މުޅި ރާއްޖެއަށް ހުޅުވާލައިގެން ބާއްވާ އެންމެ ބޮޑު ފުޓްސަލް މުބާރާތް، ގޯލްޑަން ފުޓްސަލް ޗެލެންޖުގެ ޕްލެޓިނަމް ޕާޓުނަރަކަށް މި އަހަރު ވެސް އުރީދޫ ހަމަޖައްސައި، އެއްބަސްވުމުގައި ސޮއިކޮށްފި އެވެ.
އެ އެއްބަސްވުމުގައި އުރީދޫގެ ފަރާތުން ސޮއި ކުރެއްވީ އެ ކުންފުނީގެ ޗީފް ކޮމާޝަލް އޮފިސަރު، ހުސެން ނިޔާޒެވެ. ޖީއެފްއޭގެ ފަރާތުން ސޮއި ކުރެއްވީ އެ އެސޯސިއޭޝަނުގެ ރައީސް، ރިލްވާން މޫސާ އެވެ.
ދެހާސް ފަނަރަ ވަނަ އަހަރު ބާއްވަން ފެށި ގޯލްޑަން ފުޓްސަލް ޗެލެންޖަކީ ރާއްޖޭގެ ކޮންމެ ރަށަކުން އެއް ޓީމު ބައިވެރިވާ މުބާރާތެކެވެ. މި އަހަރުގެ މުބާރާތުގައި ރާއްޖޭގެ އެކިކަންކޮޅުން 102 ޓީމު ބައިވެރިވެފައިވެ އެވެ.
ކޮވިޑުގެ ބަލިމަޑުކަމާ ގުޅިގެން ތިން އަހަރުގެ މެދުކެނޑުމަކަށް ފަހު މިދިޔަ އަހަރު ބޭއްވި ގޯލްޑަން ފުޓްސަލް ޗެލެންޖުގެ ހަ ވަނަ މުބާރާތުގެ ޕްލެޓިނަމް ޕާޓުނަރަކީ ވެސް އުރީދޫ އެވެ.
މި އަހަރުގެ ގޯލްޑަން ފުޓްސަލް ޗެލެންޖުގެ މެޗުތައް މިހާރު ފެށިގެން ކުރިއަށް ދާއިރު، މުޅި ޖުމްލަ 240 އަށް ވުރެ ގިނަ މެޗު ކުޅުމަށް ވަނީ ހަމަޖެހިފަ އެވެ.
އެ މުބާރާތް އިންތިޒާމު ކުރާ ގޯލްޑަން ފުޓްސަލް އެސޯސިއޭޝަނުން މީގެ ކުރިން ވަނީ ޝެޑިއުލާ އެއްގޮތަށް ކުރިއަށް ގެންގޮސް، މުބާރާތް ވީހާ ވެސް ފުރިހަމަކޮށް މުބާރާތް ކުރިއަށް ގެންދިއުމަށް ރާވާފައިވާ ކަމަށް ބުނެފަ އެވެ.
ގޯލްޑަން ފުޓްސަލް އެސޯސިއޭޝަނަކީ މިނިސްޓަރީ އޮފް ހޯމް އެފެއާޒްގެ ދަށުން ރާއްޖޭގައި ރެޖިސްޓާ ކުރި ފުރަތަމަ ފުޓްސަލް އެސޯސިއޭޝަނެވެ.
ގޯލްޑަން ފުޓްސަލް ޗެލެންޖުގެ ޕްލެޓިނަމް ޕާޓުނަރަކަށް އުރީދޫ ހަމަޖައްސާފައިވާއިރު އެ މުބާރާތުގެ ޕަބްލިކް ރިލޭޝަން (ޕީއާރް) ޕާޓުނަރަކީ "އަދަދު" އެވެ.
