މިހާރު ކުރިއަށްދާ ސޮނީ ސްޕޯޓްސް ގޯލްޑަން ފުޓްސަލް ޗެލެންޖްގެ އެންމެ ފަހުން ދެ ފަަހަރުގެ ޗެމްޕިއަން، ތ. ތިމަރަފުށިން މި ފަހަރުގެ މުބާރާތުގައި ކުޅުނު ފުރަތަމަ މެޗުން 8-1 އިން ތ. ބުރުނި ބަލިކޮށް ބޮޑު މޮޅެއް ހޯދިއިރު، ހއ. ވަށަފަރުން 2-1 އިން ހއ. އުތީމު ބަލިކޮށް، ގްރޫޕް ސްޓޭޖު ފުރިހަމަ ރެކޯޑަކާ އެކު ނިންމާލައިފި އެވެ.
ރޭ ކުޅުނު އެހެން މެޗުތަކުގައި ނަތިޖާ އަށް ބަލާއިރު، ކ. މާފުށިން ވަނީ 2-1 އިން ކ. ހިންމަފުށި ބަލިކޮށްފަ އެވެ. ހއ. ކެލާ އިން 2-1 އިން ތުރާކުނު ބަލިކުރިއިރު، ހއ. މާރަންދޫން ވަނީ 3-2 އިން ހއ. ބާރަށްގެ މައްޗަށް ކުރިހޯދައިފަ އެވެ. ހއ. ހޯރަފުށްޓާއި ހއ. އިހަވަންދޫ ކުޅުނު މެޗު ނިމުނީ 2-2 އިން އެއްވަރުވެގެންނެވެ. ހއ. ފިއްލަދޫން 3-2 އިން ހއ. ތަކަންދޫ ބަލިކުރިއިރު، ހއ. މުރައިދޫ އާއި ހއ. ދިއްދޫ ބައްދަލުކުރި މެޗު ނިމުނީ 2-2 އިން އެއްވަރުވެގެންނެވެ.
މުބާރާތުގައި ރޭ ކުޅުނު މެޗުތަކަށް ފަހު، ހއ. ގެ ތިން ގްރޫޕްގެ ކުޅުން ވަނީ ނިމިފަ އެވެ. ކޮންމެ ގްރޫޕަކުން ގަދަ ދެ ޓީމާއި ތިން ގްރޫޕްގެ ތިން ވަނަ ޓީމުގެ ތެރެއިން އެންމެ ރަނގަޅު ނަތީޖާ ނެރޭ ދެ ޓީމެއް ވެސް ވަނީ ކުއާޓާ އަށް ދަތުރުކޮށްފަ އެވެ. އެ ގޮތުން ކުއާޓާގެ ޖާގަތައް ހޯދީ ކެލާ، މާރަންދޫ، ބާރަށް، ވަށަފަރު، އުތީމު، ދިއްދޫ، ފިއްލަދޫ އަދި މުރައިދޫ އެވެ.
ކުއާޓާގައި ކެލާ ކުޅޭނީ މުރައިދޫއާ އެވެ. ބާރަށުން ފިއްލަދޫއާ ކުޅެން ޖެހުނުއިރު، ވަށަފަރުން ނުކުންނާނީ މާރަންދޫއާ ދެކޮޅަށެވެ. އަދި ދިއްދޫ ބައްދަލުކުރަން ޖެހޭނީ އުތީމުއާ އެވެ.
ރެހެންދި ފުޓްސަލް ދެ ދަނޑުގައި ކުރިއަށްދާ މި މުބާރާތުގައި ރޭ ތިމަރަފުށިން ބުރުނި ކޮޅަށް ގޯލުތައް ޖެހީ މެޗުގެ މޮޅު ކުޅުންތެރިޔާ އިބްރާހިމް ހަމްދާން ފަސް ލަނޑާއި އަލީ ސިފާއު (ރޮނާ) ދެ ގޯލާއި ޓީމުގެ ކެޕްޓަން އިބްރާހިމް ސިނާހު ގޯލެކެވެ. ބުރުނީގެ ހަަމައެކަނި ލަނޑު ޖެހީ މުހައްމަދު ސަލީމް އެވެ. ކ. އަތޮޅުގައި ރޭ ކުޅުނު މެޗުގައި މާފުށިން ހިންމަފުށި ކޮޅަށް ގޯލުތައް ޖެހީ ހަަސަން އިމްރާން އާއި ޒުލްކިފްލް ޒާހިރު އެވެ. ހިންމަފުށީގެ ގޯލު ޖެހީ އަހުމަދު ޖައިލަމް އެވެ.
