މިހާރު ކުރިއަށްދާ ސޮނީ ސްޕޯޓްސް ގޯލްޑަން ފުޓްސަލް ޗެލެންޖްގައި ރޭ ކުޅުނު މެޗުތަކުގައި ހދ. ނޭކުރެންދޫން 11-1 އިން ހދ. ހިރިމަރަދޫ ބަލިކުރިއިރު، ލ. ގަމުން 2-1 އިން ލ. މާމެންދޫ އަތުން މޮޅުވެއްޖެ އެވެ.
އަދި ރަނގަޅު ތައްޔާރީއަކާ އެކު މި މުބާރާތަށް ނުކުތް ނުކުތް ހދ. ނައިވާދޫން ވަނީ 3-1 އިން ހދ. ނޮޅިވަރަންފަރު ބަލިކޮށްފަ އެވެ. ހދ. ގެ އަނެއް ގްރޫޕްގައި ރޭ ވައިކަރަދޫ އަތުން މަކުނުދޫ ވަނީ 2-1 އިން މޮޅުވެފަ އެވެ. އެ ގްރޫޕްގެ އަނެއް މެޗުން ނެއްލައިދޫ ވަނީ 2-1 އިން ކުމުންދޫ ބަލިކޮށް ދެ ވަނަ މޮޅު ހޯދައިފަ އެވެ.
ލ. އަތޮޅުގައި ރޭ މާބައިދޫ އިން ވަނީ 2-1 އިން ކަލައިދޫ އަތުން މޮޅުވެފަ އެވެ. ގދ. އަތޮޅުގެ ދެ މެޗަށް ބަލާއިރު، ވާދޫ އިން ވަނީ 3-1 އިން ގައްދޫ ބަލިކޮށްފަ އެވެ. އަދި ތިނަދޫގެ މައްޗަށް ހޯޑެއްދޫ ކުރި ހޯދީ 2-1 އިންނެވެ.
ރެހެންދި ފުޓްސަލް ދަނޑުގައި ރޭ ކުޅުނު މެޗުގައި ނޭކުރެންދޫން ގޯލުތައް ޖެހީ ޓީމުގެ ކެޕްޓަން، މުހައްމަދު ވިލްފް ހެޓްރިކަކާއި ޝިފާޒް އާދިލް (ތުއްތު)، މުހައްމަދު އަބާން އިބްރާހިމް، މުހައްމަދު އަބްދުލް ކަރީމް ކޮންމެ ކުޅުންތެރިއަކު ދެ ގޯލުގެ އިތުރުން އަލީ ނިޝާން އަދި މުހައްމަދު ރާއިފް ފަޒީލް އެވެ. ދެ ވަަނަ ހާފުގައި ހިރިމަރަދޫގެ ހަމައެކަނި ގޯލު ކާމިޔާބުކުރީ ހަސަން ރިސްފާހު އެވެ.
ގަމުން ރޭ ލީޑުނެގީ އަލީ ޝާމިސް (ތޮއްޕޭ) ދިން ބޯޅައަކުން އަބްދުﷲ ޖުނައިދު (ޖެންނޭ) ޖެހި ގޯލުންނެވެ. ލަނޑު ޖަހާނެ ރަނގަޅު ފުރުސަތުތަކެއް ގަމު ޓީމަށް ގެއްލުނު މި މެޗުގައި އެ ޓީމުގެ ދެ ވަނަ ގޯލު ޖެހީ ހުސެއިން ނާޝިދު (ނާއްޓޯ) އެވެ. މިއީ ޖެންނޭ ދިން ބޯޅައަކުން ޖެހި ގޯލެކެވެ. މެޗުގެ ފަހު ކޮޅުގައި މާމެންދޫގެ ގޯލު ޖެހީ ހުސެއިން އަޒުމަތު އެވެ. ލ. އަތޮޅުގެ އަނެއް މެޗުގައި މާބައިދޫގެ އަހުމަދު ތޯހާ އާއި މުހައްމަދު ފައިޒަމް ވަނީ ކަލައިދޫ ކޮޅަށް ލަނޑު ޖަހައިފަ އެވެ. ކަލައިދޫގެ ލަނޑު ޖެހީ މުހައްމަދު އަކުރަމް އެވެ.
