މިހާރު ކުރިއަށްދާ ސޮނީ ސްޕޯޓްސް ގޯލްޑަން ފުޓްސަލް ޗެެލެންޖް 2023 ގައި ކ. ގާފަރާއި ކ. ދިއްފުށި ކުޅުނު ދެ ވަނަ މެޗުން ވެސް މޮޅުވެ، އެ އަތޮޅު ބުރުގެ ސެމީ ފައިނަލަށް ދިޔައިރު، މ. ނާލާފުއްޓާއި ކޮޅުފުށިން ކުޅުނު ފުރަތަމަ މެޗުން މޮޅުވެ، ފެށުން ރަނގަޅުކޮށްފި އެވެ.
ރެހެންދި ފުޓްސަލް ދަނޑުގައި މިއަދު ހަވީރު ކުޅުނު މެޗުތަކުގެ ނަތީޖާތަކަށް ބަލާއިރު، ގާފަރުން ވަނީ 2-1 އިން ކ. ގުރައިދޫ ބަލިކޮށްފަ އެވެ. ދިއްފުށި އަތުން ކ. ތުލުސްދޫ ބަލިވީ 6-1 އިންނެވެ. ނާލާފުށިން 4-1 އިން މ. މުލަކު ބަލިކުރިއިރު، މ. ދިއްގަރުގެ މައްޗަށް ކޮޅުފުށިން ކުރިހޯދީ 3-2 އިންނެވެ.
ކ. އަތޮޅުގެ އެއް ވަނަ ގްރޫޕްގައި ހިމެނޭ ގާފަރާއި ދިއްފުށިން ފުރަތަމަ ދެ މެޗުން މޮޅުވެ، ދެ ޓީމު ވެސް ވަނީ ހަ ޕޮއިންޓް ހޯދައިފަ އެވެ. މި ގްރޫޕްގައި ދެން އޮތް ދެ ޓީމު ކަމަށްވާ ތުލުސްދޫ އާއި ގުރައިދޫ އަށް އަދި ޕޮއިންޓެއް ނުލިބެ އެވެ.
މި ގްރޫޕްގައި ދެން އޮތީ ގާފަރާއި ދިއްފުށި ކުޅޭ މެޗާއި ތުލުސްދޫ އާއި ގުރައިދޫގެ މެޗެވެ. ގާފަރާއި ދިއްފުށި ކުޅޭ މެޗުން މި ގްރޫޕްގެ އެއް ވަަނަ ކަނޑައެޅޭނެ އެވެ.
ގާފަރު ޓީމުގެ މައްޓު (ވ) ގުރައިދޫ ކުޅުންތެރިއަކު ކައިރިން ނައްޓާފައިދާން މަސައްކަތް ކުރަނީ.--- ފޮޓޯ: މުހައްމަދު ޝާބިން/ އަދަދު
ގާފަރުން މިއަދުގެ މެޗުގައި ލީޑުނެގީ އެ ޓީމުގެ ކެޕްޓަން ބޭންޑް އަޅައިގެން ކުޅުނު އިބްރާހިމް ރިމާހު (ރިމޭ) ޖެހި ގޯލުންނެވެ. އޭރިއާބޭރުން ރިމޭ ޖެހި ބާރު ބޯޅަ އަމާޒުވީ ގޯލުގެ ކަނަށެވެ.
ގުރައިދޫން ވެސް ގޯލު ޖަހަން ފުރުސަތު ހޯދި މި މެޗުގެ ދެ ވަނަ ހާފުގައި ގާފަރަށް ލީޑުފުޅާކޮށްދިނީ މެޗުގެ މޮޅު ކުޅުންތެރިޔާ، އަލީ މާއިސް (މައްޓު) އެވެ. މިއީ ގުރައިދޫ ކުޅުންތެރިއަކު ކައިރިން ދެމިގަތުމަށް ފަހު، ގޯލުގެ މަތީ ކަނަށް ބޯޅަ ފޮނުވާލައިގެން މައްޓު ޖެހި ގޯލެކެވެ. ގާފަރުގެ ފަހަތުން ސަލާމަތްނުކުރެވި ދިޔަ ބޯޅައެއް ހޯދައި ގުރައިދޫގެ ހަމައެކަނި ގޯލު ޖެހީ މުހައްމަދު މުސަފް އިބްރާހިމް އެވެ.
ދިއްފުށި ޓީމުން ތުލުސްދޫ ކޮޅަށް ގޯލުތައް ޖެހީ އަހުމަދު މާޒިން އާއި ރިލްވާން ރަޝީދު ކޮންމެ ކުޅުންތެރިއަކު ދެ ގޯލާއި ޒައިން ޒަފަރު އަދި ޝައިހާން ފާއިޒް ގޯލެކެވެ. ތުލުސްދޫގެ ހަމައެކަނި ގޯލު ޖެހީ އަހުމަދު ޝައިން ހަސަން އެވެ.
މަޑުއްވަރީ ކޮޅަށް ގޯލު ޖެހުމަށް ފަހު މުލަކުގެ ކުޅުންތެރިން އުފާފާޅުކުރަނީ: މުލަކުގެ މޫސާ (މ) ވަނީ މި މެޗުގައި ހެޓްރިކެއް ހަދައިފައި.--- ފޮޓޯ: މުހައްމަދު ޝާބިން/ އަދަދު
މ. އަތޮޅު ގްރޫޕް އެކެއްގައި ނާލާފުށިން ވަނީ އެންމެ ފަހުގެ އަތޮޅު ޗެމްޕިއަން، މުލަކު އަތުން ބޮޑު މޮޅެއް ހޯދައިފަ އެވެ. މި މެޗުގައި ނާލާފުށީގެ ކެޕްޓަން، އަލީ އަޒުމީލް ވަނީ ހަތަރު ގޯލު ޖަހައިފަ އެވެ. އޭނާ ގިނަ ގޯލުތައް ޖެހި އޭރިއާބޭރުން ފޮނުވާލި ބާރު ހަމަލާތަކުންނެވެ.
މ. އަތޮޅުގެ އަނެއް ގްރޫޕްގައި މިއަދު ކުޅުނު މެޗުން ކޮޅުފުށި މޮޅުކޮށްދޭން މެޗުގެ މޮޅު ކުޅުންތެރިއަކަށް ހޮވުނު އެ ޓީމުގެ މޫސާ ޒާހިރު ވަނީ ހެޓްރިކެއް ހަދައިފަ އެވެ. މަޑުއްވަރީ ޓީމުގެ ލަނޑުތައް ޖެހީ އިރުފާން އާމިރު އެވެ.
މުބާރާތުގައި މިރޭ ވެސް އަށް މެޗު ކުޅޭ ގޮތަށް ވަނީ ހަމަޖެހިފަ އެވެ.