ހއ. ކެލާގެ އައިހަމް (ވ) ކައިރިން ވަށަފަރުގެ ސާޖިދު ބޯޅަ ހިފައިގެންދަނީ.-- ފޮޓޯ: މުހައްމަދު ޝާބިން/ އަދަދު
ހއ. ކެލާއިން ތުރާކުުނު ބަލިކުރި މެޗުގައި ގޯލުތައް ޖެހީ އަހުމަދު އިނާދު އާއި އަލީ އިމާދު އެވެ. މާރަންދުން ބާރަށް ބަލިކުރި މެޗުގައި މާރަންދޫގެ ލަނޑުތައް ޖެހީ އަހުމަދު މުހައްމަދު، ސަމްހާން އަބްދުލް ރަހުމާން އަދި މުހައްމަދު ރަމީދު އެވެ. ބާރަށުގެ ލަނޑުތައް ޖެހީ ސަމްއާން އަބްދުލް ޝުކޫރު އަދި އަހުމަދު ފައިޒާން އެވެ.
ރޭ ވަށަފަރުން އުތީމު ކޮޅަށް އިބްރާހިމް ސަނޫން އާއި އަބްދުﷲ ސިނާން ގޯލުޖެހިއިރު، އުތީމުގެ ލަނޑު ޖެހީ އާދަމް އިޔާޒް އެވެ. މި ފަހަރުގެ މުބާރާތުން އެންމެ ފަހުގެ ޗެމްޕިއަން އިހަވަންދޫ ކެޓީ މޮޅެއް ވެސް ނުލިބި އެވެ. ރޭގެ މެޗުގައި އިހަވަންދޫން ހޯރަފުށްޓާ އެއްވަރުވިއިރު، މި މެޗުގައި އިހަވަންދޫގެ ކެޕްޓަން، އިބްރާހިމް ހާމިދު ދެ ގޯލު ޖެހި އެވެ. ހޯރަފުށީގެ ލަނޑުތައް ޖެހީ އެ ޓީމުގެ ކެޕްޓަން، އަބްދުﷲ ޔާމީން (ޔާނު) އެވެ.
ފިއްލަދޫން 3-2 އިން ތަކަންދޫ ބަލިކުރިއިރު، މި މެޗުގައި ފިއްލަދޫގެ ލަނޑުތައް ޖަހައި އަލީ ކާމިލް ވަނީ ހެޓްރިކެއް ހަދައިފަ އެވެ. ތަކަންދޫގެ ގޯލުތައް ޖެހީ މުހައްމަދު ހަސަން އަހުމަދު އާއި މުހައްމަދު ސިމްހާން އެވެ. ދިއްދޫ އާއި މުރައިދޫ އެއްވަރުވިއިރު، ދިއްދޫގެ ގޯލުތައް ޖެހީ ހައިޝަމް ރަޝީދު އާއި އާދަމް ނަސީމް އެވެ. މުރައިދޫން ގޯލު ޖެހީ އިޔާން އަހުމަދު ރަޝީދު އާއި ހުސެއިން އިރުފާން އަލީ އެވެ.
މުބާރާތުގައި މިއަދު ހަވީރު ހަތަރު މެޗާއި މިރޭ ވެސް އަށް މެޗު ކުޅޭނެ އެވެ.
މިއަދާއި މިރޭގެ މެޗުތަކުގެ ޝެޑިއުލް:
16:00 - ށ. މަރޮށި/ ށ. ކަނޑިތީމު
16:00 - އއ. ބޮނޑުފުޅަދޫ/ އއ. މަތިވެރި
17:00 - އއ. ރަސްދޫ/ އއ. ތޮއްޑޫ
17:00 - ށ. ބިލެތްފަހި/ ށ. މިލަންދޫ
20:00 - އދ. ފެންފުށި/ އދ. މަހިބަދޫ
20:00 - އދ. ދަނގެތި/ އދ. ހަންޏާމީދޫ
21:00 - ގއ. ދެއްވަދޫ/ ގއ. ވިލިނގިލި
21:00 - ގއ. ކޮނޑޭ/ ގއ. ދާންދޫ
22:00 - ގއ. މާމެންދޫ/ ގއ. ގެމަނަފުށި
22:00 - ގއ. ކަނޑުހުޅުދޫ/ ގއ.ނިލަންދޫ
23:00 - ރ. އަލިފުށި/ ރ. އިންނަމާދޫ
23:00 - ރ. އިނގުރައިދޫ/ ރ. މީދޫ
