ސޮނީ ސްޕޯޓްސް ގޯލްޑަން ފުޓްސަލް ޗެލެންޖްގައި ރޭ ކުޅުނު މެޗުން ރ. އަލިފުށި އަތުން 3-0 އިން މޮޅުވެ، ރ. އިނގުރައިދޫ، އެ އަތޮޅު ފައިނަލުގެ ފުރަަތަމަ ޖާގަ ހޯދައިފި އެވެ.
ގޯލްޑަން ފުޓްސަލް ޗެލެންޖްގައި ރޭ ކުޅުނު އެހެން މެޗުތަކުގެ ނަތީޖާ އަށް ބަލާއިރު، ރ. ދުވާފަރުން ވަނީ 5-1 އިން ރ. އިންނަމާދޫ ބަލިކޮށްފަ އެވެ. ލ. މާބައިދޫ އަތުން ލ. މާމެންދޫ 2-1 އިން ކުރިހޯދިއިރު، ލ. ކަލައިދޫ އަތުން ލ. އިސްދޫ ވަނީ 3-2 އިން މޮޅުވެފަ އެވެ. ހދ. ނޮޅިވަރަންފަރުން 5-0 އިން ހދ. ހިރިމަރަދޫ ބަލިކުރިއިރު، އެ ގްރޫޕްގެ އަނެއް މެޗުން ހދ. ނޭކުރެންދޫ އަތުން ނައިވާދޫ މޮޅުވީ 3-1 އިންނެވެ. ހދ. މަކުނުދޫ އަތުން 3-1 އިން މޮޅުވެ، ހދ. ކުމުންދޫން އަތޮޅު ސެމީ ފައިނަލުގެ ޖާގަ ހޯދިއިރު، ހދ. ވައިކަރަދޫ އަތުން ހދ. ފިނޭ މޮޅުވީ 5-3 އިންނެވެ.
ފަސް ޓީމު ވާދަކުރާ ރ. އަތޮޅުގެ ލީގު ބުރުގެ އެއް ވަނައިގައި އިނގުރައިދޫ އޮތީ ތިން މެޗުން ވެސް މޮޅުވެ ނުވަ ޕޮއިންޓާ އެކު އެވެ. ދެ ވަނައިގައި ދުވާފަރު ހަ ޕޮއިންޓާ އެކު އޮތްއިރު، ތިން ވަނައިގައި އޮތީ ތިން ޕޮއިންޓާ އެކު އަލިފުށްޓެވެ. އިންނަމާދޫ އަށް އަދި ޕޮއިންޓެއް ނުލިބެ އެވެ. މި ގްރޫޕްގައި އަދި ދުވާފަރާއި އިނގުރައިދޫގެ މެޗާއި ދުވާފަރާއި އަލިފުށި ކުޅޭ މެޗު ވެސް އެބައޮތެވެ.
ދުވާފަރު ޓީމުގެ މުހައްމަދު އިސާމް ރޭ ވަނީ އިންނަމާދޫ ކޮޅަށް ހެޓްރިކެއް ހަދައިފަ އެވެ. ދުވާފަރުގެ އަނެއް ދެ ގޯލު ޖެހީ އާދަމް އިލްޔަސައު އާއި މުހައްމަދު ނޫހު އިބްރާހިމް އެވެ. އިންނަމާދޫގެ ގޯލު ޖެހީ އިބްރާހިމް ޔާސީން އެވެ. އަލިފުށި ކޮޅަށް އިނގުރައިދޫގެ ގޯލުތައް ޖެހީ މުހައްމަދު މަމްދޫހު ދެ ގޯލާއި އަލީ ހާފިޒް (ހާއްޕެ) ގޯލެކެވެ.
ރޭގެ މެޗަށް ނުކުތްއިރު ވެސް ހދ.ގެ ގްރޫޕް އެކަކުން ނޭކުރެންދޫ އާއި ނައިވާދޫ އަށް ވަނީ ސެމީން ފުރުސަތު ލިބިފަ އެެވެ. ރޭ ނައިވާދޫން ނޭކުރެންދޫ ބަލިކޮށް ގްރޫޕް ނިންމާލީ ތިން މެޗުން ވެސް މޮޅުވެގެންނެވެ. ނައިވާދޫގެ ގޯލުތައް ޖެހީ އަބްދުﷲ ޝާފިއު (ޝާއްޕެ)، އިސްމާއިލް ވަހީދު އަދި މުހައްމަދު އަސްލަމް އެވެ. ނޭކުރެންދޫގެ ހަމައެކަނި ގޯލު ޖެހީ ޝިފާޒް އާދިލް (ތުއްތު) އެވެ. ނޮޅިވަރަންފަރުން ހިރިމަރަދޫ ބަލިކުރިއިރު، އެ މެޗުގައި ނޮޅިވަރަންފަރުގެ އިބްރާހިމް ވަހީދު ހަސަން (އިއްބެ) ވަނީ ހެޓްރިކެއް ހަދައިފަ އެވެ. އަނެއް ދެ ލަނޑު ޖެހީ މުހައްމަދު ސަމީހު ހަަސަން ފިޔާޒް އާއި އަބްދުﷲ ޝަފީއު ހާޝިމް އެވެ.
މާބައިދޫ އަތުން މޮޅުވެ، މާމެންދޫ ވަނީ ފުރަތަމަ ތިން ޕޮއިންޓް ހޯދައިފަ އެވެ. މާމެންދޫގެ ލަނޑުތައް ޖެހީ ހުސެއިން އަޒުމަތު އެވެ. މާބައިދޫގެ ގޯލަކީ މާމެންދޫގެ އަހުމަދު ރައްޔާން އަތުން ބައިކޮޅަށް ވަން ގޯލެކެވެ.
