މީގެ ހަތް އަހަރު ކުރިން، 20 މާޗް 2015 ވަނަ ދުވަހުގެ ރޭ މުންޑޫ ވަގުތީ ހިޔާގޭ ކައިރިން ހިނގާފައި ދަނިކޮށް ލ. މުންޑޫ، ނޫވިލު، އަލީ ޒިޔަދަމް މަރާލި މައްސަލާގައި އޭނާގެ ގާތިލަށް މަރަށް މަރުގެ އަދަބު ދިނުމަށް، އޭނާގެ ހުރިހާ ވާރިސުން މިއަދު ޝަރީއަތުގެ އަޑުއެހުމުގައި އެދިއްޖެ އެވެ.
ޒިޔަދަމަށް މަސް ކަނޑާ ވަޅިއަކުން ހަމަލާ ދިން ދެ މީހުންނަކީ އެ ރަށަށް ނިސްބަތްވާ އަލީ ސިފާމްއާއި މުހައްމަދު ޝަނޫން ކަމަށް ކޯޓަށް ހުށަހެޅި މައްސަލާގައިވެ އެވެ. އޭގެ ތެރެއިން ޝަނޫންގެ މައްޗަށް ޒިޔަދަމް މަރާލުމުގެ ކުށް ސާބިތުވި އިރު، ސިފާމްގެ މައްޗަށް މަރާލުމުގައި ބައިވެރިވުމުގެ ކުށް ވަނީ ސާބިތުވެފަ އެވެ.
އަލީ ސިފާމްގެ މައްޗަށް ޒިޔަދަމް މަރާލުމުގެ ކުށް ސާބިތުވެފައިވާތީ އަދަބު ކަނޑައެޅުމުގެ ކުރިއަށް ޒިޔަދަމްގެ ވާރިސުންގެ ބަސް މިއަދު ވަނީ ނަގައިފަ އެވެ. ވާރިސުން މަރަށް މަރު ހިފަން ބޭނުންވާނަމަ، އެ ގޮތަށް އަދަބު ކަނޑައަޅަން ޖެހޭތީ އެވެ. އަދި ވާރިސުންގެ ތެރެއިން އެކަކު ވެސް އެ ގޮތް ބޭނުން ނުވާނަމަ، މަރުގެ އަދަބު ދޭން ހުކުމް ނުކުރެވޭނެ އެވެ.
ޒިޔަދަމްގެ ބައްޕަ މުހައްމަދު ނިޒާރު، ކޮއްކޮ ޔޫސުފް ހައިޝަމް، ދައްތަ އާމިނަތު ޖީޒާ، ކޮއްކޮ ހަލީމަތު ނިހާޔަތު، ކޮއްކޮ ހައްވާ ނޫރަލްނަހާރު، ކޮއްކޮ އައިޝަތު ނާއިރާ، ކޮއްކޮ ފާތިމަތު ޝެހެނާޒު، އެއްބަފާ ކޮއްކޮ އަހުމަދު ނިޒާރު އަދި އެއްބަފާ އަބްދުލްޚާލިދު ނިޒާރު ވަނީ މިއަދު އެ މީހުން ބޭނުންވާ ގޮތް ބުނެފަ އެވެ.
ޒިޔަދަމްގެ ވާރިސުންގެ ތެރެއިން ދުނިޔޭގައި މި ވަގުތު ތިބި މި ނުވަ ވާރިސުން ވެސް މަރަށް މަރު ހިފަން މިއަދު ޝަރީއަތުގައި އެދުނުއިރު، ޒިޔަދަމްގެ މަންމަ މަރިޔަމް މޫސާ ދުނިޔޭގައި ހުރި އިރު ފުލުހުންނަށް ދީފައިވާ ބަޔާނުގައި ވަނީ އޭނާ ވެސް އެދެނީ މަރަށް މަރު ހިފަން ކަމަށް ބުނެފަ އެވެ. ޒިޔަދަމް މަރާލިއިރު އޭނާގެ މަންމަ ދުނިޔޭގައި ހުރި ނަމަވެސް މިހާރު ވަނީ މަރުވެފަ އެވެ.
މައްސަލަ ބައްލަވާ ގާޒީ އިސްމާއީލް ޝަފީއު ވިދާޅުވީ މި މައްސަލާގައި އަދަބާ ގުޅޭ ގޮތުން ވާހަކަ ދެއްކުމަށާއި، ހުކުމް ކުރުމުގެ އަޑުއެހުން ތާވަލުކުރުމަށް ނިންމާފައިވަނީ އަންނަ ހަފުތާގެ އާދީއްތަ ދުވަހުގެ ހެނދުނު 10:30 ގައި ކަމަށެވެ.
މައްސަލަ ހިނގައި ދިޔަ ގޮތް;
މި އަހަރުގެ ޖެނުއަރީ މަހު ބޭއްވި އަޑުއެހުމުގައި، ދައުލަތުން ހުށަހެޅި ސިއްރު ހެކިވެރިއެއް ބުނާ ގޮތުން ޒިޔަދަމް މަރާލުމުގެ ކުރިން ހޫނު ގަދަ ޒުވާބެއް ހިނގި ކަމަށް ވެއެވެ. އަދި އެ ޒުވާބު ހިނގާ ދިޔައީ ސިފާމްގެ ކޮއްކޮ އާއި ޒިޔަދަމާ ދެމެދު ހިނގި ކަންތައްތަކެއްގެ ސަބަބުންކަން އެނގޭ ކަމަށް ވެސް އެ ހެކިވެރިޔާ ބުންޏެވެ.
އޭނާ ބުނާ ގޮތުން ޒިޔަދަމް މަރާލާފައި އޮއްވާ ފެނުނީ ޒިޔަދަމްގެ ޅިޔަނުގެ ގޭގެ ބަދިގެ ތެރެއިންނެވެ.
އެ ގޭގެ ބަދިގެއިން އޭނާގެ ހަށިގަނޑު ނަގައިގެން ސިއްހީ މަރުކަޒާ ހަމައަށް ގެންދިޔައިރު ވެސް ހެކިވެރިޔާ ހުރި ކަމަށާއި ސިއްހީ މަރުކަޒު ކައިރިން މައްސަލައިގައި ތުހުމަތު ކުރެވޭ ޝަނޫނު ފެނުނު ކަމަށާއި އޭނާ އެތަނުގައި ވަރަށް އަޑުގަދަކުރި ކަމަށް ހެކިބަސް ދެމުން އޭނާ ކިޔައިދިނެވެ. އަދި ޝަނޫނުގެ ސޯޓުގައި އާއި އަތުގައި އެވަގުތު ލޭ ހުރިތަން ފެނުނު ކަމަށް ވެސް ހެކިވެރިޔާ ބުންޏެވެ.
ހާދިސާ ހިނގި ކަމަށް ބުނާ ތަނުން ޒިޔަދަ މްއާއި ޝަނޫންގެ ލޭ ވެސް ފެނިފައިވެ އެވެ. ޒިޔަދަމަށް ހަމަލާ ދިނީ ޝަނޫން ކަމަށާއި، ޝަނޫނަށް އެ ކަމަށް އެއްބާރުލުން ދިނުމުގައި ސިފާމް ބައިވެރިވާ ކަން ސާބިތުވާ ކަމަށް މިއަދުގެ އަޑުއެހުމުގައި ގާޒީ ޝަފީއު ވެސް ވިދާޅުވި އެވެ.
