ޕެރިސް (ފެބްރުއަރީ 15) - ޔުއެފާ ޗެމްޕިއަންސް ލީގުގެ ގަދަ 16 ބުރުގެ ފުރަތަމަ ލެގުގައި ބަޔާން މިއުނިކުން ރަށުންބޭރުގައި 1-0 އިން ޕީއެސްޖީ ބަލިކުރިއިރު، ޓޮޓެންހަމް ހޮޓްސްޕާސް އަތުން އަމިއްލަ ދަނޑުގައި ކުޅުނު އޭސީ މިލާނުން 1-0 އިން މޮޅުވެއްޖެ އެވެ.
މި ނަތީޖާތަކާ އެކު، ޕީއެސްޖީ އާއި މިލާނަށް ކުއާޓާގެ އުންމީދު އޮތީ ބޮޑުކޮށެވެ. އަންނަ މަހު އަށް ވަނަ ދުވަހު ކުޅޭ ދެ ވަނަ ލެގުގެ މެޗުން އެއްވަރުކޮށްލައިގެން ވެސް ބަޔާނާއި މިލާނަށް ގަދަ އަށް ޓީމުގެ ތެރެއިން ފުރުސަތު ލިބޭނެ އެވެ. ޕީއެސްޖީ އާއި ޓޮޓެންހަމް އިން ޖެހޭނީ ނަތީޖާ އަނބުރާލަން މޮޅެއް ހޯދާށެވެ.
ޕީއެސްޖީ ދަނޑުގައި މިރޭ ކުޅުނު މެޗަށް އެ ޓީމުން ނެރުނު ފުރަތަމަ އެގާރައިގައި ވަނީ ލިއޮނަލް މެސީ އާއި ނޭމާ ހިމަނައިފަ އެވެ. ޕީއެސްޖީން ފެށީ ކީލިއަން އެމްބާޕޭ ބެންޗުގައި ބައިންދައިގެންނެވެ. މެޗު ފަށައިގެން ބަޔާން އިން ބޯޅަ ހިފަަހައްޓައިގެން ކުޅެވޭތޯ ބެލިއިރު، އެ ޓީމުގެ ކެޕްޓަން، ޔޯސުއާ ކިމިކް ޖެހި ބޯޅައެއް ޕީއެސްޖީ ކީޕަރު ޖިއަންލުއީޖީ ޑޮންނަރުންމާ ވަނީ މަތަކޮށްފަ އެވެ.
މެޗުގައި ބަޔާނުން ޖެހި ހަމައެކަނި ލަނޑު ކާމިޔާބުކުރީ 53 ވަނަ މިނިޓްގައި ކިންގްސްލީ ކޯމަން އެވެ. މިއީ އަލްފަންސޯ ޑޭވިސް ނެގި ހުރަހަކުން އޭރިއާތެރެއިން ކޯމަން އެއް ފަހަރުން ގޯލަށް ފޮނުވާލައިގެން ޖެހި ގޯލެެކެވެ. ކުރިން ޕީއެސްޖީ އަށް ކުޅުނު ކޯމަން މި ލަނޑު ޖެހުމަށް ފަހު އުފާފާޅެއް ނުކުރެ އެވެ. މީގެ ދެ އަހަރު ކުރިން، ޗެމްޕިއަންސް ލީގުގެ ފައިނަލުގައި ޕީއެސްޖީ ބަލިކުރަން ވެސް ބަޔާނުގެ ގޯލު ޖެހީ ކޯމަން އެވެ.
ލީޑުފުޅާކުރަން ބަޔާނަށް ލިބުނު ފުރުސަތުތައް އެ ޓީމުން ނަގާލިއިރު، ބެންޗުން އަރައި އެމްބާޕޭ ވަނީ ޕީއެސްޖީ އަށް ލަނޑެއް ޖަހައިދީފަ އެވެ. ޕީއެސްޖީގެ ފުލްބެކް، ނޫނޯ މެންޑޭޒް ނަގައިިދިން ހުރަހަކުން އެމްބާޕޭ ޖެހި މި ގޯލު ބަލައިނުގަންނަން ނިންމީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލިއިރު، އޮފްސަައިޑްވުމުންނެވެ. އޭގެ ފަހުން، މެންޑޭޒް ނެގި ހުރަހަކުން މެސީ ޖެހި ބޯޅައެއް ބަޔާންގެ ޑިފެންޑަރު، ބެންޖަމިން ޕަވާޑް ވަނީ ބްލޮކްކޮށްފަ އެވެ.
މެޗުގެ އިތުރު ވަގުތުގައި މެސީ އަށް ކުރި ފައުލަކަށް ޕަވާޑަށް ދެ ވަނަ ރީނދޫ ކާޑާ އެކު ވަނީ ރަތް ކާޑު ދައްކައިފަ އެވެ.
މިލާންގެ ސަންސީރޯ ސްޓޭޑިއަމްގައި ކުޅުނު މެޗުގައި އެ ޓީމަށް މެޗުގެ ހަމައެކަނި ގޯލު ޖަހައިދިނީ މެޗުގެ ހަތް ވަނަ މިނިޓްގައި ޒުވާން މިޑްފީލްޑަރު، ބްރާހިމް ޑިއާޒް އެވެ. ޓޮޓެންހަމް އޭރިއާތެެރެއިން ޑިއާޒް ޖެހި ބޯޅަ ޓޮޓެންހަމްގެ ކީޕަރު ފްރޭޒާ ފޮސްޓާ އަތުގައި ޖެހިފައި ގޯލު ރޮނގުމައްޗަށް އައި ވަގުތު ޑިއާޒް ވަނީ ބޮލުން ގޯލަށް ބޯޅަ ވައްދާލައިފަ އެވެ.
ޓޮޓެންހަމުން މި މެޗުގައި މިލާންގެ ޑިފެންސް ފޫއަޅުވާލައި، ގޯލެއް ޖަހަން ކުރި މަސައްކަތް ކާމިޔާބުވާ ގޮތެއްނުވި އެވެ. ލީޑުފުޅާކުރެވޭ ވަރަށް މިލާނުން ވެސް ފުރުސަތު ހޯދި އެވެ. އެކަމަކު، ނަސީބުގެ އެހީ ވެސް ނުލިބި ފުރުސަތުތަކުގެ ބޭނުމެއް ނުކުރެވުނެވެ.
