަރުގެ ޑިސެމްބަރު މަހު އެވެ. އެންމެ ފަހުގެ އަޕްޑޭޓުގައި މި ފީޗާތައް އިންނާނީ އޮޓޮމެޓިކަލީ އޮންވެފައެވެ. ނަމަވެސް ބޭނުން ނަމަ ކްރޯމްގެ ސެޓިންއަށް ގޮސް، ވާތް ފަރާތުގައި އިންނަ ލިސްޓްއިން ޕާފޯމަންސް ބަޔަށް ދިޔުމުން މި ފީޗާތައް އޮފްކޮށްލެވޭނެ އެވެ.
