ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2023 ގައި އދ. އަތޮޅުގެ ސެމީ ފައިނަލް މެޗުތަކުން މޮޅުވެ، މަހިބަދޫ އާއި މާމިގިލިން އެ އަތޮޅުގެ ފައިނަލުން ފުރުސަތު ހޯދައިފި އެވެ.
މާމިގިއްޔަކީ އެންމެ ފަހުން މި އަތޮޅުގެ ޗެމްޕިއަނުންނެވެ. އަނެއްކޮޅުން، މިއީ މަހިބަދޫން މުބާރާތުގައި ކުޅޭ ފުރަތަމަ ފަހަރެވެ. ސެމީ ފައިނަލުގައި މާމިގިލިން ވަނީ ފެންފުށި އަތުން 8-0 އިން މޮޅުވެފަ އެވެ. އަދި އަނެއް ސެމީ ފައިނަލުގައި، މަހިބަދޫން ވަނީ ހަންޏާމީދޫގެ މައްޗަށް 2-0 އިން ކުރިހޯދައިފަ އެވެ.
ރެެހެންދި ފުޓްސަލް ދަނޑުގައި ރޭ ކުޅުނު މެޗުގައި މަހިބަދޫ އަށް ލަނޑުތައް ޖަހައިދިނީ އާދަމް ފަހުމާން އާއި އަބްދުﷲ މިދުހަތު ފަހުމީ (ބިޗަޑް) އެވެ. މެޗުގެ މޮޅު ކުޅުންތެރިޔާގެ މަގާމު ހޯދީ ބިޗަޑް އެވެ. މާމިގިލިން ފެންފުށި ކޮޅަށް ޖެހި ލަނޑުތަކަށް ބަލާއިރު، މެޗުގެ މޮޅު ކުޅުންތެރިއަކަށް ހޮވުނު މާމިގިލީގެ ހިސާމް ސަލީމް (ކޮކީ) ހަތަރު ގޯލު ޖެހި އެވެ. އަނެއް ލަނޑުތައް ޖެހީ އިބްރާހިމް ރިޒުހާން (ރިޒްކޯ) ދެ ގޯލާއި ހައިޝަމް އަރީފް އަދި ޓީމުގެ ކެޕްޓަން އިބްރާހިމް މައިސާން ގޯލެކެވެ.
މަހިބަދޫގެ ކުޅުންތެރިން ރޭގެ މެޗަށް ފަހު އުފާފާޅުކުރަނީ.--- ފޮޓޯ: މުހައްމަދު ޝާބިން/ އަދަދު
އއ. އަތޮޅުގައި ރޭ ކުޅުނު މެޗުތަކަށް ބަލާއިރު، ރަސްދޫ ވަނީ، އަބްދުﷲ އިބްރާހިމް ޖެހި ހަމައެކަނި ގޯލުން، އެންމެ ފަހުގެ ޗެމްޕިއަން މަތިވެރި އަތުން، 1-0 އިން މޮޅުވެފަ އެވެ. އަދި ފެރިދޫ އަތުން ބޮޑުފޮޅުދޫ ވަނީ 3-0 އިން ކުރިހޯދައިފަ އެވެ. ބޮޑުފޮޅުދޫގެ ގޯލުތައް ޖެހީ ރުކުޝާން ޖަމީލް ދެ ގޯލާއި ޖާދުﷲ ޖަމީލް ގޯލެކެވެ.
މ. އަތޮޅުގައި ދިއްގަރު އަތުން ނާލާފުށި ވަނީ 2-1 އިން މޮޅުވެފަ އެވެ. މި ދެ ޓީމަށް ވެސް ވަނީ އަތޮޅު ސެމީން ފުރުސަތު ލިބިފަ އެވެ.
މ. އަތޮޅު އަނެއް ގްރޫޕްގެ މެޗުން މުލި އަތުން މަޑުއްވަރީ މޮޅުވީ 2-0 އިންނެވެ. މި ނަތީޖާއާ އެކު މި ދެ ޓީމަށް ވެސް ވަނީ އަތޮޅު ސެމީގެ ޖާގަ ލިބިފަ އެވެ.
ނާލާފުށިން ފުރަތަމަ މެޗުގައި މުލަކު ބަލިކުރިއިރު، ދެއްކި ހިތްވަރު ރޭ ދިއްގަރު ކައިރީގައި ވެސް ވަނީ ތަކުރާރުކޮށްފަ އެވެ. ނާލާފުށީގެ ގޯލުތައް ޖެހީ އަހުމަދު ރަފާހު އާއި މޫސާ ނައިސާން އެވެ. ދިއްގަރުގެ ހަމައެކަނި ލަނޑު ޖެހީ އަހުމަދު މިދުހަތު މަހުމޫދު އެވެ. މުލި ކޮޅަށް މަޑުއްވަރީގެ ލަނޑުތައް ޖެހީ އިސްމާއިލް ނާޝިދު އާއި ހުސެއިން ނާއިމް އެވެ.
ރޭ ކުޅުނު ކ. އަތޮޅުގެ ގްރޫޕް ދޭއްގެ މެޗުން މާފުށިން ވަނީ އިސްމާއިލް ނަޒީހުގެ ގޯލުން 1-0 އިން ކާށިދޫ ބަލިކޮށްފަ އެވެ. މާފުށްޓަށް މި ގްރޫޕްގެ އެއް ވަނަ ގޮތުގައި އަތޮޅު ސެމީން ފުރުސަތު ލިބިފައިވާއިރު، ގްރޫޕްގެ ދެ ވަނަ ކަނޑައެޅޭނީ ހިންމަފުށްޓާއި ކާށިދޫ ކުޅޭ މެޗުންނެވެ.