ނައިވާދޫ ޓީމުގެ ކެޕްޓަން ޔާންޓެ ރޭގެ މެޗުގައި ލަނޑު ޖެހުމަށް ފަހު އުފާފާޅުކުރަނީ.-- ފޮޓޯ: މުހައްމަދު ޝާބިން/ އަދަދު
ނޮޅިވަރަންފަރު ކޮޅަށް ނައިވާދޫ ޓީމުގެ ގޯލުތައް ޖެހީ ޓީމުގެ ކެޕްޓަން، ޔާމީން މުހައްމަދު (ޔާންޓެ) އާއި މެޗުގެ މޮޅު ކުޅުންތެރިޔާ އަބްދުﷲ ޝާފިއު (ޝާއްޕެ) ދެ ގޯލެވެ. މެޗުގެ ފަހު ހާފުގައި ނޮޅިވަރަންފަރުގެ ހަމައެކަނި ލަނޑު ޖެހީ އިބްރާހިމް ވަހީދު ހަސަން (އިއްބެ) އެވެ.
ފުރަތަމަ މެޗުން މޮޅުވި ވައިކަރަދޫ އަތުން މަކުނުދޫ މޮޅުވިއިރު، އެ ޓީމުގެ ލަނޑުތައް ޖެހީ ނިހާން އަހުމަދާއި ޒިދާން އަހުމަދު އެވެ. ވައިކަރަދޫގެ ހަމައެކަނި ލަނޑު ޖެހީ އިބްރާހިމް އަގީލް އެވެ. ނެއްލައިދޫން ކުމުންދޫ ބަލިކުރިއިރު، ނެއްލައިދޫގެ ލަނޑުތައް ޖެހީ ހުސެއިން ހާފިޒް އާއި މުހައްމަދު ވިސާމް އެވެ. ކުމުންދޫގެ ލަނޑު ޖެހީ މަންސޫރު މުހައްމަދު އެވެ.
ގދ. އަތޮޅުގައި ރޭ ފޯރިގަދަ ދެ މެޗު ފެނުނުއިރު، ވާދޫން ގައްދޫ ބަލިކުރި މެޗުގައި ވާދޫގެ ލަނޑުތައް ޖެހީ ނަޝާހު އަހުމަދު (ނައްޓު)، މުހައްމަދު އިޔާދު އަލީ އަދި މުހައްމަދު ނާއިލް އެވެ. ގައްދޫ ޓީމުގެ ލަނޑު ޖެހީ އާލިމް އަބްދުލް އަޒީޒް އެވެ. ތިނަދޫގެ މައްޗަށް އާދަމް ލަރީފް (ރޮނާ)ގެ ކެޕްޓަންކަމުގައި ކުޅުނު ހޯޑެއްދޫ ކުރިހޯދިއިރު، އެ ޓީމުގެ ލަނޑުތައް ޖެހީ އަހުމަދު ނަވާލް ޖަމީލް އާއި އަހުމަދު ސާނިއު އަބްދުލް ގަނީ އެވެ. ތިނަދޫގެ ހަމައެކަނި ލަނޑު ޖެހީ އިބްރާހިމް ހުސެއިން އެވެ.
މުބާރާތުގައި މިއަދު ހަވީރު ހަތަރު މެޗާއި މިރޭ އަށް މެޗު ކުޅޭނެ އެވެ.
މިއަދާއި މިރޭގެ މެޗުތަކުގެ ޝެޑިއުލް:
16:00 - ކ. ގާފަރު/ ކ. ގުރައިދޫ
16:00 - ކ. ދިއްފުށި/ ކ. ތުލުސްދޫ
17:00 - މ. ނާލާފުށި/ މ. މުލަކު
17:00 - މ. މަޑުއްވަރީ/ މ. ކޮޅުފުށި
20:00 - ކ. ހިންމަފުށި/ ކ. މާފުށި
20:00 - ތ. ތިމަރަފުށި/ ތ. ބުރުނި
21:00 - ހއ. ކެލާ/ ހއ. ތުރާކުނު
21:00 - ހއ. މާރަންދޫ/ ހއ. ބާރަށް
22:00 - ހއ. ވަށަފަރު/ ހއ. އުތީމު
22:00 - ހއ. ހޯރަފުށި/ ހއ. އިހަވަންދޫ
23:00 - ހއ ފިއްލަދޫ/ ހއ. ތަކަންދޫ
23:00 - ހއ. ދިއްދޫ/ ހއ. މުރައިދޫ
