އިންޑީއާގައި މަޝްހޫރުވަމުން އަންނަ މޯބައިލް އެޕްލިކޭޝަންއެއް ކަމަށްވާ "ސްލިކް" އިން ކުޑަކުދިން ހިމެނޭހެން، އެ އެޕް ބޭނުންކުރަމުން ދިޔަ މީހުންގެ ޒާތީ މައުލޫމާތު އާންމުކޮށް ފެންނަ ގޮތަށް ބަހައްޓައިފި އެވެ.
އެޕް ބޭނުންކުރަމުން ދިޔަ މީހުންގެ ފުރިހަމަ ނަމާއި، މޯބައިލް ނަންބަރާއި، އުފަންދުވަހުގެ އިތުރުން އެމީހުންގެ ފޮޓޯތައް ހިމެނޭ ޑޭޓާބޭސްއެއް ކޮންމެ މީހަކަށް ވެސް ބޭނުން ކުރެވޭ ގޮތަށް، އެޕް އުފެއްދި ފަރާތުން ވަނީ އިންޓަނެޓަށް ދޫކޮށްލައިފަ އެވެ. އެއްވެސް ސެކިއުރިޓީއެއް ނެތި މިގޮތަށް މި ޑޭޓާބޭސް މިދިޔަ އަހަރުގެ ޑިސެމްބަރު މަހުން ފެށިގެން ހުރި ކަމަށް އިންޑީއާގެ ރިޕޯޓްތައް ބުނެ އެވެ.
އިންޑިއާގެ ބެންގަލޫރުގައި ދިރިއުޅޭ ފަރާތެއް ކަމަށްވާ އާޗިޓް ނަންދާ އުފައްދާފައިވާ "ސްލިކް" ލޯންޗްކޮށްފައިވަނީ މިދިޔަ އަހަރުގެ ނޮވެމްބަރު މަހުގަ އެވެ. މިއީ އެކަކު އަނެކަކަށް ތައުރީފު ކުރާ ގޮތަށް ޑިޒައިން ކުރެވިފައިވާ އެޕެކެވެ. މިކަމުގެ ސަބަބުން ގިނަ ދަރިވަރުންތަކެއް ވަނީ އެމީހުންގެ ސްކޫލްގައި އުޅޭ ދަރިވަރުންނާއި ގާތް ރައްޓެހިނަށް ހިއްވަރު ދިނުމަށް އަދި ލިބިގަތުމަށް މި އެޕް ބޭނުންކުރަން ފަށާފަ އެވެ.
"ސްލިކް" ގެ ސެކިއުރިޓީ އެއް ނެތް ޑޭޓާބޭސް ހޯދާފައިވަނީ "ކްލައުޑްޑިފެންސް" ގެ ސައިބާ ސެކިއުރިޓީ ރިސާޗާ އަނުރަގް ސެން އެވެ. އޭނާ ވަނީ އެކަން އެނގުނު ހިސާބުން ޓެކްނޮލޮޖީ ގެނެސްދޭ އޮންލައިން ނޫހެއް ކަމަށްވާ "ޓެކް ކްރަންޗް" އަށް އެކަން ރިޕޯޓްކޮށްފަ އެވެ.
މި މައްސަލަ ފެންމަތިވި ވަގުތުގަ 153،000 އަށް ވުރެ ގިނަ މީހުންގެ މައުލޫމާތު "ސްލިކް" ގެ ޑޭޓާބޭސްގައި ހުރި އިރު، މީޑިއާތަކުން މި މައްސަލަ ރިޕޯޓްކުރަން ފެށި ފަހުން "ސްލިކް" އިން ވަނީ ޑޭޓާބޭސް ސެކުއާކޮށް އާންމުނަށް ނުފެންނަ ގޮތް ހަދައިފަ އެވެ.
މައްސަލަ ހޯދި ފަރާތުން ވަނީ އެކަން އިންޑިއާގެ އިލެކްޓްރޯނިކްސް އެންޑް އިންފޮމޭޝަން ޓެކްނޮލޮޖީ މިނިސްޓްރީގެ ކޮމްޕިއުޓާ އެމަޖެންސީ ރެސްޕޮންސް ޓީމަށް ވެސް ހުށަހަޅައިފަ އެވެ.
