އެޕަލްގެ އެމް 1 އަދި އެމް 2 މެކްބުކްތަކުގައި ވިންޑޯސް އިލެވެން ބޭނުންކުރުމުގެ ހުއްދަ މައިކްރޯސޮފްޓުން ދީފި އެވެ.
މައިކްރޯސޮފްޓުން މި ހުއްދަ ދީފައިވަނީ މެކްއަށް ހާއްސަ ސޮފްޓްވެއާއެއް ކަމަށްވާ ޕެރެލެލްސް ޑެސްކްޓޮޕަށެވެ. މިއީ ވާޗުއަލްކޮށް މިކަން ކުރެވޭނެ ނިޒާމު ގާއިމުކޮށްދޭ ސޮފްޓްވެއާއެކެވެ.
މައިކްރޯސޮފްޓް އިން ޝާއިއުކޮށްފައިވާ ސަޕޯޓް އާޓިކަލްއެއްގައި ބުނެފައިވަނީ ޕެރެލެލްސް ޑެސްކްޓޮޕް 18 އަށް ވަނީ ވިންޑޯސް އިލެވެން ރަން ކުރުމުގެ އޮތަރައިޒޭޝަން ދީފައި ކަމަށެވެ.
އެޕަލްގެ މެކްބުކްތަކުގައި ބޫޓް ކޭމްޕް ނުކުރެވުމުގެ ސަބަބުން ހަމައެކަނި ވިންޑޯސް ބޭނުންކުރެވޭނެ މަގެއް މެކްބުކުގައި ނެތެވެ. ނަމަވެސް ޕެރެލެލްސް ފަދަ ވާޗުއަލް މެޝިނެއްގައި ވެސް އެކުންފުނީގެ އޯއެސް ބޭނުންކުރެވޭނެ މަގު ތަނަވަސްކޮށްދެވުމުން މައިކްރޯސޮފްޓުން ވަނީ ހިތްހަމަޖެހުން ފާޅުކޮށްފަ އެވެ.
ވާޗުއަލް މެޝިނެއްކަމުން މެކްބުކްގައި ވިންޑޯސް ބޭނުންކުރުމުގައި ބައެއް ގޮންޖެހުންތައް އެބަ ހުއްޓެވެ. އެގޮތުން 32 ބިޓްގެ އާމް އެޕްތައް ރަން ނުކުރެވުމާއި، ވިންޑޯސް އިލެވެން ގެ އާމް ޑްރައިވާސް ނެތް ނަމަ ބައެއް ޑިވައިސަސް މަސައްކަތް ނުކުރުމުގެ އިތުރުން ވިންޑޯސް ސޭންޑްބޮކްސް ބޭނުންނުކުރެވޭނެ އެވެ.
ޕެރެލެލެސް ޑެސްކްޓޮޕް 16.5 ފެށިގެން އެ ޕްލެޓްފޯމްގައި ވިންޑޯސް ބޭނުންކުރެވޭ ނަމަވެސް މިހާރު މައިކްރޯސޮފްޓްގެ ހުއްދައާ އެކު ފަސޭހަކަމާ އެކު ވިންޑޯސް އިލެވެން ޑައުންލޯޑްކޮށް އިންސްޓޯލްކޮށްލެވޭނެ އެވެ.
ޕެރެލެލްސްގެ އިތުރުން މައިކްރޯސޮފްޓް ވަނީ އެ ކުންފުނީގެ "365 ކްލައުޑް ޕީސީސް" ބޭނުންކޮށްގެން ވެސް މެކްބުކް ގެންގުޅޭ ފަރާތްތަކަށް ވިންޑޯސް ބޭނުންކުރެވިދާނެ ކަމަށް ބުނެފަ އެވެ. މިއީ ކްލައުޑް ޓޭކްނޮލޮޖީ ބޭނުންކޮށްގެން އެޕްލިކޭޝަންތައް ބޭނުންކުރެވޭނެ ނިޒާމެކެވެ.
