ލަންޑަން (ފެބްރުއަރީ 18) - އިނގިރޭސި ޕްރިމިއާ ލީގުގައި އާސެނަލާއި ބްރެންޓްފޯޑް އެއްވަރުވި މެޗުގައި ވީޑިއޯ އެސިސްޓަންޓް ރެފްރީ (ވީއޭއާރް)އާ ހަވާލުވެ ހުރި ރެފްރީ ލީ މޭސަން އަށް އަމާޒުވި ފާޑުކިޔުންތަކާއި ޕްރޮފެޝަނަލް ގޭމްސް އޮފިޝަލްސް ލިމިޓެޑް (ޕީޖީއެމްއޯއެލް) އިން އޭނާގެ މައްސަލަ ބެލުމާ އެކު، އޭނާ އިނގިރޭސި ފުޓްބޯޅައިގައި ރެފްރީކަން ކުރުން ހުއްޓާލައިފި އެވެ.
އިނގިރޭސި ފުޓްބޯޅައިގެ ރެފްރީންގެ ކަންކަން ބަލަހައްޓާ، ޕީޖީއެމްއޯއެލްއާ 1998 ވަނަ އަހަރު ގުޅުނު ލީ މޭސަން، 51، ވަނީ 500 އަށް ވުރެ ގިނަ ރަސްމީ މެޗުތަކުގައި މެޗު އޮފިޝަލެއްގެ ގޮތުގައި ހަރަކާތްތެރިވެފަ އެވެ.
ލީ މޭސަން އަށް މި ފަހުން ފާޑުކިޔުން އަމާޒުވީ މި ފަހުން އާސެނަލް ދަނޑުގައި ބްރެންޓްފޯޑުން 1-1 އިން އެއްވަރުވިއިރު، ބްރެންޓްފޯޑުން ނަތީޖާ ހަމަހަމަކުރަން އެ ޓީމުގެ ފޯވާޑް އައިވާން ޓޯނޭ ޖެހި ގޯލު އޮފްސައިޑްތޯ ބަލަން އެކަށީގެންވާ ވަރަށް ވީއޭއާރް ބޭނުން ކޮށްފައިނުވާތީ އެވެ.
ޕީޖީއެމްއޯއެލްއާ ހަވާލުވެ ހުރި ކުރީގެ ރެފްރީ، ހޮވާޑް ވެބް ވަނީ ލީ މޭސަން އަތުން މި ހެދުނީ ގޯހެއް ކަމަށް އެއްބަސްވެ، އާސެނަލްގެ އޮފިޝަލުންނަށް ގުޅައި، އެކަން ހިނގައިދިޔަގޮތް އޮޅުން ފިލުވައިދީފަ އެވެ. މި މައްސަލައިގައި ލީ މޭސަންގެ ހިތްހަމަނުޖެހުންތަކެއް ހުރުމުން އޭނާ ނިންމީ ޕީޖީއެމްއޯއެލް ދޫކޮށްލައި، އިނގިރޭސި ފުޓްބޯޅައިގައި ރެފްރީކަން ކުރުން ހުއްޓާލައިފަ އެވެ.
ބޯލްޓަން އަށް އުފަން ލީ މޭސަން ވަނީ ޕްރިމިއާ ލީގުގައި 15 އަހަރު މަސައްކަތްކުރިއިރު، 287 މެޗުގެ ރެފްރީ އަކަށް މަސައްކަތް ކޮށްފަ އެވެ.
މީގެ ދެ އަހަރު ކުރިން އިނގިރޭސި ޕްރިމިއާ ލީގުގައި ބާންލީ އަތުން ވުލްވްސް ބަލިވި މެޗެއްގައި ރެފްރީ އަކަށް ހުރީ ލީ މޭސަން އެވެ. އެ މެޗުގައި އޭނާ އަތުން ހެދުނު ގިނަ ގޯސްތަކެއްގެ ސަބަބުން ވުލްވްސް އެ މެޗުން ބަލިވި އެވެ. އެ މެޗަށް ފަހު އޭރު ވުލްވްސް ކޯޗަކަށް ހުރި ނޫނޯ އެސްޕިރީޓޯ ސަންޓޯ ވަނީ ލީ މޭސަން އަކީ ޕްރިމިއާ ލީގުގެ މެޗެއްގައި ރެފްރީކަން ކުރެވޭ ފެންވަރުގެ ރެފްރީއެއް ނޫން ކަމަށް ބުނެފަ އެވެ. އެހާ ފާޅުކަން ބޮޑުގޮތެއްގައި ނޫނޯ ރެފްރީ އަށް ފާޑުކިޔާފައިވާތީ، އިނގިރޭސި އެފްއޭ އިން ވަނީ އެ މައްސަލަ ބަލައި، ނޫނޯ، 34،000 ޑޮލަރުން ޖޫރިމަނާ ކޮށްފަ އެވެ.
ވެސްޓް ބްރޮމް އާއި ބްރައިޓަން، ލީގުގައި 2021 ވަނަ އަހަރު ފެބްރުއަރީ މަހު ބައްދަލުކުރި މެޗެއްގައި ވީއޭއާރް އިން ބަލާފައި، ލީ މޭސަން ވަނީ އެއް ނިންމުމެއް ދެ ފަހަރު ދެ ގޮތަށް ބަދަލުކޮށްފަ އެވެ. އެ ގޮތުން ބްރައިޓަން އިން ހިލޭ ޖެހުމެއްގައި އަވަސް ކުޅުމަކަށް ފަހު ޖެހި ގޯލެއް ބަލައިނުގަންނަން، ލީ މޭސަން ފުރަތަމަ ނިންމި ނަމަވެސް ފަހުން، އެ ގޯލު ބަލައިގަންނަން ނިންމާފައި، އަނެއްކާ ވެސް ނިންމުން ބަދަލުކޮށް ގޯލު ނުލަން ނިންމީ ވީއޭއާރް އިން ބަލައިފަ އެވެ. އެ މެޗަށް ފަހު ޕީޖީއެމްއޯއެލް އިން ބުނީ އެ ގޯލު ބަލައިނުގަންނަން ލީ މޭސަން ނިންމީ ދެ ފަހަރު ކަށިގަނޑު ފުމެވިފައިވާތީ އެވެ. އެއީ ބްރައިޓަންގެ ލެވިސް ޑަންކް ފުރަތަމަ ހިލޭ ޖެހުން ފޮނުވާލިއިރު، ލީ މޭސަން ކަށިގަނޑު ފުމުނު ނަމަވެސް އެ ބޯޅަ ގޯލަށް ވަނުމުގެ ކުރިން ދެ ވަނަ ފަހަރަށް ކަށިގަނޑު ފުމެވިފައިވާކަން ވީއޭއާރް އިން އެނގެން އޮންނާތީ އެވެ.
